ແຮງງານລາວຖືກໂຈະການຈ້າງ 114,000 ຄົນ ແລະ 130,000 ຄົນກັບຈາກການເຮັດວຽກຢູ່ຕ່າງປະເທດ

ອີງຕາມການລາຍງານຂອງກະຊວງແຮງງານ ແລະ ສະຫວັດດີການສັງຄົມໃຫ້ຮູ້ວ່າ: ເມື່ອວັນທີ 8 ມິຖຸນາ 2021 ທີ່ຜ່ານມາ, ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ໄດ້ເຂົ້າຮ່ວມກອງປະຊຸມສະມັດຊາໃຫຍ່ຂອງອົງການແຮງງານສາກົນ ສະໄໝທີ 109 ປະຈຳປີ 2021 ແລະ ກອງປະຊຸມປິ່ນອອ້ມຕ່າງໆ ທີ່ໄດ້ໄຂຂື້ນຢ່າງເປັນທາງການ ແລະ ໄດ້ດໍາເນີນກອງປະຊຸມເລີ່ມແຕ່ວັນທີ 03-19 ມິຖຸນາ 2021, ທີ່ເມືອງເຈນີວາ ປະເທດສະວິດເຊີແລນ ພາຍຫົວຂໍ້: “ການຮັບມືກັບການແຜ່ລະບາດຂອງເຊື້ອພະຍາດໂຄວິດ-19 ຂອງລັດຖະບານ ເພື່ອປົກປ້ອງຜູ້ອອກແຮງງານ ແລະ ຜູ້ໃຊ້ແຮງງານ ຢູ່ ສປປ.ລາວ” ດ້ວຍຮູບແບບກອງປະຊຸມທາງໄກ (ອອນລາຍ), ໂດຍການເປັນປະທານກອງປະຊຸມຂອງທ່ານ ໂອມາ ຊະໄນເບີ (Omar ZNIBER) ເອກອັກຄະລັດຖະທູດວິສາມັນ ຜູ້ມີອຳນາດເຕັມ, ຜູ້ຕາງໜ້າຖາວອນຂອງປະເທດມາຣົກ ປະຈຳອົງການສະຫະປະຊາຊາດ ແລະ ອົງການຈັດຕັ້ງສາກົນ ທີ່ເຊີແນວ ແລະ ມີຜູ້ແທນຈາກບັນດາປະເທດສະມາຊິກອົງການແຮງງານສາກົນ ຈຳນວນທັງໝົດ 3,856 ທ່ານ ໃນຈຳນວນ 176 ປະເທດເຂົ້າຮວ່ມ.

ທ່ານ ນາງ ໃບຄຳ ຂັດທິຍະ ໄດ້ກ່າວປະກອບຄວາມເຫັນ ເຊິ່ງມີບາງຕອນທີ່ສຳຄັນວ່າ: “ການແຜ່ລະບາດຂອງພະຍາດໂຄວິດ-19 ໄດ້ກະທົບຕໍ່ການດຳລົງຊີວິດ ແລະ ການພັດທະນາເສດຖະກິດ-ສັງຄົມ ຂອງທົ່ວໂລກ ໂດຍສະເພາະແມ່ນສະຖຽນລະພາບຂອງການເຮັດວຽກ ແລະ ລາຍຮັບຂອງກຳລັງແຮງງານ.

ສຳລັບ ສປປ.ລາວ ໂຄວິດ-19 ໄດ້ເຮັດໃຫ້ກໍາລັງແຮງງານທີ່ເຮັດວຽກຢູ່ພາຍໃນປະເທດຈຳນວນ 114,000 ຄົນ ຖືກໂຈະການຈ້າງງານຊົ່ວຄາວ ແລະ 130,000 ຄົນ ຕ້ອງໄດ້ກັບຈາກການເຮັດວຽກຢູ່ຕ່າງປະເທດ ນອກນັ້ນກໍ່ຍັງມີແຮງງານນອກລະບົບຈຳນວນຫຼາຍ ໄດ້ຮັບຜົນກະທົບ ໂດຍສະເພາະແມ່ນແຮງງານທີ່ເຄື່ອນຍ້າຍຈາກຊົນນະບົດເຂົ້າມາເຮັດວຽກຢູ່ໃນຕົວເມືອງຕ່າງໆຂອງປະເທດ ລວມທັງແຮງງນທີ່ຜະລິດກະສິກຳເພື່ອເປັນສິນຄ້າ.

