ຜູ້ນຳເກົາຫຼີເໜືອ ລະບຸແນວທາງຕໍ່ ສ.ອາເມຣິກາ ໃຫ້ກຽມພ້ອມທັງການເຈລະຈາ ແລະ ປະເຊີນໜ້າ

ສຳນັກຂ່າວສານເກົາຫຼີ (KCNA) ກະບອກສຽງຂອງພັກ ແລະ ລັດຖະບານເກົາຫຼີເໜືອ ລາຍງານວ່າ: ທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເນື້ອ ກ່າວຕໍ່ກອງປະຊຸມຄະນະກຳມະການສູນກາງພັກແຮງງານ ເມື່ອວັນພະຫັດ 17 ມິຖຸນາ 2021 ທີ່ຜ່ານມາ ກ່ຽວກັບ “ແຜນຍຸດທະສາດຕໍ່ ສ.ອາເມຣິກາ” ວ່າຈຸດຢືນຂອງເກົາຫຼີເໜືອຕໍ່ລັດຖະບານ ສ.ອາເມຣິກາ ພາຍໃຕ້ການນຳຂອງທ່ານ ປະທານປະເທດ ໂຈ ໄບເດັນ ຕໍ່ຈາກນີ້ ຕ້ອງມີຄວາມພ້ອມທັງໃນດ້ານການເຈລະຈາ ແລະ ການປະເຊີນໜ້າກັບອີກຝ່າຍ.

ເຊິ່ງທ່ານ ຄິມ ຈອງ-ອຶນ ຕີລາຄາວ່າ ການເຄື່ອນໄຫວດ້ວຍຄວາມດຸ່ນດ່ຽງໃນລັກສະນະດັ່ງກ່າວ ຈະຊ່ວຍຮັກສາສະພາບແວດລ້ອມແຫ່ງສັນຕິພາບ ແລະ ການຮັບປະກັນດ້ານຄວາມໝັ້ນຄົງຂອງຊາດໃຫ້ກັບເກົາຫຼີເໜືອໄດ້.

ເຖິງຢ່າງໃດກໍ່ຕາມ KCNA ບໍ່ໄດ້ລາຍງານເຖິງລາຍລະອຽດໃນລວງເລິກຕໍ່ກັບແນວທາງນະໂຍບາຍດັ່ງກ່າວ ຕາມຄຳກ່າວຂອງຜູ້ນຳເກົາຫຼີເໜືອ, ນອກຈາກນັ້ນ ກ່ອນໜ້ານີ້ບໍ່ພໍເທົ່າໃດວັນ ທ່ານ ຄິມ ຈອງ-ອຶນ ຍອມຮັບວ່າ ເກົາຫຼີເໜືອກຳລັງປະເຊີນກັບບັນຫາຂາດແຄນອາຫານ.

- Advertisement -