ທົ່ວໂລກມີການສັກວັກແຊັງຕ້ານໂຄວິດ-19 ແລ້ວຫຼາຍກວ່າ 2,100 ລ້ານເຂັມ ໃນ 215 ປະເທດ

ໃນທົ່ວໂລກ ໄດ້ມີການສັກແວັກແຊັງຕ້ານພະຍາດໂຄວິດ-19 ໄປແລ້ວກວ່າ 2,100 ລ້ານເຂັມ ເຊິ່ງສ່ວນໃຫຍ່ແມ່ນຢູ່ ສປ.ຈີນ, ສ.ອາເມຣິກາ ແລະ ອິນເດຍ, ສຳລັບວັກແຊັງທີ່ມີການນຳໃຊ້ໃນຫຼາຍປະເທດທີ່ສຸດຄືແອັດຕຣາເຊເນກາ ໃນ 170 ປະເທດ, ສ່ວນຊິໂນຟາມ ແລະ ຊິໂນແວັກ ລວມທັງສະປຸດນິກ-ວີ ຖືກໃຊ້ຫຼາຍທີ່ສຸດໃນປະເທດກຳລັງພັດທະນາ.

ລາຍງານ 4 ມິຖຸນາ 2021, ສຳນັກຂ່າວ AFP ລາຍງານວ່າ: ທົ່ວໂລກໄດ້ສັກວັກແຊັງຕ້ານພະຍາດໂຄວິດ-19 ແລ້ວ 2,109,969,022 ເຂັມ ໃນ 215 ປະເທດທົ່ວໂລກ ແລະ ດິນແດນ ຕົວເລກເມື່ອເວລາ 09:15 ໂມງ ວັນທີ 3 ມິຖຸນາ 2021 ຕາມເວລາມາດຕະຖານກຣີນິສ (GMT) ພາຍຫຼັງທີ່ມີການສັກວັກແຊັງຕ້ານພະຍາດໂຄວິດ-19 ເລີ່ມຂຶ້ນຄັ້ງທຳອິດໃນໂລກ ເມື່ອ 6 ເດືອນກ່ອນ.

ສະເພາະ ສ.ອາເມຣິກາ ແລະ ຈີນ ສອງປະເທດນີ້ສັກວັກແຊັງໃຫ້ແກ່ປະຊາຊົນຂອງປະເທດຕົນເອງລວມກັນແລ້ວປະມານ 1,000 ລ້ານເຂັມ ຫຼື ເຄິ່ງໜຶ່ງຂອງວັກແຊັງຕ້ານພະຍາດໂຄວິດ-19 ທີ່ສັກໃຫ້ແກ່ຄົນທັງໂລກ, ໂດຍຫາກນັບເປັນຈຳນວນເຂັມ ຈີນສີດວັກແຊັງຕ້ານພະຍາດໂຄວິດ-19 ຫຼາຍທີ່ສຸດຄື: 704.8 ລ້ານເຂັມ ຮອງລົງມາຄື ສ.ອາເມຣິກາ 296.9 ລ້ານເຂັມ ແລະ ອັນດັບ 3 ຄືອິນເດຍ 221 ລ້ານເຂັມ ແລະ 60% ຂອງວັກແຊັງທັງໝົດກວ່າ 2,000 ລ້ານເຂັມທີ່ສັກໄປແລ້ວທົ່ວໂລກນັ້ນ ກະຈຸກຕົວຢູ່ໃນ 3 ປະເທດນີ້ ເຊິ່ງເປັນ 3 ປະເທດທີ່ມີປະຊາກອນຫຼາຍທີ່ສຸດໃນໂລກ.

ສ່ວນ ອິດສະຣາແອນ ເປັນປະເທດທີ່ສັກວັກແຊັງກວມເອົາປະຊາກອນຫຼາຍທີ່ສຸດ ແລະ ໄວທີ່ສຸດ, ຫຼັງຈາກນຳໜ້າທຸກປະເທດມາຕັ້ງແຕ່ເລີ່ມຕົ້ນ ຂະນະນີ້ ເກືອບ 60% ຂອງປະຊາກອນຜູ້ໃຫຍ່ໃນອິດສະຣາແອນ ໄດ້ສັກວັກແຊັງເຂັມທີ 2 ແລ້ວ ແລະ ກຳລັງຈະເລີ່ມຕົ້ນສັກວັກແຊັງໃນເດັກນ້ອຍອາຍຸ 12-15 ປີ.

