ຄຼິສຕະຈັກມົວໝອງ ພົບສົບເດັກນ້ອຍອິນດຽນແດງເພີ່ມ 215 ຄົນ ໃນໂຮງຮຽນສາສະໜາຢູ່ການາດາ

ເມື່ອວັນທີ 29 ພຶດສະພາ 2021 ທີ່ຜ່ານມາສຳນັກຂ່າວຕ່າງປະເທດລາຍງານວ່າ: ໄດ້ມີການຄົ້ນພົບສົບເດັກນ້ອຍນັກຮຽນ ຂອງໂຮງຮຽນກິນນອນສາສະໜາຄາທໍລິກ ຄຳລູບ ອິນດຽນ ເຣສຊິເດັນໂຕ (Church Catholic Kamloops Residential School) ໃນລັດບຣິຕິສໂຄລຳເບຍ ປະເທດການາດາ ທີ່ປິດກິດຈະການໄປເມື່ອປີ 1978 ຈຳນວນ 215 ຄົນ ໂດຍຖືກຝັງໄວ້ພື້ນດິນບ່ອນທີ່ເຄີຍເປັນໂຮງຮຽນຫຼັງດັ່ງກ່າວ.

ທ່ານ ນາງ ໂຣຊານ ຄາຊິມີ ເຈົ້າໜ້າທີ່ກຸ່ມ Tk’emlups te Secwépemc First Nation ເຊິ່ງເປັນຕົວແທນຂອງຊົນເຜົ່າພື້ນເມືອງ ນັ້ນກໍ່ຄືຊົນເຜົ່າອິນດຽນແດງ ກ່າວວ່າ ໜ່ວຍງານຄົ້ນຫາໄດ້ພົບສົບເດັກນ້ອຍ ຈາກການຊ່ວຍເຫຼືອໂດຍຜູ້ຊ່ຽວຊານການໃຊ້ຣາດາກວດຫາວັດຖຸໃຕ້ດິນ.

ລາຍງານຜົນການສືບສວນສອບສວນ ທີ່ຍາວມາເຖິງ 6 ປີ ລະບຸວ່າ ລະບົບການສຶກສາໃນໂຮງຮຽນກິນນອນຂອງການາດາ ທີ່ບັງຄັບແຍກເດັກນ້ອຍຊົນເຜົ່າພື້ນເມືອງຈາກຄອບຄົວ ມີການ “ຂ້າລ້າງເຜົ່າພັນວັດທະນະທຳ” ເດັກນ້ອຍຖືກທຳຮ້າຍຮ່າງກາຍ, ຂົ່ມຂືນ, ໃຫ້ອົດອາຫານ ແລະ ທາລຸນໃນຮູບແບບອື່ນໆ ມີເດັກນ້ອຍຊົນເຜົ່າອິນດຽນແດງເຂົ້າໂຮງຮຽນກິນນອນນີ້ ທີ່ດຳເນີນການໂດຍຄຼິສຕະຈັກ ໃນນາມຕົວແທນຂອງລັດຖະບານການາດາ ຫຼາຍຮຸ້ນຄົນລວມປະມານ 150,000 ຄົນ ລະຫວ່າງປີ 1840-1990.

ການສືບສວນສອບສວນພົບວ່າ ມີເດັກນ້ອຍເສຍຊີວິດກວ່າ 4,100 ຄົນ, ຂະນະຮຽນຢູ່ໂຮງຮຽນຄຳລູບ ອິນດຽນ ເຣສຊິເດັນໂທ ເຊິ່ງເຄີຍເປັນໂຮງຮຽນກິນນອນຂະໜາດໃຫຍ່ທີ່ສຸດໃນການາດາ ແລະ ສົບເດັກນ້ອຍ 215 ສົບທີ່ຫາກໍ່ຖືກຄົ້ນພົບ ຍັງບໍ່ລວມຢູ່ໃນຈຳນວນດັ່ງກ່າວ ເນື່ອງຈາກບໍ່ມີການລະບຸໃນບັນທຶກ.

