ຈີນສົ່ງນັກບິນອະວະກາດ 3 ຄົນ ຂຶ້ນສູ່ສະຖານີອະວະກາດທີ່ສ້າງຂຶ້ນເອງໃນຊື່ ວັງສະຫວັນ

ລາຍງານ 17 ມິຖຸນາ 2021, ຈະຫຼວດ Long March-2F Y12 ຂອງອົງການອະວະກາດແຫ່ງຊາດຈີນ (CNSA) ຖືກປ່ອຍຈາກຖານປ່ອຍພາຍໃນສູນອະວະກາດຈິ້ວສວຽນ ໃນມົນທົນການຊູ ທາງພາກຕາເວັນຕົກສຽງເໜືອຂອງຈີນ ເມື່ອເວລາ 09:22 ໂມງ ຕາມເວລາທ້ອງຖິ່ນ.

ເຊິ່ງຈະຫຼວດ Long March ຈະເຮັດໜ້າທີ່ເປັນຕົວປ່ອຍຍານເຊິນໂຈວ-12 (Shenzhou-12)  ເພື່ອສົ່ງນັກບິນອະວະກາດ 3 ຄົນໄປໄປປະຕິບັດໜ້າເທິງສະຖານະອະວະກາດທຽນກົງ ທີ່ແປວ່າ “ວັງສະຫວັນ” ອັນເປັນສະຖານີອະວະກາດທີ່ຈີນສ້າງຂຶ້ນມາເອງ.

ການສົ່ງຍານເຊິນໂຈວ-12 ຖືເປັນພາລະກິດທີ 3 ຈາກທັງໝົດ 11 ຄັ້ງ ແລະ ເປັນພາລະກິດທຳອິດທີ່ມີມະນຸດເດີນທາງໄປພ້ອມ ໂດຍຈະມີ 4 ພາລະກິດທີ່ຕ້ອງມີນັກບິນອະວະກາດຂຶ້ນໄປພ້ອມ ເນື່ອງຈາກມີຄວາມຈຳເປັນໃນການກໍ່ສ້າງສະຖານີອະວະກາດແຫ່ງທຳອິດຂອງຈີນໃຫ້ສົມບູນ.

ໂດຍການກໍ່ສ້າງສະຖານີອະວະກາດດັ່ງກ່າວນີ້ ໄດ້ເລີ່ມຕົ້ນຂຶ້ນໃນເດືອນເມສາ 2021 ທີ່ຜ່ານມາ, ໂດຍການປ່ອຍຊິ້ນສ່ວນຫຼັກທີ່ຊື່ “ທຽນເຫີ” ເຊິ່ງຈະເຮັດໜ້າທີ່ເປັນສູນກາງໃນການຄວບຄຸມສະຖານີອະວະກາດທຽນກົງ ໂດຍມີຄວາມຍາວທັງໝົດ 16.6 ແມັດ ເສັ້ນຜ່າສູນກາງ 4.2 ແມັດ ແລະ ມີນ້ຳໜັກ 22.5​ ໂຕນ.

ສະຖານີອະວະກາດທຽນກົງຈະມີຮູບຮ່າງຄືກັບອັກສອນຕົວ (T) ໂດຍມີຊິ້ນສ່ວນຫຼັກຢູ່ບໍລິເວນເຄິ່ງກາງ ນັ້ນກໍ່ຄື “ທຽນເຫີ” ແລະ ຈະມີຊິ້ນສ່ວນທີ່ເປັນຫ້ອງປະຕິບັດການທາງວິທະຍາສາດເຊື່ອມຈອດຢູ່ສອງຂ້າງ ນັ້ນກໍ່ຄືຫ້ອງປະຕິບັດການເວິນທຽນ ແລະ ເມິງທຽນ ໂດຍຊິ້ນສ່ວນແຕ່ລະສ່ວນຈະມີນ້ຳໜັກຫຼາຍກວ່າ 20 ໂຕນ ແລະ ເມື່ອສະຖານີອະວະກາດດັ່ງກ່າວເຊື່ອມຈອດກັບຍານອະວະກາດແບບມີມະນຸດຄວບຄຸມ ແລະ ຍານອະວະກາດຂົນສົ່ງວັດຖຸ ນ້ຳໜັກຂອງມັນອາດເກືອບເຖິງ 100 ໂຕນ ໂດຍມີເປົ້າໝາຍສ້າງສະຖານີອະວະກາດແຫ່ງນີ້ໃຫ້ສຳເລັດພາຍໃນປີໜ້າ.

