ກຸ່ມປະເທດ NATO ລະບຸວ່າ ຈີນ ແລະ ລັດເຊຍ ເປັນປະເທດທີ່ທ້າທາຍລະບຽບຄວາມໝັ້ນຄົງຂອງໂລກ

ລາຍງານ 15 ມິຖຸນາ 2021, ກອງປະຊຸມສຸດຍອດຜູ້ນຳ 30 ປະເທດສະມາຊິກອົງການສົນທິສັນຍາອາກລັງຕິກເໜືອ (NATO : ນາໂຕ) ໄດ້ອອກຖະແຫຼງການຮ່ວມ ຫຼື ປະຕິຍານບຼັສເຊວ ເມື່ອວັນຈັນ 14 ມິຖຸນາ 2021 ທີ່ຜ່ນມາ ລະບຸວ່າ: “ຈີນ ແລະ ລັດເຊຍ” ເປັນປະເທດທີ່ທ້າທາຍລະບຽບການດ້ານຄວາມໝັ້ນຄົງຂອງໂລກ ໂດຍສະແດງອອກຢ່າງຊັດເຈນດ້ວຍລະບົບທີ່ທ້າທາຍຕໍ່ກົດລະບຽບລະຫວ່າງປະເທດຢ່າງມີແບບແຜນ ແລະ ຂອບເຂດ ເຊິ່ງມັນກ່ຽວຂ້ອງກັບຄວາມໝັ້ນຄົງຂອງນາໂຕ.

ເຖິງແມ່ນວ່າຖະແຫຼງການຂອງນາໂຕຫຼີກລ້ຽງການໃຊ້ຄຳຮຽກຈີນວ່າ “ສັດຕູ” ຫຼື “ຝ່າຍກົງຂ້າມ” ເຊັ່ນດຽວກັບລັດເຊຍ ເຊິ່ງເປັນເປົ້າໝາຍຂອງສະຫະພາບທາງທະຫານແຫ່ງນີ້ຕັ້ງແຕ່ເລີ່ມຕົ້ນ ແຕ່ນາໂຕສະແດງຄວາມເປັນຫ່ວງຕໍ່ກັບການທີ່ລັດຖະບານຈີນ ດຳເນີນນະໂຍບາຍຂົ່ມຂູ່ ແລະ ບີບບັງຄັບ ເຊິ່ງເປັນການປະຕິບັດໂດຍບໍ່ມີຄວາມໂປ່ງໃສ ເພື່ອຍົກລະດັບຄວາມສາມາດທາງທະຫານ, ຂະນະດຽວກັນ ນາໂຕຍັງວິຈານຮູບແບບການເຜີຍແຜ່ເນື້ອໃນຂໍ້ມູນຂ່າວສານທີ່ບິດບຽນຂອງຈີນອີກດ້ວຍ ໂດຍນາໂຕໄດ້ຮຽກຮ້ອງໃຫ້ລັດຖະບານຈີນຈົ່ງມີຄວາມຮັບຜິດຊອບ ແລະ ປະຕິບັດຕາມລະບຽບໂລກຢ່າງເຄັ່ງຄັດ.

ດ້ານທ່ານ ໂຈ ໄບເດນ ປະທານປະເທດ ສ.ອາເມຣິກາ ທີ່ຊຸກດັນໃຫ້ກອງປະຊຸມກຸ່ມປະເທດອຸດສາຫະກຳຊັ້ນນຳ 7 ແຫ່ງ ຫຼື G7 ພາດພິງຫຼາຍເລື່ອງກ່ຽວກັບຈີນ ເຊິ່ງລວມເຖິງບັນຫາການບັງຄັບໃຊ້ແຮງງານໃນເຂດປົກຄອງຕົນເອງຊິນຈຽງອຸຍກູ ໃນປະຕິຍານຮ່ວມປະຈຳປີນີ້ ກ່າວວ່າໂດຍສ່ວນຕົວມີຄວາມເພິ່ງພໍໃຈກັບຖະແຫຼງການຮ່ວມຂອງນາໂຕ ທີ່ປະກາດຢ່າງເປັນທາງການຄັ້ງທຳອິດ ວ່າຈີນຄືຄວາມສ່ຽງດ້ານຄວາມໝັ້ນຄົງ ແຕ່ຍອມຮັບວ່າ ສະມາຊິກນາໂຕທັງ 30 ປະເທດຍັງມີຫາງສຽງໄປຄົນລະທາງ ໃນການໃຊ້ຖ້ອຍຄຳວິຈານລັດຖະບານຈີນ, ນອກຈາກນີ້, ຜູ້ນຳ ສ.ອາເມຣິກາຍັງລະບຸວ່າ: ລັດເຊຍກຳລັງພະຍາຍາມແບ່ງແຍກພັນທະມິດນາໂຕ ພ້ອມລະບຸວ່າຕົນບໍ່ໄດ້ຕ້ອງການສ້າງຄວາມຂັດແຍ່ງກັບລັດເຊຍ ແຕ່ນາໂຕກໍ່ຈະຕອບໂຕ້ຫາກລັດເຊຍຍັງມີພຶດຕິກຳທີ່ເປັນອັນຕະລາຍ.

ນອກຈາກການວິຈານຈີນ ແລະ ລັດເຊຍແລ້ວ, ຜູ້ນຳນາໂຕທັງ 30 ປະເທຍັງເຫັນດີໃຫ້ຂະຫຍາຍຂອບເຂດການບັງຄັບໃຊ້ມາດຕາ 5 ຂອງກົດບັດນາໂຕ ວ່າດ້ວຍການຮັບປະກັນຄວາມໝັ້ນຄົງໂດຍລວມ ນັ້ນກໍ່ຄືຫາກສະມາຊິກນາໂຕປະເທດໃດຕົກເປັນເປົ້າໝາຍຂອງການໂຈມຕີທາງທະຫານ ບໍ່ວ່າຈະທາງບົກ, ທາງທະເລ ຫຼື ທາງອາກາດ ໝາຍຄວາມວ່າສະມາຊິກນາໂຕທີ່ເຫຼືອຖືກໂຈມຕີເຊັ່ນກັນ ໃຫ້ມີຜົນຄວບຄຸມເຖິງໃນອະວະກາດ.

- Advertisement -