ລັດເຊຍຖອນຕົວຈາກ “ສົນທິສັນຍາເປີດນ່ານຟ້າ” ຕອບໂຕ້ ສ.ອາເມຣິກາ ທີ່ຖອນຕົວອອກກ່ອນ

ລາຍງານ 7 ມິຖຸນາ 2021, ທຳນຽບເຄຣມລິນອອກຖະແຫຼງການວ່າ ທ່ານ ວະລາດິເມຍ ປູຕິນ ປະທານປະເທດລັດເຊຍ ໄດ້ລົງນາມໃນກົດໝາຍວ່າດ້ວຍການຖອນຕົວອອກຈາກການເປັນພາຄີ ສົນທິສັນຍາວ່າດ້ວຍການເປີດນ່ານຟ້າ ໂດຍກົດໝາຍຈະມີຜົນບັງຄັບໃຊ້ຢ່າງເປັນທາງການໃນອີກ 6 ເດືອນຕໍ່ໜ້າ ນັບຕັ້ງແຕ່ມື້ລົງລາຍເຊັນ ຄືວັນຈັນທີ 7 ມິຖຸນາ 2021.

ການເຄື່ອນໄຫວດັ່ງກ່າວຂອງລັດເຊຍເກີດຂຶ້ນ ຫຼັງຈາກທີ່ທ່ານ ປູຕິນ ຍື່ນຄຳຮ້ອງຕໍ່ສະພາ ເມື່ອວັນທີ 11 ພຶດສະພາ ທີ່ຜ່ານມາ ເພື່ອຂໍໃຫ້ມີການພິຈາລະນາອະນຸມັດການຖອນລັດເຊຍອອກຈາກການຮ່ວມມືດັ່ງກ່າວນີ້ ເຊິ່ງສະພາຜູ້ແທນປະຊາຊົນ ຫຼື ສະພາລ່າງອະນຸມັດກ່ອນ ຕາມດ້ວຍສະພາສູງມີມະຕິຮັບຮອງອີກຄັ້ງ.

ຂະນະທີ່ ສ.ອາເມຣິກາ ຖອນຕົວອອກຈາກການຮ່ວມສົນທິສັນຍາສະບັບດຽວກັນນີ້ ເມື່ອເດືອນພະຈິກ 2020 ດຳເນີນການໂດຍລັດຖະບານພາຍໃຕ້ການນຳຂອງທ່ານ ໂດໂນ ທຣຳ ແລະ ກະຊວງການຕ່າງປະເທດ ສ.ອາເມຣິກາສະໄໝປັດຈຸບັນ ພາຍໃຕ້ການນຳຂອງທ່ານ ປະທານປະເທດ ໂຈ ໄບເດັນ ແຈ້ງມາຍັງລັດຖະບານລັດເຊຍ ເມື່ອເດືອນທີ່ຜ່ານມາ ວ່າລັດຖະບານ ສ.ອາເມຣິກາ ບໍ່ຕ້ອງການກັບເຂົ້າສູ່ກອບການຮ່ວມມືດັ່ງກ່າວນີ້ອີກ ເນື່ອງຈາກລັດເຊຍເປັນຜູ້ຫຼຸດຄວາມໜ້າເຊື່ອຖືຂອງຂໍ້ຕົກລົງນີ້.

ດ້ານທຳນຽບເຄຣມລິນຕອບໂຕ້ວ່າ ຄວາມເຫັນຂອງ ສ.ອາເມຣິກາ ເປັນສິ່ງທີ່ໜ້າຜິດຫວັງ ແຕ່ກໍ່ບໍ່ເກີນຄວາມຄາດໝາຍ, ເຊິ່ງນີ້ໄດ້ສ້າງຄວາມເຄັ່ງຕຶງໃຫ້ກັບບັນຍາກາດກ່ອນການພົບປະຢ່າງເປັນທາງການຄັ້ງທຳອິດ ລະຫວ່າງທ່ານ ໂຈ ໄບເດັນ ກັບ ທ່ານ ປູຕິນ ທີ່ເມືອງເຈນີວາ ສະວິດເຊີແລນ ໃນວັນທີ 16 ມິຖຸນາ 2021 ທີ່ຈະມາເຖິງນີ້.

ການຖອນຕົວຂອງ ສ.ອາເມຣິກາ ແລະ ລັດເຊຍ ໄດ້ເຮັດໃຫ້ສົນທິສັນຍາເປີດນ່ານຟ້າເຫຼືອສະມາຊິກ 33 ປະເທດ ໂດຍການຮ່ວມມືນີ້ ມີຜົນບັງຄັບໃຊ້ຢ່າງເປັນທາງການເມື່ອວັນທີ 1 ມັງກອນ ປີ 2002 ຫຼັງຈາກມີການລົງນາມທີ່ນະຄອນເຮວຊິງກິ ເມືອງຫຼວງຂອງປະເທດແຟງລັງ ມີເນື້ອໃນສຳຄັນຄື ການທີ່ລັດສະມາຊິກແຕ່ລະແຫ່ງສາມາດບິນສອດແນມບໍ່ຕິດອາວຸດເໜືອນ່ານຟ້າຂອງກັນແລະກັນໄດ້ ເພື່ອສຳຫຼວດ, ເກັບຂໍ້ມູນ ແລະ ຖ່າຍພາບ ອັນຈະເປັນການຍົກລະດັບການຮ່ວມມືທາງທະຫານ, ຂ່າວກອງ ແລະ ການເສີມສ້າງຄວາມເຊື່ອໝັ້ນລະດັບພະຫຸພາຄີພາຍໃນກຸ່ມ.