ວັກແຊັງຊີໂນຟາມ 500,000 ຫຼອດ ຈາກ ສປ.ຈີນ ເຖິງນະຄອນຫຼວງວຽງຈັນແລ້ວ

ອີງຕາມການລາຍງານຂອງວິທະຍຸສາກົນແຫ່ງປະເທດຈີນ (CRI), ວັນທີ 14 ມິຖຸນາ 2021, ສປ.ຈີນ ໄດ້ສົ່ງວັກແຊັງຕ້ານພະຍາດໂຄວິດ-19 ອີກ 500,000 ຫຼອດ ຍີ່ຫໍ້ຊີໂນຟາມ (Sinopharm) ມາເຖິງນະຄອນຫຼວງວຽງຈັນແລ້ວ ຖືເປັນຄັ້ງທີ 4 ທີ່ ສປ.ຈີນ ສະໜອງວັກແຊັງຕ້ານໂຄວິດ-19 ໃຫ້ກັບລັດຖະບານລາວ ລວມເປັນຈຳນວນ 1,900,000 ຫຼອດແລ້ວ.

Photo: CRI

ໃນໄລຍະຜ່ານມາ, ນອກຈາກວັກແຊັງຕ້ານໂຄວິດ-19 ແລ້ວ ສປ.ຈີນ ຍັງໄດ້ສະໜອງເຄື່ອງມື ແລະ ອຸປະກອນປ້ອງກັນໂຄວິດ-19 ຫຼາຍຢ່າງໃຫ້ກັບລັດຖະບານລາວ ລວມທັງສົ່ງບຸກຄະລາກອນທາງການແພດເຂົ້າມາໃຫ້ການຊ່ວຍເຫຼືອແກ່ ສປປ.ລາວ ເພື່ອຮັບມືກັບການແຜ່ລະບາດຂອງພະຍາດໂຄວິດ-19 ໃນ ສປປ.ລາວ.

ອີງຕາມການລາຍງານຂອງກະຊວງສາທາລະນະສຸກ ມາຮອດວັນທີ 11 ມິຖຸນາ 2021 ທົ່ວປະເທດມີຜູ້ຮັບການສັກວັກແຊັງເຂັມທຳອິດແລ້ວ 712,793 ຄົນ ແລະ ຄົບສອງເຂັມແລ້ວ 385,921 ຄົນ, ສຳລັບການສັກວັກແຊັງເຂັມທີ່ 1 ຮອບທີ 2 ໃນນະຄອນຫຼວງວຽງຈັນ ແມ່ນຈະເລີ່ມໃນວັນທີ 15-25 ມິຖຸນາ 2021 ນີ້.

- Advertisement -