ສະຖານີອະວະກາດທຽນກົງຈະປະຕິບັດພາລະກິດໃນວົງໂຄຈອນຕ່ຳຂອງໂລກ ທີ່ຄວາມສູງລະຫວ່າງ 340-450 ກິໂລແມັດ ໂດຍມີອາຍຸການໃຊ້ງານອອກແບບ 10 ປີ ແຕ່ບັນຕາຜູ້ຊ່ຽວຊານເຊື່ອວ່າມັນສາມາດປະຕິບັດການໄດ້ດົນກວ່າ 15 ປີ ຫາກມີການບຳລຸງຮັກສາ ແລະ ການປົວແປງຢ່າງເໝາະສົມ.

ສຳລັບນັກບິນອະວະກາດ 3 ຄົນທີ່ເດີນທາງໄປນັ້ນປະກອບມີ ທ່ານ ໜີ່ ໄຫເສິງ ອາຍຸ 56 ປີ ທີ່ມີປະສົບການຫຼາຍທີ່ສຸດ, ທ່ານ ຫຼິວ ປໍໝິງ ອາຍຸ 54 ປີ ແລະ ທ່ານ ຖັງ ຮົງປໍ ອາຍຸ 45 ປີ ທັງສາມຄົນມີກຳນົດປະຕິບັດໜ້າທີ່ຢູ່ເທິງສະຖານີອະວະທຽນກົງ ຢູ່ຊິ້ນສ່ວນທຽນເຫີເປັນເວລາ 3 ເດືອນ ເພື່ອທົດສອບລະບົບສຳຄັນ ທີ່ລວມເຖິງລະບົບຊ່ວຍຊີວິດ, ຂະນະທີ່ເຈົ້າໜ້າທີ່ຢູ່ໃນໂລກຈະສັງເກດການສະພາບຮ່າງກາຍ ແລະ ສະພາບຈິດໃຈຂອງນັກບິນອະວະກາດທັງສາມຢ່າງໃກ້ຊິດ ເນື່ອງຈາກທີມນັກບິນອະວະກາດຊຸດຕໍ່ໄປ ຕ້ອງປະຈຳການດົນເຖິງ 6 ເດືອນ.

ໃນດ້ານຂອງທ່ານ ຈີ ສີໝິງ ຮອງຜູ້ອຳນວຍການອົງການອະວະກາດທີ່ມີມະນຸດຄວບຄຸມແຫ່ງ ສປ.ຈີນ (CMSA) ຖະແຫຼງຂ່າວວ່າ ຊິ້ນສ່ວນສ່ວນໃຫຍ່ຂອງຈະຫຼວດ Long March ຈະເຜົາໄໝ້ລະຫວ່າງກັບສູ່ຊັ້ນບັນຍາກາດໂລກ ແລະ ມີໂອກາດກໍ່ໃຫ້ເກີດອັນຕະລາຍຕໍ່ວຽກງານການບິນ ແລະ ພາກພື້ນດິນຕ່ຳຫຼາຍ.

ນອກນີ້, ທ່ານ ຈີ ສີໝິງ ຍັງກ່າວວ່າ ຈີນມຸ່ງໝັ້ນສະແຫວງຫາຜົນປະໂຫຍດຈາກອະວະກາດຢ່າງສັນຕິ ແລະ ຍິນດີໃຫ້ການຮ່ວມມືລະຫວ່າງປະເທດໃນວົງກວ້າງກ່ຽວກັບບັນຫາເສດຊາກຍານອະວະກາດ ເພື່ອນຳມາເຊິ່ງສະຖຽນລະພາບຂອງກິດຈະກຳນອກໂລກໃນໄລຍະຍາວ.

- Advertisement -