ວັກແຊັງຟາຍເຊີ (Pfizer) ຈາກໂຄງການ COVAX ເຖິງ ສປປ.ລາວ ແລ້ວ 100,620 ຫຼອດ

ອີງຕາມການລາຍງານຂອງອົງການຢູນິເຊັບ, ວັນທີ 2 ມິຖຸນາ 2021 ນີ້, ສປປ.ລາວ ໄດ້ຮັບວັກແຊັງກັນພະຍາດໂຄວິດ-19 ຊຸດ​ໃໝ່ ຈາກໂຄງການການຮ່ວມມືເພື່ອວັກແຊັງກັນພະຍາດໂຄວິດ-19 (COVAX Facility), ເຊິ່ງເປັນການຮ່ວມມືກັນລະຫວ່າງອົງການພັນທະມິດຮ່ວມມືດ້ານນະວັດຕະກໍາເພື່ອຮັບມືກັບພະຍາດລະບາດ (CEPI), ອົງການກາວີ (Gavi), ອົງການຢູນິເຊັບ (UNICEF) ແລະ ອົງການອະນາໄມໂລກ (WHO) ວັກແຊັງກັນພະຍາດໂຄວິດ-19 ຊຸດ​ໃໝ່ນີ້​ເເມ່ນປະກອບມີວັກແຊັງຟາຍເຊີ (Pfizer BioNTech) ຈຳນວນ 100,620 ຫຼອດ.

​ອີງຕາມແຜນປະຕິບັດການສັກ​​ວັກແຊັງກັນພະຍາດໂຄວິດ-19 ແຫ່ງຊາດ ​ທີ່​ລັດຖະບານແຫ່ງ ສປປ.ລາວ ໄດ້ພັດທະນາຂຶ້ນ, ວັກແຊັງຊຸດນີ້ເເມ່ນຈະໄດ້ນຳໃຊ້ເພື່ອທຳການສັກຢາກັນພະຍາດໃຫ້ແກ່ປະຊາກອນຈຳນວນ 50.300 ຄົນ ທີ່ມີອາຍຸ​ 60 ປີຂຶ້ນໄປ ແລະ ເປັນພະຍາດຊໍ້າເຮື້ອ​​. ​ການສັກວັກແຊັງດັ່ງກ່າວນີ້ຈະໄດ້ເລີ່ມຈັດຕັ້ງປະຕິບັດຢູ່ໃນ ນະຄອນຫຼວງ​ວຽງຈັນ ເປັນຕົ້ນ ເເລະ ຈະໄດ້ຖືກຜັນຂະຫຍາຍໄປສູ່​ເຂດທີ່ມີຄວາມສ່ຽງສູງອື່ນໆ ເຊັ່ນ: ແຂວງບໍ່ແກ້ວ, ແຂວງຈຳປາສັກ ແລະ ແຂວງສະຫວັນນະເຂດ.

ດຣ. ສະໜອງ ທອງຊະນະ ຮອງລັດຖະມົນຕີກະຊວງສາທາລະນະສຸກ ກ່າວວ່າ: “ການມາຮອດຂອງ​ວັກແຊັງຟາຍເຊີ ແມ່ນທັນການກັບເປົ້າໝາຍ ທີ່ລັດຖະບານລາວ ໄດ້ວາງໄວ້ໃນການສັກວັກແຊັງກັນພະຍາດໂຄວິດ-19 ເພຶ່ອປົກປ້ອງ 50% ຂອງຈຳນວນປະຊາກອນທັງໝົດໃນປີ 2021. ວັກແຊັງເຫລົ່ານີ້ຈະຊ່ວຍໃຫ້ພວກເຮົາສາມາດກ້າວໄປສູ່ການບັນລຸເປົ້າໝາຍດັ່ງກ່າວ. ຂ້າພະເຈົ້າຍັງຂໍເນັ້ນຕື່ມອີກວ່າ ເຖິງເເມ່ນວ່າວັກແຊັງຈະຊ່ວຍໃຫ້ບັນດາປະເທດຕ່າງໆຄວບຄຸມພະຍາດໂຄວິດ-19, ພວກເຮົາກໍ່ຍັງຕ້ອງສືບຕໍ່ປະຕິບັດການຮັກສາໄລຍະຫ່າງທາງ​ສັງຄົມ,ໃສ່ໜ້າກາກອະນາໄມ ເເລະ ໝັ່ນລ້າງມືຂອງຕົນ​ເປັນປະຈຳ, ເຖິງແມ່ນວ່າທ່ານໄດ້ສັກຢາວັກແຊັງກັນພະຍາດໂຄວິດ-19 ຄົບ 2 ເຂັມແລ້ວກໍ່ຕາມ.​”

