ກຸ່ມປະເທດ G7 ຈະບໍລິຈາກວັກແຊັງຕ້ານໂຄວິດ 1,000 ລ້ານຫຼອດ, ດ້ານ UN ວ່າ ໜ້ອຍເກີນໄປ

ລາຍງານ 12 ມິຖຸນາ 2021, ທ່ານ ບໍຣິສ ຈອນສັນ ນາຍົກລັດຖະມົນຕີອັງກິດ ກ່າວໃນລະຫວ່າງກອງປະຊຸມສຸດຍອດຜູ້ນຳກຸ່ມປະເທດອຸດສາຫະກຳຊັ້ນນຳຂອງໂລກ ຫຼື G7 ທີ່ຣີສອດແຄມອ່າວຄາບິສ, ຄອນວໍ ປະເທດອັງກິດ ເມື່ອວັນທີ 11 ມິຖຸນາ 2021 ທີ່ຜ່ານມາ ວ່າ ອັງກິດຈະບໍລິຈາກວັກແຊັງຕ້ານໂຄວິດ-19 ອີກ 100 ລ້ານຫຼອດ ໃຫ້ແກ່ໂຄງການໂຄແວັດ (COVAX) ຂອງອົງການອະນາໄມໂລກ (WHO) ສົມທົບກັບແຜນການຂອງ ສ.ອາເມຣິກາ ທີ່ປະກາດບໍລິຈາກວັກແຊັງຂອງຟາຍເຊີ ຈຳນວນ 500 ລ້ານຫຼອດ.

ຂະນະດຽວກັນ, ທ່ານ ບໍຣິສ ຈອນສັນ ຄາດຄະເນວ່າ ກຸ່ມ G7 ຈະຮ່ວມກັນບໍລິຈາກວັກແຊັງໃຫ້ແກ່ໂຄງການໂຄແວັດໄດ້ 1,000 ລ້ານຫຼອດ ເພື່ອຊ່ວຍເຫຼືອກຸ່ມປະເທດທີ່ມີຖານະປານກາງໄປເຖິງທຸກຍາກ ໃຫ້ສາມາດສ້າງພູມຄຸ້ມກັນໝູ່ ແກ່ປະຊາຊົນໄດ້ຢ່າງພຽງພໍ, ເຊິ່ງຜູ້ນຳ G7 ມີເປົ້າໝາຍເບື້ອງຕົ້ນຮ່ວມກັນໃຫ້ທົ່ວໂລກສັກວັກແຊັງຕ້ານພະຍາດໂຄວິດ-19 ໄດ້ຢ່າງພຽງພໍພາຍໃນປີ 2022.

ດ້ານທ່ານ ໂຈ ໄບເດັນ ປະທານປະເທດ ສ.ອາເມຣິກາ ຖະແຫຼງພ້ອມກັບທ່ານ ອັນເບີກ ບູລາ ຜູ້ບໍລິຫານຂອງຟາຍເຊີ ນອກຮອບກອງປະຊຸມ G7 ຄັ້ງນີ້ ຢືນຢັນການທີ່ລັດຖະບານ ສ.ອາເມຣິກາ ຈະເປັນຜູ້ຈ່າຍເງິນຊື້ວັກແຊັງຂອງຟາຍເຊີ 500 ລ້ານຫຼອດ ໃຫ້ແກ່ໂຄງການໂຄແວັດ ໂດຍບໍ່ມີຂໍ້ຜູກມັດໃດໆທັງນັ້ນ ແລະ ເຊີນຊວນໃຫ້ປະເທດຂະໜາດໃຫຍ່ພິຈາລະນາເລື່ອງນີ້ຕື່ມ.

ຂະນະດຽວກັນ, ການຊື້ວັກແຊັງຈຳນວນດັ່ງກ່າວ ຖືເປັນການຊື້ວັກແຊັງຄັ້ງດຽວ ທີ່ມີມູນຄ່າສູງສຸດໃນປະຫວັດສາດ ຕົກເປັນເງິນປະມານ 3,500 ລ້ານໂດລາສະຫະລັດ, ສ່ວນກຳນົດການສົ່ງມອບວັກແຊັງຈາກຟາຍເຊີ ຈະແບ່ງເປັນ 200 ລ້ານຫຼອດພາຍໃນປີນີ້ ເລີ່ມຕັ້ງແຕ່ເດືອນສິງຫາ ເປັນຕົ້ນໄປ ແລະ ອີກ 300 ລ້ານຫຼອດ ພາຍໃນໄລຍະ 6 ເດືອນທຳອິດຂອງປີໜ້າ.

ນອກຈາກນີ້, ຟາຍເຊີ ຍັງໄດ້ມອບສິດທິໃຫ້ ສ.ອາເມຣິກາ ສັ່ງຈອງວັກແຊັງເພີ່ມໄດ້, ເຖິງຢ່າງໃດກໍ່ຕາມ ວັກແຊັງທີ່ຟາຍເຊີກຽມຂາຍໃຫ້ແກ່ທາງການ ສ.ອາເມຣິກາ ໃນຄັ້ງນີ້ ເປັນສ່ວນໜຶ່ງຂອງແຜນການຈັດສັນວັກແຊັງ 2,000 ລ້ານຫຼອດ ໃຫ້ແກ່ກຸ່ມປະເທດຖານະປານກາງ ແລະ ລາຍໄດ້ໜ້ອຍ ພາຍໃນໄລຍະເວລາ 18 ເດືອນ ທີ່ຟາຍເຊີປະກາດເມື່ອບໍ່ດົນມານີ້.

