ຈີນຕອບໂຕ້ກຸ່ມ G7 ວ່າ: ໝົດຍຸກທີ່ກຸ່ມບໍ່ພໍເທົ່າໃດປະເທດ ຈະມາຕັດສິນໃຈແທນຄົນທັງໂລກໄດ້

ລາຍງານ 13 ມິຖຸນາ 2021, ສະຖານເອກອັກຄະລັດຖະທູດຈີນ ປະຈຳນະຄອນຫຼວງລອນດອນອອກຖະແຫຼງການ ມີເນື້ອໃນສຳຄັນລະບຸວ່າ “ໝົດຍຸກສະໄໝດົນແລ້ວ” ທີ່ການຕັດສິນໃຈບັນຫາໃດກໍ່ຕາມ “ທີ່ມາຈາກກຸ່ມປະເທດບໍ່ພໍເທົ່າໃດປະເທດ” ຈະກໍ່ໃຫ້ເກີດຜົນກະທົບກັບຄົນທັງໂລກ ໃນຍຸກສະໄໜປັດຈຸບັນ ບໍ່ວ່າປະເທດໃຫຍ່ ຫຼື ນ້ອຍ, ມີອຳນາດ ແລະ ອິດທິພົນຫຼາຍ ຫຼື ໜ້ອຍ, ມີຖານະທາງເສດຖະກິດອັນຮັ່ງມີ ຫຼື ທຸກຍາກ, ທຸກປະເທດມີຄວາມເທົ່າທຽມກັນ ແລະ ວຽກງານຕ່າງໆຂອງໂລກ ເປັນບັນຫາທີ່ທຸກປະເທດຕ້ອງປຶກສາຫາລືຮ່ວມກັນ.

ຖະແຫຼງການດັ່ງກ່າວຖືກເຜີຍແຜ່ອອກມາພາຍໃນເວລາບໍ່ດົນ ຫຼັງຈາກທີ່ກອງປະຊຸມກຸ່ມປະເທດອຸດສາຫະກຳຊັ້ນນຳຂອງໂລກ 7 ແຫ່ງ ຫຼື G7 ທີ່ປະກອບດ້ວຍ: ສ.ອາເມຣິກາ, ອັງກິດ, ເຢຍລະມັນ, ຝຣັ່ງ, ອິຕາລີ, ການາດາ ແລະ ຍີ່ປຸ່ນ ລວມທັງສະຫະພາບເອີຣົບ ຮ່ວມກັນປະກາດແຜນຍຸດທະສາດ “ກັບມາສ້າງໂລກໃໝ່ທີ່ດີກວ່າ” (Build Back Better World: B3W) ເພື່ອເປັນ “ທາງເລືອກທີ່ດີກວ່າ” ໃຫ້ກັບກຸ່ມປະເທດກຳລັງພັດທະນາ ຈາກການເຂົ້າຮ່ວມໂຄງການໜຶ່ງແລວ ໜຶ່ງເສັ້ນທາງ ຂອງ ສປ.ຈີນ.

ຂະນະດຽວກັນ, ທ່ານ ຈັສຕິນ ທຣູໂດ ຜູ້ນຳການາດາ ຍັງຮຽກຮ້ອງໃຫ້ກຸ່ມ G7 ຮ່ວມແຮງຮ່ວມໃຈກັນຕໍ່ຕ້ານກັບຄວາມທ້າທາຍຈາກຈີນ.

ເຊິ່ງບັນດາປະເທດຕາເວັນຕົກ ຕີລາຄາວ່າ ການທີ່ຈີນໃຊ້ເວລາບໍ່ດົນ ໃນການກ້າວຂຶ້ນສູ່ການເປັນມະຫາອຳນາດຂອງໂລກ ຖືເປັນເຫດການທີ່ສົ່ງຜົນກະທົບຢ່າງໜັກໜ່ວງຕໍ່ພູມສາດການເມືອງໂລກ ນັບຕັ້ງແຕ່ການລົ້ມສະຫຼາຍຂອງສະຫະພາບໂຊວຽດ ເມື່ອ 1991.

- Advertisement -