ວັກແຊັງກັນພະຍາດໂຄວິດ-19 ທີ່ນຳໃຊ້ໃນ ສປປ.ລາວ ເເມ່ນໄດ້ຜ່ານຂັ້ນຕອນການທົດສອບດ້ານການພັດທະນາ ແລະ ຄວາມປອດໄພຢ່າງເຂັ້ມງວດ​ ເເລະ ກົມອາຫານ ແລະ ຢາ ຂອງກະຊວງສາທາລະນະສຸກ ໄດ້ເຮັດການປະເມີນຫຼັກຖານ, ຜົນປະໂຫຍດ ແລະ ຄວາມສ່ຽງແລ້ວ. ວັກແຊັງຟາຍເຊີ ໄດ້ຖືກອະນຸມັດເຂົ້າໃນລາຍຊື່ການນຳໃຊ້ສຸກເສີນຂອງ ອົງການອະນາໄມໂລກ ໃນວັນທີ 31 ເດືອນທັນວາ ປີ 2020.

ທ່ານ ດຣ. ມາກ ຈາກອບສ໌​ ຜູ້ຕາງໜ້າອົງການອະນາໄມໂລກ ປະຈຳ ສປປ.ລາວ ກ່າວວ່າ: “ພວກເຮົາຍິນດີຕ້ອນຮັບດ້ວຍ​ຄວາມປຶ້ມປິຕິ ​ວັກແຊັງຟາຍເຊີ ຊຸດນີ້ຈາກໂຄງການ COVAX Facility. ໃນປັດຈຸບັນນີ້, ຢາວັກແຊັງກັນພະຍາດໂຄວິດ-19 ທັງ 3 ຊະນິດ ທີ່ໄດ້​ນຳໃຊ້ໃນ ສປປ.ລາວ ລ້ວນແຕ່ຖືກອະນຸມັດເຂົ້າໃນລາຍຊື່ການນຳໃຊ້ສຸກເສີນຂອງອົງການອະນາໄມໂລກແລ້ວ ເເລະ ຮັບປະກັນເຖິງຄຸນນະພາບ, ຄວາມປອດໄພ, ແລະ ປະສິດທິຜົນ ຂອງວັກຊິນເຫຼົ່ານີ້. ຂ້າພະເຈົ້າຂໍຖືໂອກາດນີ້ສະເເດງຄວາມຊົມເຊີຍຕໍ່ລັດຖະບານລາວ ໃນການເສີມສ້າງຂີດ​ຄວາມສາມາດໃນການຮອງຮັບວັກແຊັງຟາຍເຊີ ເຊິ່ງເປັນວັກແຊັງທີ່ຕ້ອງການ ການເກັບຮັກສາເປັນພິເສດເພື່ອຮັກສາປະສິດທິພາບຂອງວັກແຊັງ.”

Photo: UNICEF Laos

ວັກແຊັງຟາຍເຊີ ເປັນວັກແຊັງທີ່ຕ້ອງການການເກັບຮັກສາໃນ​ອຸນຫະພູມ​ເຢັນເຖິງ -70 ອົງສາເຊ ເພື່ອຮັກສາປະສິດທິພາບຂອງວັກແຊັງ ​ແລະ ດັ່ງນັ້ນຈຶ່ງຕ້ອງການໃຫ້ມີລະບົບຄວາມເຢັນພິເສດ​ (Ultra-Cold Chain). ໃນປັດຈຸບັນນີ້, ສະຖາບັນປັດສະເຕີ (Institut Pasteur du Laos) ໄດ້ຈັດກຽມ​ຕູ້​ແຊ່ແຂງພິເສດ 2 ​ໜ່ວຍໃໝ່​ໄວ້ສະເພາະ​ສຳລັບ​ຢາວັກແຊັງກັນພະຍາດໂຄວິດ-19 ເຊິ່ງ​ສາມາດເກັບຮັກສາວັກແຊັງຟາຍເຊີໄດ້ເຖິງ 740,000 ຫຼອດ.

