ອາຊຽນຂໍໃຫ້ມຽນມາປະຕິບັດຕາມມະຕິ 5 ຂໍ້, ອີກດ້ານໜຶ່ງປະຊາຊົນຕັ້ງກອງກຳລັງປະທະກັບທະຫານ

ລາຍງານ 7 ມິຖຸນາ 2021, ສຳນັກງານເລຂາທິການອາຊຽນ ອອກຖະແຫຼງການ ຕໍ່ກັບການທີ່ທ່ານ ອີຣິວານ ຢູຊັອບ ຮອງລັດຖະມົນຕີກະຊວງການຕ່າງປະເທດບຣູໄນ ໃນຖານະປະທານອາຊຽນ ປະຈຳປີນີ້ ແລະ ທ່ານ ລິມ ຈັອກ ຮອຍ ເລຂາທິການອາຊຽນ ເຊິ່ງເປັນຄົນບຣູໄນເຊັ່ນກັນ ເຂົ້າພົບກັບທ່ານ ພົນເອກ ມິນ ອ່ອງ ຫຼ່າຍ ຜູ້ບັນຊາການທະຫານສູງສຸດ ແລະ ຜູ້ນຳລັດຖະບານທະຫານມຽນມາ ທີ່ນະຄອນຫຼວງເນປີດໍ ເມື່ອວັນສຸກ ທີ 4 ມິຖຸນາ 2021 ທີ່ຜ່ານມາ.

ເຊິ່ງຄະນະຜູ້ແທນລະດັບສູງຂອງອາຊຽນຮຽກຮ້ອງໃຫ້ຜູ້ນຳທະຫານມຽນມາ ປ່ອຍຕົວຜູ້ຖືກຈັບກຸມຄຸມຂັງທາງການເມືອງທຸກຄົນ ທີ່ຖືກຈັບນັບຕັ້ງແຕ່ມື້ກໍ່ການລັດຖະປະຫານ ເມື່ອວັນທີ 1 ກຸມພາ 2021 ທີ່ຜານມາ ໂດຍການຮຽກຮ້ອງດັ່ງກ່າວບໍ່ໄດ້ຢູ່ໃນມະຕິ 5 ຂໍ້ ທີ່ກອງປະຊຸມອາຊຽນວາລະພິເສດ ທີ່ນະຄອນຫຼວງຈາກາຕາ ເມື່ອທ້າຍເດືອນເມສາ ທີ່ຜ່ານມາ ມີມະຕິຮ່ວມກັນໃຫ້ຄູ່ກໍລະນີທຸກຝ່າຍ ຍຸຕິການໃຊ້ຄວາມຮຸນແຮງ, ການຫັນມາເຈລະຈາຢ່າງສັນຕິ ເພື່ອຮ່ວມກັນຫາທາງອອກຢ່າງສ້າງສັນ, ການແຕ່ງຕັ້ງທູດພິເສດໃນນາມອາຊຽນ ເພື່ອປະຕິບັດໜ້າທີ່ເປັນຄົນກາງໃນການປຶກສາຫາລືລະຫວ່າງຄູ່ກໍລະນີ, ການຮັບເອົາການຊ່ວຍເຫຼືອດ້ານມະນຸດສະທຳ ແລະ ການທີ່ມຽນມາອະນຸຍາດໃຫ້ທູດພິເສດອາຊຽນເຂົ້າປະເທດ.

ຂະນະດຽວກັນ, ເລຂາທິການອາຊຽນ ແລະ ຮອງລັດຖະມົນຕີກະຊວງການຕ່າງປະເທດບຣູໄນ ຍັງຮ່ວມກັນຂໍໃຫ້ລັດຖະບານທະຫານມຽນມາ ຮີບຮ້ອນປະຕິບັດຕາມຂໍ້ຮຽກຮ້ອງທັງ 5 ຂໍ້ນັ້ນດ້ວຍ, ດ້ານສະຖານີໂທລະພາບແຫ່ງຊາດມຽນມາລາຍງານພຽງວ່າ ທ່ານ ພົນເອກ ມິນ ອ່ອງ ຫຼ່າຍ ຢືນຢັນຈະໃຫ້ມີການເລືອກຕັ້ງທົ່ວໄປຄັ້ງໃໝ່ ກໍ່ຕໍ່ເມື່ອສະຖານະການສະຫງົບ ແລະ ມີສະຖຽນລະພາບ.

ດ້ານລັດຖະບານແຫ່ງຊາດ (NUG) ເຊິ່ງເປັນອົງກອນກາງຂອງຝ່າຍຕໍ່ຕ້ານກອງທັບມຽນມາ ປະນາມການທີ່ຜູ້ແທນລະດັບສູງຂອງອາຊຽນເຂົ້າພົບທ່ານ ພົນເອກ ມິນ ອ່ອງ ຫຼ່າຍ ເທົ່ານກັບເປັນການຍອມຮັບລັດຖະບານທະຫານມຽນມາ, ຂະນະທີ່ທ່ານ ວັນນາ ໜ່ອງ ລະວິນ ລັດຖະມົນຕີກະຊວງການຕ່າງປະເທດມຽນມາ ກໍ່ກຽມເດີນທາງໄປຍັງນະຄອນສົງຊິ້ງ ປະເທດຈີນ ເພື່ອຮ່ວມກອງປະຊຸມອາຊຽນ-ຈີນ ສະໄໝພິເສດ ໃນອາທິດນີ້ອີກດ້ວຍ.

ສ່ວນສະຖານະການໃນມຽນມາ, ສະຖານີໂທລະພາບແຫ່ງຊາດມຽນມາລາຍງານວ່າ ມີການປະທະກັນລະຫວ່າງກອງທັບມຽນມາ ກັບ ກອງກຳລັງປະຊາຊົນ ຢູ່ບ້ານຮະເລສວນ ໃນເຂດອິຣະວະດີ ເມື່ອວັນທີ 5 ມິຖຸນາ 2021 ໂດຍລະບຸວ່າ ເຈົ້າໜ້າທີ່ໄດ້ສັງຫານ “ຜູ້ກໍ່ການຮ້າຍ” 3 ຄົນ ແລະ ຈັບກຸມຜູ້ຕ້ອງສົງໄສ 2 ຄົນ ໂດຍປະຕິບັດການດັ່ງກ່າວ ເປັນໄປຕາມຂໍ້ມູນຂ່າວກອງ ທີ່ລະບຸວ່າ ສະຖານທີ່ດັ່ງກ່າວເປັນບ່ອນຫຼົບຊ້ອນຂອງຊາຍຄົນໜຶ່ງ ທີ່ກຳລັງວາງແຜນລົ້ມລ້າງອຳນາດລັດ.

ເຖິງຢ່າງໃດກໍ່ຕາມ, ສື່ທ້ອງຖິ່ນອີກຫຼາຍແຫ່ງລາຍງານວ່າ ການຕໍ່ສູ້ຄັ້ງນີ້ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 20 ຄົນ ແລະ ມີຜູ້ໄດ້ຮັບບາດເຈັບອີກຫຼາຍສິບຄົນ, ຂະນະທີ່ປະຊາຊົນໃນບ້ານດັ່ງກ່າວພະຍາຍາມຕອບໂຕ້ ແຕ່ອາວຸດທີ່ມີບໍ່ສາມາດໃຊ້ຕໍ່ສູ້ກັບທະຫານໄດ້.

- Advertisement -