ສປ.ຈີນ ຮັບຮອງກົດໝາຍຕໍ່ຕ້ານການຂວ້ຳບາດຈາກຕ່າງປະເທດ ເພື່ອໄວ້ຕອບໂຕ້ຄືນ

ລາຍງານ 10 ມິຖຸນາ 2021, ກອງປະຊຸມຄະນະກຳມະການປະຈຳສະພາປະຊາຊົນແຫ່ງຊາດຈີນ ຄັ້ງທີ 13 ໃນວັນພະຫັດນີ້, ໄດ້ຮັບຮອງກົດໝາຍສະບັບໃໝ່ ວ່າດ້ວຍການເພື່ອຕໍ່ຕ້ານການຂວ້ຳບາດຈາກຕ່າງປະເທດ ເຊິ່ງຈະໃຊ້ເປັນແນວທາງໃນການຕອບໂຕ້ການຂວ້ຳບາດຈາກຕ່າງປະເທດ ໂດຍສະເພາະຈາກ ສ.ອາເມຣິກາ, ສະຫະພາບເອີຣົບ, ອັງກິດ ແລະ ການາດາ ຕໍ່ກັບບັນຫາພາຍໃນຂອງຈີນເຊັ່ນ: ບັນຫາການເມືອງໃນຮົງກົງ ແລະ ບັນການຊາວອຸຍກູ ໃນມົນທົນຊິນຈຽງ.

ໂດຍບາງມາດຕາທີ່ສຳຄັນຂອງກົດໝາຍສະບັບດັ່ງກ່າວລະບຸວ່າ: 

– ຈີນ ຍຶດໝັ້ນຕາມແນວທາງສັນຕິພາບ, ອະທິປະໄຕ ແລະ ຜືນແຜ່ນດິນອັນຄົບຖ້ວນ, ການບໍ່ຮຸກຮານເຊິ່ງກັນ ແລະ ກັນ, ການບໍ່ແຊກແຊງວຽກງານພາຍໃນຂອງກັນ ແລະ ກັນ, ຄວາມສະເໜີພາບ ແລະ ຜົນປະໂຫຍດຮ່ວມກັນ ແລະ ການຢູ່ຮ່ວມກັນຢ່າງສັນຕິ ຕາມກອບຂອງກົດໝາຍລະຫວ່າງປະເທດ.

– ຈີນຕໍ່ຕ້ານລັດທິອຳນາດນິຍົມ, ອຳນາດທາງການເມືອງ ແລະ ຄັດຄ້ານການແຊກແຊງວຽກງານພາຍໃນຂອງຈີນ ບໍ່ວ່າປະເທດໃດໆກໍ່ຕາມ ບໍ່ວ່າຈະດ້ວຍຂໍ້ອ້າງໃດໜຶ່ງກໍ່ຕາມ, ຫາກປະເທດໃດລະເມີດ ດ້ວຍການໃຊ້ມາດຕະການຈຳກັດ, ເລືອກປະຕິບັດຕໍ່ພົນລະເມືອງຈີນ, ນິຕິບຸກຄົນຂອງຈີນ ແລະ ແຊກແຊງວຽກງານພາຍໃນຂອງຈີນ ຈີນມີສິດໃຊ້ມາດຕະການອັນສອດຄ່ອງເພື່ອຮັບມື.

ເຊິ່ງມາດຕະການທີ່ລະບຸໄວ້ໃນກົດໝາຍສະບັບດັ່ງກ່າວປະກອບດ້ວຍ: 

  • ການປະຕິເສດອອກວີຊາ, ປະຕິເສດການເຂົ້າເມືອງ, ການຍົກເລີກວີຊາ ຫຼື ການເນລະເທດ
  • ການປິດ, ຍຶດ ແລະ ອາຍັດສັງຫາລິມະຊັບ, ອະສັງຫາລິມະຊັບ ແລະ ຊັບສິນປະເພດອື່ນໆ ໃນດິນແດນຈີນ.
  • ຫ້າມ ຫຼື ຈຳກັດການເຮັດທຸລະກິດຮ່ວມ, ການຮ່ວມມື ແລະ ກິດຈະກຳອື່ນໆທີ່ກ່ຽວຂ້ອງກັບບຸກຄົນ ແລະ ນິຕິບຸກຄົນໃນດິນແດນຈີນ
  • ມາດຕະການອື່ນໆທີ່ຈຳເປັນ

ກົດໝາຍດັ່ງກ່າວຍັງລະບຸວ່າ: ບຸກຄົນ ແລະ ນິຕິບຸກຄົນໃນດິນແດນຈີນ ຕ້ອງດຳເນີນມາດຕະການຕອບໂຕ້ຕ່າງໆ ຕາມທີ່ໜ່ວຍງານທີ່ກ່ຽວຂ້ອງຂອງລັດຮັບຮອງ, ບຸກຄົນ ຫຼື ນິຕິບຸກຄົນໃດທີ່ບໍ່ດຳເນີນການ, ບໍ່ສະໜັບສະໜູນການດຳເນີນມາດຕະການຕອບໂຕ້ ຈະຖືກສືບສວນສອບສວນ ເພື່ອດຳເນີນການຕາມມາດຕະການທາງກົດໝາຍຕໍ່ໄປ.

ນອກຈາກນີ້, ຍັງລະບຸອີກວ່າ: ຕ່າງປະເທດ, ນິຕິບຸກຄົນ ຫຼື ບຸກຄົນທີ່ດຳເນີນການຊ່ວຍເຫຼືອ ຫຼື ສະໜັບສະໜູນການກະທຳທີ່ເປັນອັນຕະລາຍຕໍ່ອຳນາດອະທິປະໄຕ, ຄວາມໝັ້ນຄົງ ແລະ ຜົນປະໂຫຍດໃນການພັດທະນາຂອງຈີນ ຈີນຈຳເປັນຕ້ອງໃຊ້ມາດຕະການຕອບໂຕ້ທີ່ຈຳເປັນ ຕາມທີ່ກຳນົດໄວ້ໃນກົດໝາຍສະບັບນີ້.