ຍິ່ງໄປກ່ວານັ້ນ, ສູນວິເຄາະ-​ລະບາດວິທະຍາ​​ແຫ່ງຊາດ (National Centre Laboratory Epidemiology) ຍັງໄດ້ຈັດກຽມ​ຕູ້​ແຊ່ແຂງພິເສດ​ 1 ໜ່ວຍ ເຊິ່ງ​ສາມາດເກັບຮັກສາວັກແຊັງຟາຍເຊີ ໄດ້ເຖິງ 300,000 ຫຼອດ. ອົງການອະນາໄມໂລກ ໄດ້ຈັດຊື້​ຕູ້​ແຊ່ແຂງພິເສດ​ຕື່ມອີກ 3 ໜ່ວຍ ເຊິ່ງສາມາດເກັບຮັກສາວັກແຊັງໄດ້ປະມານ 360,000 ຫຼອດ ເພື່ອ​ນໍາໃຊ້ທັງໃນນະຄອນຫຼວງວຽງຈັນ ແລະ ​ແຂວງອື່ນໆ. ຕູ້​ແຊ່ແຂງພິເສດ ຈາກອົງການອະນາໄມໂລກ ເເມ່ນຢັງຈະຊ່ວຍປະກອບສ່ວນເພີ່ມເຂົ້າ​ໃສ່​ຕູ້ເຢັນອີກຈຳນວນ​ 157 ໜ່ວຍ​ ຈາກອົງການຢູນິເຊັບ ແລະ ອີກ 20 ໜ່ວຍ ທີ່ອົງການອະນາໄມໂລກ ໄດ້ໃຫ້ແກ່ ສປປ.ລາວ ເເລ້ວ ເພື່ອເສີມສ້າງຄວາມ​ສາມາດດ້ານລະບົບຄວາມເຢັນ​ພິເສດ​ເພື່ອຮອງຮັບວັກແຊັງ.

ທ່ານນາງບີອາເຕ ດາສເຕລ໌​ ວ່າການແທນ​ຜູ້ຕາງໜ້າອົງການຢູນິເຊັບ​ ກ່າວວ່າ: “ການມາຮອດຂອງ​ວັກແຊັງຄັ້ງຫຼ້າສຸດນີ້ ເປັນຫຼັກໝາຍອັນ​ສຳຄັນໜຶ່ງອີກ​ໃນການຕອບໂຕ້​ຕໍ່ການລະບາດຂອງພະຍາດໂຄວິດ-19 ໃນ ສປປ.ລາວ ແລະ ເປັນບາດກ້າວໜຶ່ງຕໍ່ການຮັບປະກັນການເຂົ້າເຖິງວັກແຊັງກັນ​ພະຍາດໂຄວິດ-19 ​ແບບເທົ່າທຽມ​ ແລະ ແບບທ່ຽງທໍາໃນ​ທົ່ວໂລກ. ​ຂ້າພະເຈົ້າກໍ່ຂໍສະແດງຄວາມຊົມເຊີຍຕໍ່​ລັດຖະບານແຫ່ງ ສປປ.ລາວ ໃນການຕອບຮັບ​ແກ້ໄຂບັນດາກໍລະນີໂຄວິດ-19 ໃໝ່ ໃນ​​ປະເທດຢ່າງ​ມີປະສິດຕິຜົນ ແລະ ໃນການດຳເນີນ​​ການສັກ​ວັກແຊັງຢ່າງວ່ອງ​ໄວ ເພື່ອປົກປ້ອງປະຊາຊົນລາວ. ອົງການຢູນິເຊັບ ແລະ ຄູ່ຮ່ວມງານຂອງພວກເຮົາຈະສືບຕໍ່ເຮັດວຽກຮ່ວມມືກັນຢ່າງໃກ້ຊິດ ເພື່ອສະໜັບສະໜູນລັດຖະບານແຫ່ງ ສປປ.ລາວ ໃນການຕອບໂຕ້ຕໍ່ການ​ລະບາດຂອງພະຍາດໂຄວິດ-19 ໃນປະເທດ, ລວມເຖິງການຈັດຊື້​ວັກແຊັງ.​”