ເຖິງຢ່າງໃດກໍ່ຕາມ,​ອົງການອັອກຟາມ (Oxfam) ວິຈານແຜນການບໍລິຈາກວັກແຊັງຂອງ G7 ວ່າເປັນພຽງ “ຢອດນ້ຳໜຶ່ງໃນມະຫາສະໝຸດ” ເພາະປະຊາກອນໂລກເກືອບ 4,000 ລ້ານຄົນ ຫຼື ເຄິ່ງໜຶ່ງຂອງທັງໝົດ ຕ້ອງເພິ່ງພາວັກແຊັງຈາກໂຄງການໂຄແວັກໂດຍກົງ ແລະ ປັດຈຸບັນວັກແຊັງປ້ອງກັນໂຄວິດ-19 ເກືອບທຸກຍີ່ຫໍ້ຕ້ອງສັກ 2 ເຂັມ.

ນອກນັ້ນ, ທ່ານ ອັນໂຕນິໂອ ກູເຕເຣສ ເລຂາທິການອົງການສະຫະປະຊາຊາດ (UN) ຍັງໄດ້ກ່າວວ່າ: ການທີ່ກຸ່ມປະເທດ G7 ຈະຮ່ວມກັນບໍລິຈາກວັກແຊັງຕ້ານໂຄວິດ-19 ລວມກັນ 1,000 ລ້ານຫຼອດ ໃຫ້ແກ່ໂຄງການໂຄແວັກ ໂດຍເຄິ່ງໜຶ່ງມາຈາກ ສ.ອາເມຣິການັ້ນ  UN ມີຄວາມຍິນດີກັບແຜນການດັ່ງກ່າວ ແຕ່ຕົວເລກທີ່ມີການເປີດເຜີຍນັ້ນ “ໜ້ອຍເກີນໄປ”.

ທ່ານ ອັນໂຕ ນິໂອ ກູເຕເຣສ ກ່າວວ່າ ການສັກວັກແຊັງຕ້ານໂຄວິດ-19 ເປັນໂຄງການສ້າງພູມຄຸ້ມກັນລະດັບໂລກ ແຜນດຳເນີນການຈຶ່ງຕ້ອງມີຄວາມເປັນລະດັບໂລກ ຕັ້ງຢູ່ບົນຫຼັກການຂອງຄວາມເປັນຈິງ ທີ່ມີຄວາມຮີບດ່ວນ ແລະ ການໃຫ້ຄວາມສຳຄັນກັບການຟື້ນຟູເສດຖະກິດ ແຕ່ສະຖານະການໃນພາບລວມຍັງຫ່າງໄກຈາກເປົ້າໝາຍນີ້ຫຼາຍ.

ທ່ານເລຂາທິການ UN ໃຫ້ຄວາມເຫັນຕໍ່ໄປວ່າ ຍິ່ງປະຊາຊົນໃນກຸ່ມປະເທດທີ່ທຸກຍາກ ແລະ ຫ່າງໄກໄດ້ຮັບວັກແຊັງຊ້າເທົ່າໃດ ເຊື້ອຈຸລະໂລກໂຄໂຣນາສາຍພັນໃໝ່ນີ້ ກໍ່ມີໂອກາດກາຍພັນຫຼາຍຂຶ້ນເທົ່ານັ້ນ ແລະ ອາດມີຜົນຕໍ່ວັກແຊັງທັງໝົດທີ່ກຳລັງໃຊ້ຢູ່ໃນປັດຈຸບັນນີ້.

ເຊິ່ງລາຍງານຂອງ WHO ລະບຸວ່າ ນັບຕັ້ງແຕ່ມີການຢືນຢັນການພົບຜູ້ຕິດເຊື້ອຄົນທຳອິດໃນ ສປ.ຈີນ ເມື່ອເດືອນທັນວາ 2019 ຮອດປັດຈຸບັນພະຍາດໂຄວິດ-19 ແຜ່ລະບາດໄປແລ້ວ 210 ປະເທດ ແລະ ດິນແດນ, ຂ້າຊີວິດປະຊາກອນໂລກແລ້ວເກືອບ 4 ລ້ານຄົນ ເຖິງແມ່ນວ່າປະຊາກອນໂລກປະມານ 2,200 ລ້ານຄົນໄດ້ຮັບການສັກວັກແຊັງແລ້ວຢ່າງໜ້ອຍ 1 ເຂັມແລ້ວກໍ່ຕາມ.

ເຖິງຢ່າງໃດກໍ່ຕາມ, ວັກແຊັງທີ່ມີການຈັດສັນໄປແລ້ວນັ້ນ ຍັງຄົງກະຈຸກຕົວຢູ່ແຕ່ໃນກຸ່ມປະເທດຮັ່ງມີ ແລະ ການທີ່ວັກແຊັງທີ່ຜະລິດອອກມາໃນປັດຈຸບັນເກືອບທຸກຍີ່ຫໍ້ຕ້ອງສັກ 2 ເຂັມຕໍ່ຄົນ ແລະ ອາດຕ້ອງມີການກຽມສັກເຂັມທີ 3 ເພື່ອກະຕຸ້ນພູມຄຸ້ມກັນ, ມີການປະເມີນວ່າ ໂລກຕ້ອງການວັກແຊັງປະມານ 11,000 ລ້ານຫຼອດ ເພື່ອຢຸດຢັ້ງວິກິດການດ້ານສາທາລະນະສຸກໃນຄັ້ງນີ້.

- Advertisement -