ລັດຖະບານທະຫານມຽນມາ ເຜີຍແຜ່ພາບທ່ານ ນາງ ອອງ ຊານ ຊູຈີ ຂຶ້ນສານເປັນຄັ້ງທຳອິດ

ລາຍງານ 25 ພຶດສະພາ 2021, ທ່ານ ແຕ ໝ່ອງ ໝ່ອງ ໜຶ່ງໃນທີ່ປຶກສາທາງການກົດໝາຍຂອງທ່ານ ນາງ ອອງ ຊານ ຊູຈີນ ອະດີດຜູ້ນຳມຽນມາ ກ່າວວ່າທ່ານ ນາງ ອອງ ຊານ ຊູຈີ ຂຶ້ນສານຄັ້ງຫຼ້າສຸດ ທີ່ນະຄອນຫຼວງເນປີດໍ ເມື່ອວັນຈັນ 24 ພຶດສະພາ 2021 ທີ່ຜ່ານມາ, ເຊິ່ງຖືເປັນຄັ້ງທຳອິດ ທີ່ທ່ານ ນາງ ໃຫ້ການຕໍ່ໜ້າສານດ້ວຍຕົນເອງ ນັບຕັ້ງແຕ່ຖືກຄວບຄຸມຕົວ ພາຍໃນບໍ່ພໍເທົ່າໃດຊົ່ວໂມງ ກ່ອນທີ່ກອງທັບມຽນມາຈະປະກາດກໍ່ລັດຖະປະຫານ ເມື່ອວັນທີ 1 ກຸມພາ 2021 ແລະ ສານຍັງອະນຸຍາດໃຫ້ທ່ານ ນາງ ອອງ ຊານ ຊູຈີ ສົນທະນາແບບສ່ວນຕົວກັບທະນາຍຄວາມ ເປັນເວລາປະມານ 30 ນາທີ ກ່ອນເລີ່ມການໄຕ່ສວນ ໂດຍການຂຶ້ນສານຂອງທ່ານ ນາງ ອອງ ຊານ ຊູຈີ ຄັ້ງກ່ອນໆໜ້ານີ້ແມ່ນຜ່ານລະບົບວິດີໂອທາງໄກມາໂດຍຕະຫຼອດ.

ໂດຍສະຖານນີໂທລະພາບແຫ່ງຊາດມຽນມາ ໄດ້ເຜີຍແຜ່ພາບບັນຍາກາດພາຍໃນຫ້ອງພິຈະລະນາຄະດີຂອງສານເນປີດໍ ໂດຍຈຳເລີຍສຳຄັນ 2 ທ່ານ ປາກົດຕົວຕໍ່ໜ້າສານຄື: ທ່ານ ນາງ ອອງ ຊານ ຊູຈີ ອະດີດຜູ້ນຳລັດຖະບານມຽນມາ ແລະ ທ່ານ ວິນ ມິນ ອະດີດປະທານປະເທດມຽນມາ ທັງສອງນັ່ງຢູ່ຕັ່ງ ແລະ ໃສ່ຜ່າອັດປາກອະນາໄມ ໂດຍບໍ່ໄດ້ໃສ່ກັບມື.

ເຊິ່ງທ່ານ ແຕ່ ໝ່ອງ ໝ່ອງ ກ່າວວ່າ ທ່ານ ນາງ ອອງ ຊານ ຊູຈີ ມີສຸຂະພາບແຂງແຮງດີ ພ້ອມທັງໄດ້ຝາກຄຳອວຍພອນມາຍັງປະຊາຊົນມຽນມາ ຂໍໃຫ້ທຸກຄົນເບິ່ງແຍງຕົນເອງ ແລະ ໃຫ້ມີສຸຂະພາບແຂງແຮງ ພ້ອມທັງກ່າວເຖິງພັກສັນນິບາດແຫ່ງຊາດເພື່ອປະຊາທິປະໄຕ (NLD) ທີ່ທ່ານ ນາງ ຮ່ວມສ້າງຕັ້ງກັບຄະນະນັກເຄື່ອນໄຫວທາງການເມືອງຫຼາຍຄົນ ເມື່ອປີ 1988 ວ່າ ພັກ NLD ສ້າງຕັ້ງຂຶ້ນເພື່ອປະຊາຊົນ ດັ່ງນັ້ນ, ພັກ NLD ຈະຍັງຄົງຕົວຢູ່ ຕາບໃດທີ່ປະຊາຊົນຍັງຄົງຢືນຢັດຢູ່.

ໂດຍເມື່ອອາທິດທີ່ຜ່ານມາ ຄະນະກຳມະການການເລືອກຕັ້ງມຽນມາ ພາຍໃຕ້ການບໍລິຫານງານຂອງລັດຖະບານທະຫານ ໄດ້ກ່າວວ່າກຳລັງມີການກຽມຍຸບພັກ NLD ດ້ວຍເຫດຜົນການສໍ້ໂກງການເລືອກຕັ້ງ ເມື່ອເດືອນພະຈິກ ປີທີ່ຜ່ານມາ.

ຂະນະທີ່ທ່ານ ພົນເອກ ມິນ ອ່ອງ ຫຼ່າຍ ຜູ້ບັນຊາການທະຫານສູງສຸດຂອງມຽນມາ ແລະ ຢູ່ໃນຖານະຜູ້ນຳລັດຖະບານທະຫານມຽນມາປັດຈຸບັນ ກ່າວກັບສະຖານີໂທລະພາບຂອງຮົງກົງ ເມື່ອທ້າຍອາທິດທີ່ຜ່ານມາວ່າ ທ່ານ ນາງ ອອງ ຊານ ຊູຈີ ໄດ້ພະຍາຍາມຢ່າງສຸດຄວາມສາມາດແລ້ວ ແຕ່ປະຕິເສດຂະຫຍາຍຄວາມວ່າໝາຍເຖິງເລື່ອງໃດ ແລະ ກ່າວເຖິງຈຳນວນຜູ້ເສຍຊີວິດຈາການສະຖານະການຄວາມຮຸນແຮງທາງການເມືອງຕະຫຼອດໄລຍະເກືອບ 4 ເດືອນຜ່ານມາ ວ່າມີຜູ້ເສຍຊີວິດປະມານ 300 ຄົນ ໜ້ອຍກວ່າຫຼາຍເມື່ອທຽບກັບລາຍງານຂອງສະມາຄົມຊ່ວຍເຫຼືອນັກໂທດການເມືອງ ທີ່ລະບຸວ່າມີຫຼາຍກວ່າ 800 ຄົນ.