Photo: UNICEF Laos

ນອກ​ຈາກ​ວັກແຊັງແລ້ວ​, ໃນວັນທີ 6 ເດຶອນມິຖຸນາ, ສປປ.ລາວ ຍັງຈະໄດ້ຮັບການສະໜອງເຂັມສັກຢາຈຳນວນ 100,700 ເຂັມ​ ແລະ ກ່ອງສໍາລັບຂີ້ເຫຍື້ອບໍ່ອະເຊື້ອ 1,175 ກ່ອງ ຕື່ມອີກ ເຊິ່ງແມ່ນ​ອົງການຢູນິເຊັບໄດ້ຈັດຊື້ໃຫ້​.

ການຂົນສົ່ງ​ວັກແຊັງຊຸດທຳອິດທີ່ໄດ້ຮັບການສະໜັບສະໜູນຈາກໂຄງການ COVAX Facility ປະກອບມີ​ວັກແຊັງ AstraZeneca/Oxford ຈຳນວນ 132,000 ຫຼອດ ເຊິ່ງໄດ້ມາຮອດປະເທດລາວແລ້ວ ໃນວັນທີ 20 ເດືອນມີນາ ທີ່ຜ່ານມານີ້. ດັ່ງນັ້ນ ວັກແຊັງຊູຸດຫຼ້າສຸດນີ້ແມ່ນຈະເປັນ ວັກແຊັງຊຸດທີ່ສອງທີ່ໄດ້ຮັບການສະໜັບສະໜູນຈາກໂຄງການ COVAX Facility ໃນ ສປປ.ລາວ ເເລະ ຄາດວ່າຈະໄດ້ຮັບວັກແຊັງເພີ່ມອີກພາຍໃນທ້າຍປີນີ້.

ໂຄງການວັກແຊັງໂຄວິດ-19 ແມ່ນນຳພາໂດຍ ອົງການກາວີ (Gavi), ອົງການພັນທະມິດຮ່ວມມືດ້ານນະວັດຕະກໍາເພື່ອຮັບມືກັບພະຍາດລະບາດ (CEPI), ອົງການອະນາໄມໂລກ (WHO) ແລະ ເຮັດວຽກຮ່ວມມືກັບ ອົງການຢູນິເຊັບ (UNICEF) ລວມທັງທະນາຄານໂລກ, ອົງການຈັດຕັ້ງທາງສັງຄົມ, ຜູ້ຜະລິດ ແລະ ອື່ນໆ. ໂຄງການ COVAX ແມ່ນສ່ວນໜຶ່ງຂອງແຜນງານການເຂົ້າເຖິງເຄື່ອງມືໂຄວິດ-19 ACT ຫຼື Access to COVID-19 Tools Accelerator ເຊິ່ງເປັນການຮ່ວມມືລະດັບໂລກເພື່ອເລັ່ງການພັດທະນາ, ການຜະລິດ ແລະ ການເຂົ້າເຖິງການທົດສອບ, ການຮັກສາ ແລະ ການສັກວັກແຊັງທີ່ມີຄວາມສະເໝີພາບ.

ບັນດາປະເທດສະມາຊິກຄະນະກຳມະການຂອງອົງການກາວີ ທີ່ປະຈຳຢູ່ ສປປ.ລາວ ມີດັ່ງນີ້: ອົດສະຕຣາລີ, ການາດາ, ສະຫະພາບເອີຣົບ, ຝຣັ່ງເສດ, ເຢຍລະມັນ, ຍີ່ປຸ່ນ, ເກົາຫຼີໃຕ້, ລູກຊຳບວກ, ສະວິດເຊີແລນ, ອັງກິດ ແລະ ສ.ອາເມຣິກາ.

- Advertisement -