ສ່ວນອັນດັບ 2 ເຖິງ 5 ປະເທດທີ່ສັກວັກແຊັງກວມເອົາປະຊາກອນຫຼາຍທີ່ສຸດຄື: ການາດາ 59% ຂອງປະຊາກອນໄດ້ສັກວັກແຊັງເຂັມທີ່ໜຶ່ງແລ້ວ, ອັນດັບ 3 ປະເທດອັງກິດ ສັກວັກແຊັງໃຫ້ປະຊາຊົນໄປແລ້ວ 58.3%, ອັນດັບ 4 ຊີເລ ປະຊາກອນ 56.6% ໄດ້ສັກວັກແຊັງ ແລະ ອັນດັບ 5 ຄື ສ.ອາເມຣິກາ ປະຊາກອນ 51% ໄດ້ສັກວັກແຊັງແລ້ວ.

ຄວາມຄືບໜ້າຫຼ້າສຸດ ສຳລັບການສັກວັກແຊັງຕ້ານພະຍາດໂຄວິດ-19 ໃນສະຫະພາບເອີຣົບ ຫຼື EU ໂດຍຖານຂໍ້ມູນຂອງສຳນັກຂ່າວ AFP ລະບຸວ່າ ເກືອບ 40% ຂອງປະຊາກອນປະເທດສະມາຊິກ EU ສັກວັກແຊັງເຂັມທີ່ໜຶ່ງແລ້ວ, ໂດຍເຢຍລະມັນເປັນຜູ້ນຳການສັກວັກແຊັງຂອງ EU ອັດຕາການສັກກວມເອົາ 43.6% ຂອງປະຊາກອນ, ຮອງລົງມາຄື ອິຕາລີ 43.6% ຂອງປະຊາກອນ, ອັນດັບ 3 ຝຣັ່ງ 40% ຂອງປະຊາກອນ ແລະ ອັນດັບ 4 ແອັດສະປາຍ 39.4% ຂອງປະຊາກອນ.

ເຖິງຢ່າງໃດກໍ່ຕາມ ທົ່ວໂລກມີພຽງ 6 ປະເທດທີ່ຍັງບໍ່ໄດ້ເລີ່ມສັກວັກແຊັງຕ້ານພະຍາດໂຄວິດ-19 ຄື: ເກົາຫຼີເໜືອ, ໄຮຕິ, ຕັງຊານີ, ຊາດ, ບູຣູນດີ ແລະ ອິຣິເຕຼຍ.

ແອັສຕຣາເຊເນກາ (Oxford/AstraZeneca) ເປັນວັກແຊັງຕ້ານໂຄວິດທີ່ຖືກນຳໃຊ້ຢ່າງກວ້າງຂວາງທີ່ສຸດໃນໂລກ ກວມເອົາ 170 ຈາກ 215 ປະເທດທົ່ວໂລກ ທີ່ມີການສັກວັກແຊັງໃຫ້ປະຊາຊົນ, ຮອງລົງມາຄືຟາຍເຊີ (Pfizer/BioNTech) ຖືກໃຊ້ໃນ 97 ປະເທດ, ສ່ວນອັນດັບ 3 ຄືໂມເດີນາ (Moderna) ຖືກໃຊ້ໃນ 46 ປະເທດ, ອັນດັບ 4 ຄືຊິໂນຟາມ (Sinopharm) ຖືກໃຊ້ໃນ 45 ປະເທດ, ອັນດັບ 5 ຄືສະປຸດນິກ-ວີ (Sputnik-V) ຖືກໃຊ້ໃນ 40 ປະເທດ ແລະ ສຸດທ້າຍຄືຈອນຊັນ ແອນ ຈອນຊັນ (Johnson & Johnson) ຖືກໃຊ້ໃນ 29 ປະເທດ.

ສ່ວນວັກແຊັງຈາກ ສປ.ຈີນ 2 ຢ່າງຄື: ຊິໂນຟາມ (Sinopharm) ແລະ ຊິໂນແວັກ (Sinovac) ລວມໄປເຖິງສະປຸດນິກ-ວີ (Sputnik-V) ຂອງລັດເຊຍ ຖືກໃຊ້ຫຼາຍທີ່ສຸດໃນປະເທດກຳລັງພັດທະນາ ຫຼື ປະເທດເກີດໃໝ່ທາງເສດຖະກິດ.

ເຊິ່ງວັກແຊັງແອັດຕຣາເຊເນກາ (AstraZeneca) ເປັນວັກແຊັງຕ້ານພະຍາດໂຄວິດ-19 ຫຼັກໃນໂຄງການໂຄແວັກ (COVAX) ທີ່ແຈກຢາຍວັກແຊັງໄປຍັງປະເທດທຸກຍາກ, ສ່ວນວັກແຊັງຟາຍເຊີ (Pfizer) ແລະ ໂມເດີນາ (Moderna) ທີ່ເກັບຮັກສາໄດ້ຍາກກວ່າ ນິຍົມໃຊ້ໃນປະເທດພັດທະນາແລ້ວ.