ຈີນຂໍໃຫ້ NATO ຢຸດເສກສັນປັ້ນແຕ່ງຄຳໃສ່ຮ້າຍປ້າຍສີຈີນ ເພື່ອສ້າງຄວາມຊອບທຳໃຫ້ກຸ່ມຂອງຕົນ

ລາຍງານ 16 ມິຖຸນາ 2021, ຫຼັງຈາກທີ່ອົງການສົນທິສັນຍາອາກລັງຕິກເໜືອ (NATO : ນາໂຕ) ໄດ້ອອກຖະແຫຼງການລະບຸວ່າ ຈີນ ເປັນໄພນາບຂູ່ຕໍ່ລະບຽບການດ້ານຄວາມໝັ້ນຄົງຂອງໂລກ ຢ່າງມີລະບົບແບບແຜນ, ຄະນະຜູ້ຕາງໜ້າຂອງ ສປ.ຈີນ ປະຈຳສະຫະພາບເອີຣົບ (EU) ກໍ່ໄດ້ອອກຖະແຫຼງການຕອບໂຕ້ໃນທັນທີ ເມື່ອວັນທີ 14 ມິຖຸນາ 2021 ທີ່ຜ່ານມາວ່າ: ນາໂຕຄວນເບິ່ງທີ່ການພັດທະນາຂອງຈີນດ້ວຍເຫດ ແລະ ຜົນ, ໃຫ້ຢຸດຕິການເວົ້າເກີນຄວາມຈິງກ່ຽວກັບ “ທິດສະດີໄພນາບຂູ່ຈາກຈີນ” ໃນທຸກຮູບແບບ.

ໂຄສົກຄະນະຜູ້ຕາງໜ້າຂອງ ສປ.ຈີນ ໄດ້ກ່າວວ່າ ເລື່ອງທີ່ນາໂຕ ກ່າວຫາວ່າຈີນສ້າງສິ່ງທ້າທາຍທີ່ມີລັກສະນະເປັນລະບົບ ແມ່ນການ “ໃສ່ຮ້າຍປ້າຍສີ” ຕໍ່ການພັດທະນາສັນຕິພາບຂອງຈີນ ແມ່ນການຕັດສິນທີ່ຜິດພາດຕໍ່ກັບສະພາບການສາກົນ ແລະ ບົດບາດນາໂຕເອງ ອັນສະແດງໃຫ້ເຫັນເຖິງແນວຄິດສົງຄາມເຢັນ.

ຈີນເດີນຕາມແນວທາງນະໂຍບາຍປ້ອງກັນຊາດທີ່ມີລັກສະນະປ້ອງກັນຕົນເອງ ແລະ ພັດທະນາຄວາມທັນສະໄໝທາງທະຫານຢ່າງຊອບທຳ, ເໝາະສົມ ແລະ ເປີດເຜີຍໂປ່ງໃສ ນັ້ນກໍ່ເພື່ອປົກປັກຮັກສາອະທິປະໄຕ, ຄວາມໝັ້ນຄົງ ແລະ ຜົນປະໂຫຍດຂອງຊາດຢ່າງເດັດດ່ຽວ.

ພ້ອມທັງລະບຸວ່າ: ຈີນຈະຕິດຕາມບັນດາການປັບປຸງຍຸດທະສາດຂອງນາໂຕຢ່າງໃກ້ຊິດ ໂດຍສະເພາະການປັບປຸງນະໂຍບາຍຕໍ່ຈີນ ພ້ອມທັງກ່າວເຕືອນວ່າ ຖ້າຜູ້ໃດຢາກທ້າທາຍຢ່າງເປັນລະບົບຕໍ່ກັບຈີນ ຈີນກໍ່ຈະບໍ່ເມີນເສີຍ, ພ້ອມທັງຮຽກຮ້ອງໃຫ້ນາໂຕ ຢຸດຕິການເສກສັນປັ້ນແຕ່ງວ່າ “ຈີນເປັນໄພນາບຂູ່” ເພື່ອໃຊ້ເປັນຂໍ້ອ້າງໃນທາງການສ້າງແນວທາງການເມືອງແບບກຸ່ມ ທີ່ຈະນຳໄປສູ່ການປະເຊີນໜ້າ ແລະ  ກະຕຸ້ນໃຫ້ເກີດການແຂ່ງຂັນທາງພູມສາດການເມືອງ.

ນອກຈາກນີ້, ຖະແຫຼງການຍັງກ່າວເຖິງບັນຫາອາວຸດນິວເຄຼຍ ໂດຍໄດ້ລະບຸວ່າ ຈີນມີອາວຸດນິວເຄຼຍໜ້ອຍກວ່າ ສ.ອາເມຣິກາ ແລະ ບັນດາປະເທດສະມາຊິກນາໂຕອື່ນໆ, ຈີນຍັງໄດ້ໃຫ້ຄຳໝັ້ນສັນຍາວ່າຈະບໍ່ໃຊ້ອາວຸດນິວເຄຼຍຕໍ່ປະເທດທີ່ບໍ່ມີອາວຸດຊະນິດດຽວກັນນີ້.

ເຖິງຢ່າງໃດກໍ່ຕາມ, ທີ່ຜ່ານມາ ຈີນບໍ່ເຄີຍເປີດເຜີຍຈຳນວນຂອງຫົວຮັບນິວເຄຼຍໃນປະເທດ ແຕ່ສະຖາບັນວິໄຈສັນຕິພາບສາກົນສະຕັອກໂຮມ ປະເມີນວ່າ ຈີນອາດຈະມີຫົວຮົບນິວເຄຼຍປະມານ 350 ຫົວ ໃນປີ 2021 ເພີ່ມຈາກ 320 ຫົວ ເມື່ອປີ 2020, ຖ້ານັ້ນເປັນຄວາມຈິງ ຖືວ່າມີຫຼາຍກວ່າສະມາຊິກນາໂຕແຕ່ລະປະເທດ ຍົກເວັ້ນ ສ.ອາເມຣິກາ.

- Advertisement -