ຈີນຈະເພີ່ມການສະໜັບສະໜູນອາຊຽນ ເພື່ອຜ່ານຜ່າວິກິດການແຜ່ລະບາດຂອງພະຍາດໂຄວິດ-19

ລາຍງານ 8 ມິຖຸນາ 2021, ທ່ານ ຫວັງ ອີ້ ລັດຖະມົນຕີກະຊວງການຕ່າງປະເທດຂອງຈີນ ກ່າວຕໍ່ກອງປະຊຸມລັດຖະມົນຕີຕ່າງປະເທດອາຊຽນ-ຈີນ ສະໄໝພິເສດ ເພື່ອສະເຫຼີມສະຫຼອງຄົບຮອບ 30 ປີ ການພົວພັນຮ່ວມມືອາຊຽນ-ຈີນ, ທີ່ນະຄອນສົງຊິງ ສປ.ຈີນ ເມື່ອວັນຈັນ ທີ 7 ມິຖຸນາ 2021 ທີ່ຜ່ານມາ ວ່າລັດຖະບານຈີນໃຫ້ຄວາມສຳຄັນ ແລະ ສະໜັບສະໜູນອາຊຽນ ໃນການຕໍ່ສູ້ກັບການແຜ່ລະບາດຂອງພະຍາດໂຄວິດ-19 ໂດຍໄດ້ມອບວັກແຊັງ ທັງໃນຮູບແບບຂອງການຊ່ວຍເຫຼືອ ແລະ ການຈຳໜ່າຍໃນລາຄາພິເສດໃຫ້ແລ້ວຫຼາຍກວ່າ 100 ລ້ານຫຼອດ ລວມທັງການຊ່ວຍເຫຼືອດ້ານບຸກຄະລາກອນ ແລະ ອຸປະກອນການແພດທີ່ກ່ຽວຂ້ອງ.

ທ່ານ ຫວັງ ອີ້ ກ່າວອີກວ່າ ຕໍ່ຈາກນີ້ລັດຖະບານຈີນ ຈະເພີ່ມການຊ່ວຍເຫຼືອໃນທຸກຮູບແບບທີ່ຈຳເປັນ ໃຫ້ກັບກອບການຮ່ວມມືດ້ານສຸຂະພາບລະຫວ່າງຈີນ-ອາຊຽນ, ການຊ່ວຍເຫຼືອສຸກເສີນດ້ານອຸປະກອນການແພດ, ການແລກປ່ຽນຂໍ້ມູນຂ່າວສານ ແລະ ບົດຮຽນທີ່ດີດ້ານສາທາລະນະສຸກລະຫວ່າງກັນ ເພື່ອໃຫ້ອາຊຽນຂ້າມຜ່ານວິກິດຄັ້ງນີ້ໂດຍໄວທີ່ສຸດ.

ໃນດ້ານຂອງທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດຂອງລາວ ໄດ້ສະແດງຄວາມຂອບໃຈຕໍ່ການຊ່ວຍເຫຼືອຂອງ ສປ.ຈີນ ໃຫ້ແກ່ ສປປ.ລາວ ໃນໄລຍະຜ່ານມາ ໂດຍສະເພາະການຊ່ວຍເຫຼືອດ້ານເຕັກນິກ-ວິຊາການ ແລະ ການສະໜອງທຶນຊ່ວຍເຫຼືອເພື່ອຮັບມື ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ ສປປ.ລາວ, ພິເສດແມ່ນການຊ່ວຍເຫຼືອວັກແຊັງຕ້ານພະຍາດໂຄວິດ-19 ທັງຜ່ານຂອບການຮ່ວມມືສອງຝ່າຍ ແລະ ຫຼາຍຝ່າຍ.

ນອກຈາກນີ້, ທ່ານ ສະເຫຼີມໄຊ ກົມມະສິດ ຍັງໄດ້ສະເໜີຕໍ່ກອງປະຊຸມໃຫ້ພິຈາລະນາບາງຂົງເຂດບູລິມະສິດການຮ່ວມມືອາຊຽນ-ຈີນ ໃນໄລຍະຕໍ່ໜ້າເຊັ່ນ: ຂະແໜງສາທາລະນະສຸກ ໂດຍສະເພາະການສະໜັບສະໜູນການຈັດຕັ້ງປະຕິບັດແຜນຟື້ນຟູຮອບດ້ານຂອງອາຊຽນ, ການສະໜັບສະໜູນການເຊື່ອມຈອດອາຊຽນ ແລະ ແຜນແມ່ບົດການເຊື່ອມຈອດອາຊຽນ 2025, ການຮັດແຄບຄວາມແຕກໂຕນດ້ານການພັດທະນາ, ການພັດທະນາຊັບພະຍາກອນມະນຸດ ແລະ ການຖ່າຍທອດບົດຮຽນ ແລະ ປະສົບການໃນວຽກງານຫຼຸດຜ່ອນຄວາມທຸກຍາກ.

- Advertisement -