ໃນດ້ານຂອງຫົວໜ້າກຸ່ມ Tk’emlups te Secwépemc First Nation ຕົວແທນຊົນເຜົ່າອິນດຽນແດງ ໄດ້ກ່າວເຖິງເລື່ອງນີ້ເມື່ອວັນທີ 27 ພຶດສະພາ ທີ່ຜ່ານມາ ເຊື່ອວ່າຍັງມີສົບເດັກນ້ອຍອີກຈຳນວນຫຼາຍ ທີ່ຍັງບໍ່ພົບ ເນື່ອງຈາກຍັງຄົ້ນຫາບໍ່ທົ່ວເຖິງ ໂດຍທາງກຸ່ມໄດ້ກະກຽມການພິສູດຊາກສົບເດັກນ້ອຍທັງໝົດ ບາງສົບອາຍຸພຽງ 3 ປີເທົ່ານັ້ນ ແລະ ຮຽກຮ້ອງໃຫ້ຄຼິສຕະຈັກ ໂມມັນຄາທໍລິກ ອອກມາຂໍໂທດທີ່ມີສ່ວນຮ່ວມໃນນະໂຍບາຍຂອງການາດາ ໃນຍຸກສະຕະວັດທີ 19 ແລະ 20 ທີ່ພັດພາກເດັກນ້ອຍຊົນເຜົ່າພື້ນເມືອງຈາກອ້ອມກອດຂອງຄອບຄົວ ໄປຢູ່ໂຮງຮຽນກິນນອນພາກບັງຄັບໂດຍລັດ.

ທ່ານ ຈັສຕິນ ທຼູໂດ ນາຍົກລັດຖະມົນຕີການາດາ ລົງຂໍ້ຄວາມໃນ Twitter ເມື່ອວັນສຸກທີ 28 ພຶດສະພາ ທີ່ຜ່ານມາ ພາຍຫຼັງຮັບຊາຍຂ່າວການຄົ້ນພົບສົບເດັກນ້ອຍນັກຮຽນ 215 ຄົນວ່າ ຮູ້ສຶກເສົ້າສະຫຼົດໃຈເປັນຢ່າງຍິ່ງ ສິ່ງທີ່ຄົ້ນພົບຖືເປັນຫຼັກຖານຂອງຄວາມໂຫດຮ້າຍປ່າເຖື່ອນອັນແສນເຈັບປວດ ທີ່ການາດາຕ້ອງມີໜ້າປະຫວັດສາດອັນມົວໝອງ ແລະ ໜ້າອັບອາຍ, ເຊິ່ງນາຍົກລັດຖະມົນຕີການາດາ ເຄີຍສົ່ງໜັງສືເຖິງສົມເດັດພະສັນຕະປາປາຟຣານຊິສ ປະມຸກຄຼິສຕະຈັກນິກາຍໂຣມັນດາທໍລິກ ຂໍໃຫ້ຄຼິສຕະຈັກຂໍໂທດ ຕາມທີ່ຄະນະກຳມາທິການຄົ້ນຫາຄວາມຈິງ ແລະ ຄວາມປອງດອງຊາດຂອງການາດາມີຄວາມເຫັນໃນປີ 2015 ວ່າ ຄຼິສຕະຈັກມີສ່ວນຮ່ວມໃນການຂ້າລ້າງເຜົ່າພັນທາງວັດທະນະທຳ.

ໂດຍໃນປີ 2008 ລັດຖະບານກາດານາກໍ່ໄດ້ອອກຖະແຫຼງການ ກ່າວຂໍໂທດຢ່າງເປັນທາງການ ຕໍ່ຄວາມຜິດພາດໃນລະບົບການສຶກສາຂອງໂຮງຮຽນກິນນອນແຫ່ງລັດ

- Advertisement -