ກຸ່ມ G7 ອອກໂຄງການ “ກັບມາສ້າງໂລກໃໝ່ທີ່ດີກວ່າ” ດວນກັບ “ໜຶ່ງແລວ ໜຶ່ງເສັ້ນທາງ” ຂອງຈີນ

ລາຍງານ 13 ມິຖຸນາ 2021, ກອງປະຊຸມຂອງກຸ່ມປະເທດອຸດສາຫະກຳຊັ້ນນຳຂອງໂລກ 7 ແຫ່ງ ຫຼື G7 ມີມະຕິຮ່ວມກັນ ໃນກອງປະຊຸມທີ່ຣີສອດແຄມອ່າວຄາບິສ, ຄອນວໍ, ປະເທດອັງກິດ ເມື່ອວັນເສົາ 12​ ມິຖຸນາ 2021 ທີ່ຜ່ານມາ ປະກາດແຜນຍຸດທະສາດ “Build Back Better World” ແປວ່າ “ກັບມາສ້າງໂລກໃຫ້ທີ່ດີກວ່າ” ໂດຍຮຽກແບບຫຍໍ້ວ່າ B3W.

ຖະແຫຼງການຂອງ G7 ທີ່ປະກອບດ້ວຍ ສ.ອາເມຣິກາ, ການາດາ, ອັງກິດ, ເຢຍລະມັນ, ຝຣັ່ງ, ອິຕາລີ ແລະ ຍີ່ປຸ່ນ ລວມທັງສະຫະພາບເອີຣົບ ລະບຸວ່າ: ຈະຮ່ວມກັນຈັດຕັ້ງໂຄງການດັ່ງກ່າວ ເພື່ອໃຫ້ເປັນ “ທາງເລືອກທີ່ດີກວ່າ” ເມື່ອທຽບກັບແຜນຍຸດທະສາດ “ໜຶ່ງແລວ ໜຶ່ງເສັ້ນທາງ” ຫຼື ເສັ້ນທາງສາຍໄໝແຫ່ງສະຕະວັດທີ 21 ຂອງ ສປ.ຈີນ ດ້ວຍການທີ່ G7 ຈະເປັນພັນທະມິດທີ່ໜ້າເຊື່ອຖື ແລະ ໄວ້ວາງໃຈໄດ້ຂອງກຸ່ມປະເທດກຳລັງພັດທະນາ.

ຜ່ານການໃຫ້ການຊ່ວຍເຫຼືອໃນຫຼາຍຮູບແບບ ເພື່ອຫຼຸດເພດານງົບປະມານທີ່ກຸ່ມປະເທດກຳລັງພັດທະນາຕ້ອງການລວມກັນຫຼາຍກວ່າ 40 ລ້ານລ້ານໂດລາສະຫະລັດ (40 ພັນຕື້ໂດລາສະຫະລັດ) ໃຫ້ໄດ້ຫຼາຍທີ່ສຸດພາຍໃນປີ 2035 ທີ່ກວມເອົາທັງວຽກງານດ້ານສາທາລະນະສຸກ, ເຕັກໂນໂລຊີ, ສິ່ງແວດລ້ອມ ແລະ ການສົ່ງເສີມຄວາມເທົ່າທຽມໃນສັງຄົມ ບໍ່ໄດ້ເນັ້ນສະເພາະການກໍ່ສ້າງພື້ນຖານໂຄງລ່າງ ແລະ ເສດຖະກິດ.

ເຊິ່ງ ສປ.ຈີນ ໄດ້ເລີ່ມແຜນຍຸດທະສາດໜຶ່ງແລວ ໜຶ່ງເສັ້ນທາງ ຫຼື BRI ເມື່ອປີ 2013 ຕາມແນວຄວາມຄິດລິເລີ່ມຂອງທ່ານປະທານປະເທດ ສີ ຈິ້ນຜິງ ທີ່ເນັ້ນການຂະຫາຍເຄືອຂ່າຍການລົງທຶນ ແລະ ການພັດທະນາອອກຈາກຈີນ ສູ່ບັນດາປະເທດໃນທະວີບອາຊີ, ເອີຣົບ ແລະ ອາຟຣິກາ ໂດຍຈົນເຖິງປັດຈຸບັນມີຫຼາຍກວ່າ 100 ປະເທດລົງນາມຮ່ວມເປັນຫຸ່ນສ່ວນກັບລັດຖະບານຈີນໃນໂຄງການດັ່ງກ່າວນີ້, ດ້ານກຸ່ມປະເທດຕາເວັນຕົກຫຼາຍແຫ່ງວິຈານໂຄງການນີ້ວ່າ ຄືກົນໄກການຂະຫຍາຍອິດທິພົນຂອງ ສປ.ຈີນ, ຂະນະທີ່ລັດຖະບານຈີນກ່າວວ່າ ປະເທດຕາເວັນຕົກກໍ່ກະທຳແບບດຽວກັນນີ້ ໃນຍຸກລ່າອະນານິຄົມ ທີ່ມີຈີນເປັນເປົ້າໝາຍມາແລ້ວເຊັ່ນກັນ.

- Advertisement -