ຜູ້ນຳລັດເຊຍ-ສ.ອາເມຣິກາ ພົບປະກັນດ້ວຍບັນຍາກາດ “ຝືນຍິ້ມ” ໂດຍໄຮ້ຂໍ້ຕົກລົງທີ່ສຳຄັນ

ລາຍງານ 17 ມິຖຸນາ 2021, ທ່ານ ໂຈ ໄບເດັນ ປະທານປະເທດ ສ.ອາເມຣິກາ ແລະ ທ່ານ ວະລາດິເມຍ ປູຕິນ ປະທານປະເທດລັດເຊຍ ພົບປະຫາລືກັນທີ່ເມືອງເຈນີວາ ປະເທດສະວິດເຊີແລນ ເມື່ອວັນພຸດ 16 ມິຖຸນາ 2021 ທີ່ຜ່ານມາ ໂດຍເປັນການປຶກສາຫາລືແບບພົບໜ້າຢ່າງເປັນທາງການຄັ້ງທຳອິດຂອງທັງສອງ.

ເຊິ່ງລາຍລະອຽດເບື້ອງເລິກຂອງການປຶກສາຫາລື ທີ່ໃຊ້ເວລາປະມານ 3 ຊົ່ວໂມງ ບໍ່ເປັນທີ່ເປີດເຜີຍພໍປານໃດ, ແຕ່ທ່ານ ໂຈ ໄບເດັນ ກ່າວໃນເວລາຕໍ່ມາວ່າ ຕົນໄດ້ສະແດງຄວາມເປັນຫ່ວງຕໍ່ຜົນປະໂຫຍດທັງໝົດຂອງ ສ.ອາເມຣິກາ ເນັ້ນໄປທີ່ເລື່ອງຄວາມປອດໄພທາງໄຊເບີ, ການຄວບຄຸມດ້ານອາວຸດ ແລະ ສາຍພົວພັນທາງການທູດໃນພາບລວມ.

ເຊິ່ງທັງສອງຝ່າຍຕົກລົງ ຈະເລີ່ມເຈລະຈາເລື່ອງການຄວບຄຸມອາວຸດນິວເຄຼຍ ແລະ ເຫັນດີຮ່ວມກັນທີ່ຈະສົ່ງເອກອັກຄະລັດຖະທູດຂອງແຕ່ລະປະເທດກັບເຂົ້າປະຈຳການໃນໄລຍະເວລາອັນໃກ້ນີ້ ຫຼັງຈາກມີການຮຽກຕົວນັກການທູດກັບປະເທດ ເນື່ອງຈາກ ສ.ອາເມຣິກາ ກ່າວຫາວ່າລັດເຊຍແຊກແຊງການເລືອກຕັ້ງປະເທດປະເທດ ສ.ອາເມຣິກາ ໃນປີ 2020.

ທ່ານ ປູຕິນ ກ່າວເຖິງຂໍ້ຕົກລົງທີ່ອາດເປັນໄປໄດ້ໃນການແລກປ່ຽນນັກໂທດ ພ້ອມທັງສະແດງຄວາມເຊື່ອໝັ້ນວ່າ ສາມາດຫາທາງປະນີປະນອມກັນໄດ້, ເຖິງຢ່າງໃດກໍ່ຕາມ, ຍັງບໍ່ມີທິດທາງຕໍ່ກັບຂໍ້ຕົກລົງໃນບັນຫາອື່ນໆເຊັ່ນ: ຄວາມໝັ້ນຄົງທາງໄຊເບີ, ບັນຫາອູແກຣນ ແລະ ຊະຕາກຳຂອງທ່ານ ອະເລັກຊີ ນາວັນນີ ຜູ້ນຳຝ່າຍຄ້ານຂອງລັດເຊຍ ທີ່ຂະນະນີ້ກຳລັງຮັບໂທດຕິດຄຸກເປັນເວລາ 2 ປີ ເຄິ່ງ, ໂດຍທ່ານ ໂຈ ໄບເດັນ ກ່າວວ່າ ລັດເຊຍຈະໄດ້ຮັບຜົນເສຍຫາຍຢ່າງຮ້າຍແຮງ ຫາກທ່ານ ອາເລັກຊີ ນາວັນນີ ເສຍຊີວິດໃນລະຫວ່າງທີ່ຢູ່ໃນຄຸກ.

ທ່ານ ປູຕິນ ກ່າວວ່າ ສ.ອາເມຣິກາ ບໍ່ມີສິດທີ່ຈະມາສັ່ງສອນ ເລື່ອງສິດທິມະນຸດກັບລັດເຊຍ, ລັດເຊຍບໍ່ຕ້ອງການໃຫ້ເກີດຄວາມວຸ້ນວາຍໃນປະເທດ ພ້ອມທັງກ່າວປຽບທຽບເຫດຈະລາຈົນທີ່ລັດຖະສະພາ ສ.ອາເມຣິກາ ແລະ ການເຄື່ອນໄຫວຂອງຄົນຜິວສີ.

ໃນດ້ານການໂຈມຕີທາງໄຊເບີ ທ່ານ ປູຕິນ ໄດ້ປະຕິເສດ ໂດຍກ່າວວ່າການໂຈມຕີທາງໄຊເບີສ່ວນໃຫຍ່ໃນລັດເຊຍ ມີຕົ້ນກຳເນີດມາຈາກ ສ.ອາເມຣິກາ.

ຂະນະທີ່ທ່ານ ໂຈ ໄບເດນ ກ່າວກັບທ່ານ ປູຕິນວ່າ ທ່ານຈະຮູ້ສຶກແບບໃດ ຫາກມີເມົາແວຮຽກຄ່າໄຖ່ໂຈມຕີທໍ່ສົ່ງນ້ຳມັນຂອງທ່ານ ທ່ານ ປູຕິນຕອບວ່າ ກໍ່ເປັນເລື່ອງໃຫຍ່ ນອກຈາກນີ້ທ່ານ ໂຈ ໄບເດັນ ຍັງກ່າວວ່າ ຫາກລັດເຊຍລະເມີດຕໍ່ມາດຕະການເຫຼົ່ານີ້ ສ.ອາເມຣິກາ ຈະຕອບໂຕ້.

ເຊິ່ງຜົນຂອງການປຶກສາຫາລືຄັ້ງນີ້ໃນທາງປະຕິບັດ ຄືການໂອ້ລົມບົນພື້ນຖານຂອງຄວາມເປັນຈິງ ແລະ ດ້ວຍຜົນປະໂຫຍດພື້ນຖານຂອງທັງສອງປະເທດເປັນສຳຄັນ.

- Advertisement -