ອົງການອະນາໄມໂລກ ຮຽກຮ້ອງປະເທດຮັ່ງມີໃຫ້ຢຸດຄວາມອະຍຸຕິທຳ ທີ່ກັກຕຸນວັກແຊັງໂຄວິດ

ລາຍງານ 25 ພຶດສະພາ 2021, ທ່ານ ເທດຼອສ ແອດນາຮອມ ເກເບຼເຢຊຸສ ຜູ້ອຳນວຍການອົງການອະນາໄມໂລກ (WHO) ຖະແຫຼງເປີດກອງປະຊຸມສະມັດຊາອະນາໄມໂລກ (WHA) ເມື່ອວັນຈັນ 24 ພຶດສະພາ 2021 ທີ່ຜ່ານມາ ວ່າໂລກຍັງຢູ່ໃນພາບທີ່ອັນຕະລາຍ ຈາກສະຖານະການການແຜ່ລະບາດຂອງພະຍາດໂຄວິດ-19 ຮອບໃໝ່, ໂດຍຜ່ານມາຍັງບໍ່ຮອດເຄິ່ງປີ ທົ່ວໂລກຢືນຢັນຕົວເລກຜູ້ຕິດເຊື້ອໃໝ່ລວມກັນຫຼາຍກວ່າສະຖິຕິສະສົມຂອງຜູ້ຕິດເຊື້ອໝົດປີທີ່ຜ່ານມາ.

ພາບ: ກອງປະຊຸມສະມັດຊາອະນາໄມໂລກ (WHA) ວັນຈັນ 24 ພຶດສະພາ 2021.

ຂະນະທີ່ສະຖິຕິຜູ້ເສຍຊີວິດສະສົມຈາກພະຍາດໂຄວິດ-19 ໃນທົ່ວໂລກ ນັບຕັ້ງແຕ່ເຂົ້າສູ່ປີນີ້ ກຳລັງຈະທຳລາຍສະຖິຕິຜູ້ເສຍຊີວິດສະສົມທັງໝົດຂອງປີທີ່ຜ່ານມາ ພາຍໃນໄລຍະເວລາອີກ 3 ອາທິດຕໍ່ໜ້າ, ເຖິງຢ່າງໃດກໍ່ຕາມ ຈາກຈຳນວນວັກແຊັງທີ່ມີການກະຈາຍໃນໂລກ 75% ກະຈຸກລວມຢູ່ໃນພຽງ 10 ປະເທດ, ການທີ່ປະເທດພຽງກຸ່ມດຽວເປັນຜູ້ຊີ້ຊະຕາກຳຂອງປະຊາກອນໂລກທີ່ເຫຼືອ ທີ່ກຳລັງຕໍ່ສູ້ກັບວິກິດດ້ານສາທາລະນະສຸກຄັ້ງນີ້ ຖືເປັນເລື່ອງທີ່ບໍ່ມີຄວາມຍຸຕິທຳ.

ເຖິງແມ່ນວ່າ WHO ຈະສ້າງຕັ້ງໂຄງການ COVAX ຮ່ວມກັບກອງທຶນເພື່ອເດັກນ້ອຍແຫ່ງອົງການສະຫະປະຊາຊາດ (UNICEF) ແລະ ອົງການພັນທະມິດເພື່ອວັກແຊັງ (GAVI) ສາມາດສົ່ງມອບວັກແຊັງລວມ 72 ລ້ານຫຼອດ ໄປຍັງ 125 ປະເທດ ນັບຕັ້ງແຕ່ເດືອນກຸມພາ ທີ່ຜ່ານມາ ແຕ່ຫາກຄິດໄລ່ໃນພາບລວມແລ້ວ ປາກົດວ່າ ກວມເອົາພຽງ 1% ຂອງປະຊາກອນໂລກເທົ່ານັ້ນ.

ດ້ວຍເຫດນີ້, ທ່ານ ເທດຼອສ ແອດນາຮອມ ເກເບຼເຢຊຸສ ຈຶ່ງຮຽກຮ້ອງອີກຄັ້ງ ເຖິງກຸ່ມປະເທດທີ່ຮັ່ງມີ ແລະ ກັກຕຸນວັກແຊັງຢູ່ ໃຫ້ມອບວັກແຊັງສ່ວນທີ່ເຫຼືອ ໃຫ້ແກ່ໂຄງການ COVAX, ສ່ວນບໍລິສັດທີ່ຜະລິດວັກແຊັງ ຂໍຄວາມຮ່ວມມືສົ່ງມອບສິນຄ້າຢ່າງໜ້ອຍເຄິ່ງໜຶ່ງຕາມຂໍ້ຕົກລົງພາຍໃນທ້າຍປີນີ້ ເພື່ອເລັ່ງສ້າງພູມຄຸ້ມກັນໝູ່ໃຫ້ແກ່ປະຊາກອນໂລກ, ໂດຍ WHO ກຳນົດເປົ້າໝາຍໃຫ້ທຸກປະເທດສັກວັກແຊັງໃຫ້ປະຊາກອນຂອງຕົນເອງຢ່າງໜ້ອຍ 10% ພາຍໃນເດືອນກັນຍາ 2021 ນີ້ ແລະ ເພີ່ມເປັນ 30​% ພາຍໃນທ້າຍປີດຽວກັນ ເຊິ່ງຫາກຕ້ອງການບັນລຸເປົ້າໝາຍດັ່ງກ່າວ ປະຊາກອນໂລກຕ້ອງສັກວັກແຊັງໃຫ້ໄດ້ເດືອນລະ 250 ລ້ານຄົນ ພາຍໃນໄລຍະເວລາພຽງ 4 ເດືອນຕໍ່ຈາກນີ້.

- Advertisement -
  • ກ່ຽວກັບ
  • WHO