ມາເລເຊຍສົ່ງຍົນຂັບໄລ່ບິນຂຶ້ນສະກັດຝູງຍົນຮົບຂອງຈີນ 16 ລຳທີ່ບິນລ່ວງນ່ານຟ້າເຂດຂັດແຍ່ງ

ລາຍງານ 2 ມິຖຸນາ 2021, ທ່ານ ຮິຊາມມຸດດິນ ຮຸສເຊັນ ລັດຖະມົນຕີກະຊວງການຕ່າງປະເທດມາເລເຊຍກ່າວວ່າ ໄດ້ມີການສົ່ງໜັງສືຢ່າງເປັນທາງການໄປຍັງສະຖານເອກອັກຄະລັດຖະທູດຈີນ ປະຈຳນະຄອນຫຼວງກົວລາລຳເປີ ເພື່ອຂໍຄຳຊີ້ແຈງຢ່າງເປັນທາງການ ຈາກລັດຖະບານຈີນ ກໍລະນີກິດຈະກຳທາງການທະຫານທີ່ໜ້າສົງໄສ ຂອງກອງທັບປົດປ່ອຍປະຊາຊົນຈີນ ໃນທະເລຈີນໃຕ້ ເຊິ່ງຖືເປັນໄພຮຸກຮານຮ້າຍແຮງຕໍ່ອະທິປະໄຕຂອງຊາດ ແລະ ຄວາມປອດໄພດ້ານການເດີນອາກາດ.

ການເຄື່ອນໄຫວດັ່ງກ່າວຂອງລັດຖະບານມາເລເຊຍ ເກີດຂຶຶ້ນຫຼັງຈາກທີ່ກອງທັບອາກາດມາເລເຊຍລາຍງານ ເມື່ອວັນອັງຄານ 1 ມິຖຸນາ ທີ່ຜ່ານມາ ກວດພົບຍານພາຫະນະທາງອາກາດ 16 ລຳຂອງກອງທັບປົດປ່ອຍປະຊາຊົນຈີນ ມີທັງຍົນຂັບໄລ່ ແລະ ຍົນລຳລຽງ ບິນເຂົ້າມາເຮັດກິດຈະກຳທາງທະຫານທີ່ໜ້າສົງໄສ ໃນເຂດນ່ານຟ້າຂອງມາເລເຊຍ ບໍລິເວນລັດຊາຣາວັກ ເກາະບໍນຽວ ເຊິ່ງເປັນນ່ານນ້ຳທີ່ມີການອ້າງກຳມະສິດທັບຊ້ອນລະຫວ່າງຈີນ ກັບ ມາເລເຊຍ ໂດຍຍົນບິນລຽງຕົວກັນເປັນແຖວ ຫ່າງກັນລຳລະປະມານ 60 ໄມທະເລ.

ກອງທັບມາເລເຊຍພະຍາຍາມຕິດຕໍ່ໄປຍັງຝູງຍົນດັ່ງກ່າວຂອງຈີນຫຼາຍຄັ້ງ ທັນທີທີ່ລະບົບຣາດາກວດພົບການເຄື່ອນໄຫວຜິດປົກກະຕິ ແຕ່ບໍ່ໄດ້ຮັບການຕອບສະໜອງ ຈຶ່ງຈຳເປັນຕ້ອງສົ່ງຝູງຍົນຮົບຂັບໄລ່ບິນຂຶ້ນສະກັດ ກ່ອນທີ່ຝູງຍົນຂອງຈີນຈະຫັນຫົວກັບອອກໄປ.

ຂະນະທີ່ສະຖານເອກອັກຄະລັດຖະທູດຈີນ ປະຈຳນະຄອນຫຼວງກົວລາລຳເປີອອກຖະແຫຼງການວ່າ ເຫດການດັ່ງກ່າວເປັນການເຝິກຊ້ອມຕາມກຳນົດການ ແລະ ເປັນການປະຕິບັດຕາມກົດໝາຍລະຫວ່າງປະເທດທຸກປະການ ໂດຍບໍ່ໄດ້ລະເມີດນ່ານຟ້າອະທິປະໄຕຂອງປະເທດໃດ ພ້ອມທັງຢືນຢັນວ່າ ຈີນ ແລະ ມາເລເຊຍເປັນພັນທະມິດທີ່ດີຕໍ່ກັນ ແລະ ມີການປຶກສາຫາລືຢ່າງເປັນມິດ ເພື່ອຮ່ວມກັນຮັກສາສະຖຽນລະພາບ ແລະ ຄວາມໝັ້ນຄົງໄລຍະຍາວໃນພູມມິພາກ.

- Advertisement -