ຂະແໜງບໍລິການ ເປັນຂະແໜງການທີ່ໄດ້ຮັບຜົນກະທົບຫຼາຍກວ່າຂະແໜງການອືື່ນ ເຊິ່ງມາຮອດປັດຈຸບັນແມ່ນບໍ່ສາມາດກັບມາດຳເນີນກິດຈະການໄດ້, ຂະແໜງການຜະລິດເສື້ອຜ້າ, ເກີບ ແລະ ຜະລິດຕະພັນອື່ນເພື່ອສົ່ງອອກ ກໍ່ບໍ່ສາມາດດຳເນີນການຜະລິດໄດ້ເປັນປົກກະຕິ.

ສະນັ້ນ, ເພື່ອແກ້ໄຂບັນຫາດັ່ງກ່າວ ລັດຖະບານໄດ້ປະຕິບັດມາດຕະການໃນການຊ່ວຍເຫຼືອຜູ້ອອກແຮງງານ ແລະ ຜູ້ລົງທຶນ ທີ່ໄດ້ຮັບຜົນກະທົບເຊັ່ນ: ກຳນົດນະໂຍບາຍຍົກເວັ້້ນອາກອນເງິນເດືອນ, ຫຼຸດຜ່ອນ ຫຼື ເລື່ອນເວລາການຈ່າຍພັນທະຕ່າງໆຂອງຜູ້ລົງທຶນ ລວມທັງການຈ່າຍເງີນສົມທົບເຂົ້າກອງທຶນປະກັນສັງຄົມ. ພ້ອມນີ້, ລັດຖະບານໄດ້ອະນຸຍາດຈ່າຍເງິນອຸດໜູນການວ່າງງານໃຫ້ສະມາຊິກກອງທຶນເປັນກໍລະນີພິເສດ ເຊິ່ງໄດ້ຈ່າຍທັງໝົດ 38.18 ຕື້ກີບ ຫຼື ປະມານ 4 ລ້ານໂດລາສະຫະລັດ”.

ພ້ອມນັ້ນ, ທ່ານລັດຖະມົນຕີ ຍັງໄດ້ສະແດງຄວາມຂອບໃຈຕໍ່ກັບການສະໜັບສະໜູນຂອງບັນດາອົງການຈັດຕັ້ງສາກົນ ແລະ ປະເທດສະມາຊິກ ທີ່ໄດ້ໃຫ້ການຊ່ວຍເຫຼືອແກ່ ສປປ.ລາວ ໃນການຮັບມືກັບການແຜ່ລະບາດຂອງພະຍາດໂຄວິດ-19, ພ້ອມທັງໄດ້ຮຽກຮ້ອງໃຫ້ອົງການແຮງງານສາກົນ ແລະ ບັນດາທ່ານຜູ້ແທນກອງປະຊຸມໃຫຍ່ ຄັ້ງທີ 109 ຈົ່ງພະຍາຍາມເຮັດໃຫ້ມາດຕະການການຮັບມືກັບພະຍາດໂຄວິດ-19 ທີ່ກອງປະຊຸມໄດ້ຄົ້ນຄ້ວາ ຈົ່ງໄດ້ບັນຈຸເນື້ອໃນທີ່ຄົບຖ້ວນ ເພື່ອເຮັດໃຫ້ເກີດມີການຮ່ວມມື, ມີການຊ່ວຍເຫຼືອທີ່ມີປະສິດທິພາບເຊິ່ງກັນ ແລະ ກັນໃນລະດັບພາກພື້ນ ແລະ ສາກົນ ໂດຍສະເພາະແມ່ນຢາກໃຫ້ເບີ່ງຊ່ວຍເຫຼືອປະເທດສະມາຊິກທີ່ຍັງຂາດຊັບພະຍາກອນໃນການຮັບມືກັບບັນຫາທີ່ຮ້າຍແຮງດັ່ງກ່າວ ໃຫ້ລອດພົ້ນຈາກວິກິດການໄປພ້ອມໆກັນ.

ພ້ອມດຽວກັນນັ້ນ, ກໍ່ຂໍສະແດງຄວາມຍິນດີຕໍ່ການກຳນົດເອົາປີ 2021 ເປັນປີແຫ່ງການລົບລ້າງການນຳໃຊ້ແຮງງານເດັກໃນທົ່ວໂລກ ເຊິ່ງ ສປປ.ລາວ ກໍ່ກຽມຄວາມພ້ອມໃນການກຳຈັດບັນຫາແຮງງານເດັກຮ່ວມກັນໃນທົ່ວໂລກ ໂດຍມີໝາຍສານຂອງ ທ່ານນາຍົກລັດຖະມົນຕີ ຂອງ ສປປ.ລາວ, ກະກຽມໂຄສະນາໃຫ້ສັງຄົມໄດ້ຮັບຮູ້ ແລະ ເຂົ້າໃຈຄວາມໝາຍຄວາມສຳຄັນຂອງແຮງງານເດັກ.

- Advertisement -