ຟິລິບປິນ ປະຕິເສດໃຫ້ການຮ່ວມມືກັບສານອາຍາໂລກ ຕໍ່ກັບບັນຫາສົງຄາມຢາເສບຕິດໃນປະເທດ

ລາຍງານ 15 ມິຖຸນາ 2021, ຈາກກໍລະນີທີ່ຄະນະໄອຍະການສານອາຍາລະຫວ່າງປະເທດ (ICC) ທີ່ນະຄອນເຮັກ ປະເທດໂຮນລັງ (ເນເທີແລນ) ຕ້ອງການສືບຕໍ່ຂະບວນການສືບສວນສອບສວນຢ່າງເປັນທາງການ ແລະ ຢູ່ໃນລະຫວ່າງຂໍອຳນາດຈາກຄະນະຕຸລາການໃຫຍ່ ກໍລະນີທີ່ລັດຖະບານຟິລິບປິນຊຸດປັດຈຸບັນ ໃຊ້ນະໂຍບາຍ “ສົງຄາມຢາເສບຕິດ” ສົ່ງຜົນໃຫ້ມີຜູ້ເສຍຊີວິດເປັນຈຳນວນຫຼາຍ.

ທ່ານ ແຮຣີ ໂຣເກ ໂຄສົກທຳນຽບປະທານປະເທດຟິລິບປິນ ກ່າວເຖິງບັນຫານີ້ໃນລະຫວ່າງການຖະແຫຼງປະຈຳວັນອັງຄານນີ້ວ່າ ຟິລິບປິນຈະບໍ່ໃຫ້ການຮ່ວມມືໃດໆກັບ ICC ເນື່ອງຈາກບໍ່ໄດ້ເປັນພາຄີຂອງທຳມະນູນເຮັກແລ້ວ, ເຖິງແມ່ນວ່າໂດຍຫຼັກການແລ້ວ ICC ຍັງຄົງມີອຳນາດກວດສອບຟິລິບປິນຕໍ່ກັບບັນຫາດັ່ງກ່າວ ເນື່ອງຈາກເປັນສິ່ງທີ່ເກີດຂຶ້ນໃນໄລຍະທີ່ຟິລິບປິນຍັງເປັນໜຶ່ງໃນປະເທດສະມາຊິກຂອງ ICC ຄືລະຫວ່າງເດືອນກໍລະກົດ 2016 – ມີນາ 2019 ແຕ່ປັດຈຸບັນຟິລິບປິນໄດ້ຖອນຕົວຈາກ ICC ຢ່າງເປັນທາງການແລ້ວ.

ພາບ: ທ່ານ ແຮຣີ ໂຣເກ ໂຄສົກທຳນຽບປະທານປະເທດຟິລິບປິນ

ຂະນະດຽວກັນ ທ່ານ ແຮຣີ ໂຣເກ ກ່າວວ່າ ຟິລິບປິນບໍ່ຈຳເປັນຕ້ອງໃຫ້ “ກຸ່ມຄົນຈາກຕ່າງປະເທດ” ເຂົ້າມາກວດສອບນະໂຍບາຍສົງຄາມຢາເສບຕິດຂອງລັດຖະບານ ເນື່ອງຈາກກົນໄກທາງກົດໝາຍຂອງຟິລິບປິນທີ່ກ່ຽວຂ້ອງກັບບັນຫາດັ່ງກ່າວນີ້ ມີປະສິດທິພາບພໍ.

ເຊິ່ງຈາກສະຖິຕິຂອງກະຊວງປ້ອງກັນຄວາມສະຫງົບຟິລິບປິນລະບຸວ່າ ນັບຕັ້ງແຕ່ທ່ານ ໂຣດຼິໂກ ດູເຕເຕ ຂຶ້ນຕຳແໜ່ງປະທານປະເທດ ເມື່ອກາງປີ 2016 ແລະ ໄດ້ມີນະໂຍບາຍສົງຄາມປາບປາມຢາເສບຕິດໃນທັນທີ ຕຳຫຼວດຟິລິບປິນໄດ້ສັງຫານຜູ້ຕ້ອງສົງໄສວ່າພົວພັນຢາເສບຕິດໄປແລ້ວຫຼາຍກວ່າ 6,100 ຄົນ.

- Advertisement -