ສ.ອາເມຣິກາ ເປັນຫ່ວງເລື່ອງຈີນສ້າງຖານທັບໃນ ກຳປູເຈຍ, ຮຽກຮ້ອງໃຫ້ຮັກສາດຸນອຳນາດ

ລາຍງານ 2 ມິຖຸນາ 2021, ກະຊວງການຕ່າງປະເທດ ສ.ອາເມຣິກາ ອອກຖະແຫຼງການວ່າ ທ່ານ ນາງ ເວນດີ ເຊີແມນ ຮອງລັດຖະມົນຕີກະຊວງການຕ່າງປະເທດ ສ.ອາເມຣິກາ ເຂົ້າພົບສົມເດັດ ຮຸນ ເຊນ ນາຍົກລັດຖະມົນຕີກຳປູເຈຍ ທີ່ນະຄອນຫຼວງພະຍົມເປນ ເມື່ອວັນອັງຄານ 1 ມິຖຸນາ ທີ່ຜ່ານມາ ໂດຍທ່ານ ນາງ ເວນດີ ເຊີແມນກ່າວໃນຕອນໜຶ່ງວ່າ ລັດຖະບານ ສ.ອາເມຣິກາ ມີຄວາມຫວັງວວ່າ ລັດຖະບານກຳປູເຈຍຈະສາມາດຮັກສາສົມດຸນ ແລະ ຄວາມເປັນອິດສະຫຼະດ້ານການດຳເນີນນະໂຍບາຍຕ່າງປະເທດ ເພື່ອຜົນປະໂຫຍດສູງສຸດຂອງປະຊາຊົນກຳປູເຈຍ.

ເຖິງແມ່ນວ່າທ່ານ ນາງ ເວນດີ ເຊີແມນບໍ່ໄດ້ກ່າວພາດພິງເຖິງປະເທດໃດຢ່າງຊັດເຈນ, ແຕ່ເນື້ອໃນຖະແຫຼງການຂອງກະຊວງການຕ່າງປະເທດ ສ.ອາເມຣິກາ ລະບຸວ່າ ລັດຖະບານ ສ.ອາເມຣິກາມີຫຼັກຖານຊັດເຈນ ວ່າຈີນຍັງເດີນໜ້າໂຄງການກໍ່ສ້າງທາງທະຫານ ທີ່ເມືອງຣຽມ ໃນແຂວງພະສີຫະນຸ ຫຼື ສີຫະນຸວິວ ແຄມຝັ່ງອ່າວໄທ ແລະ ຍິ່ງໄປກວ່ານັ້ນ ອານາເຂດຂອງໂຄງການອາດຄວບຄຸມບໍລິເວນທີ່ຖືເປັນເຂດເສດຖະກິດສະເພາະຂອງກຳປູເຈຍອີກດ້ວຍ.

ຂະນະດຽວກັນ, ທ່ານ ນາງ ເວນດີ ເຊີແມນ ຮຽກຮ້ອງໃຫ້ກຳປູເຈຍ ຊີ້ແຈງດ້ວຍເຫດຜົນ ຕໍ່ກັບການມ້າງສິ່ງກໍ່ສ້າງທີ່ ສ.ອາເມຣິກາສ້າງໄວ້ໃຫ້ແກ່ກຳປູເຈຍ ພາຍໃນຖານທັບເຮືອຣຽມ ເຊິ່ງເປັນຖານທັບເຮືອຂະໜາດໃຫຍ່ທີ່ສຸດຂອງປະເທດ ເນື່ອງຈາກບໍ່ພຽງແຕ່ອາດມີຜົນຕໍ່ສາຍພົວພັນສອງຝ່າຍ ແຕ່ອາດມີຜົນຕໍ່ສະຖຽນລະພາບດ້ານຄວາມໝັ້ນຄົງໃນລະດັບພູມມິພາກເຊັ່ນກັນ.

ຕໍ່ມາທ່ານ ເຟີຍ ສີຟັນ ໂຄສົກລັດຖະບານກຳປູເຈຍ ກ່າວເຖິງຈຸດຢືນຂອງລັດຖະບານ ສ.ອາເມຣິກາວ່າ ມີຫຼາຍບັນຫາທີ່ ສ.ອາເມຣິກາຍັງບໍ່ເຂົ້າໃຈກຳປູເຈຍ ແລະ ຍັງມີຫຼາຍບັນຫາທີ່ກຳປູເຈຍບໍ່ເຂົ້າໃຈເຈດຕະນາຂອງ ສ.ອາເມຣິກາ ແຕ່ບໍ່ໄດ້ອະທິບາຍເພີ່ມເຕີມ, ດ້ານກະຊວງການຕ່າງປະເທດຈີນຍັງບໍ່ການໂຕ້ຕອບຢ່າງເປັນທາງການ.

ເຊິ່ງກະຊວງປ້ອງກັນປະເທດ ສ.ອາເມຣິກາ ໄດ້ເຜີຍແຜ່ບົດລາຍງານຄວາມຍາວ 200 ໜ້າ ເມື່ອເດືອນກັນຍາ ປີທີ່ຜ່ານມາ ເລື່ອງການພັດທະນາທາງທະຫານ ແລະ ຄວາມໝັ້ນຄົງທີ່ກ່ຽວຂ້ອງກັບ ສປ.ຈີນ 2020 ມີເນື້ອໃນຕອນໜຶ່ງລະບຸວ່າ ມີຄວາມເປັນໄປໄດ້ສູງ ວ່າຈີນກຳລັງພິຈາລະນາມຽນມາ, ໄທ, ສິງກະໂປ, ອິນໂດເນເຊຍ, ປາກິດສະຖານ, ສີລັງກາ ແລະ ອີກຫຼາຍປະເທດໃນພູມມິພາກອາຊີກາງ ແລະ ທະວີບອາຟຣິກາ ເພື່ອເປັນທີ່ຕັ້ງຂອງຖານປະຕິບັດການດ້ານໂລຈິສຕິກທາງທະຫານໃຫ້ຄວບຄຸມມະຫາສະໝຸດອິນເດຍ.

- Advertisement -