ສະມັດຊາອົງການສະຫະປະຊາຊາດ ຮຽກຮ້ອງໃຫ້ໂຈະການສົ່ງອາວຸດໃຫ້ແກ່ມຽນມາ

ລາຍງານ 19 ມິຖຸນາ 2021, ກອງປະຊຸມສະມັດຊາໃຫຍ່ອົງການສະຫະປະຊາຊາດ (UNGA) ມີມະຕິເມື່ອວັນສຸກ 18 ມິຖຸນາ 2021 ທີ່ຜ່ານມາ ດ້ວຍສຽງສ່ວນໃຫຍ່ 119 ສຽງ ຮັບຮອງມະຕິ ວ່າດ້ວຍການຮຽກຮ້ອງໃຫ້ສະມາຊິກ UNGA ຮ່ວມກັນໂຈະການສົ່ງມອບອາວຸດເຂົ້າສູ່ມຽນມາ, ການຂໍໃຫ້ລັດຖະບານທະຫານມຽນມາຍຸຕິການໃຊ້ຄວາມຮຸນແຮງຕໍ່ປະຊາຊົນ, ການຍຸຕິຄຳສັ່ງສະຖານະການສຸກເສີນ ທີ່ມີການບັງຄັບໃຊ້ໃນຂອບເຂດທົ່ວປະເທດ ມາຕັ້ງແຕ່ວັນທີ 1 ກຸມພາ 2021 ທີ່ຜ່ານມາ ເຊິ່ງເປັນວັນທີ່ກອງທັບມຽນມາກໍ່ການລັດຖະປະຫານຍຶດອຳນາດ ແລະ ການຮຽກຮ້ອງໃຫ້ລັດຖະບານທະຫານມຽນມາປະຕິບັດຕາມມະຕິ 5 ຂໍ້ຂອງອາຊຽນ.

ເນື້ອໃນກ່ຽວກັບບັນຫາການປິດລ້ອມດ້ານອາວຸດ ມີການໃຊ້ຖ້ອຍຄຳທີ່ມີຄວາມຮຸນແຮງໜ້ອຍລົງ ເມື່ອທຽບກັບຮ່າງມະຕິເມື່ອກາງເດືອນພຶດສະພາ ທີ່ຜ່ານມາ ເຊິ່ງໃຊ້ຄຳວ່າ “ການໂຈະໂດຍທັນທີ່ຕໍ່ການສະໜັບສະໜູນບໍ່ວ່າທາງກົງ ຫຼື ທາງອ້ອມໃນການສົ່ງມອບອາວຸດ ແລະ ລູກປືນໃຫ້ແກ່ມຽນມາ” ໂດຍການປ່ຽນແປງເນື້ອໃນອາດເປັນໄປຕາມຄວາມຕ້ອງການຂອງສະມາຊິກອາຊຽນທັງ 9 ປະເທດ ຍົກເວັ້ນມຽນມາ.

ເຊິ່ງນອກເໜືອຈາກສຽງຄັດຄ້ານສຽງດຽວຈາກເບລາຣຸດຊີ ມີປະເທດງົດອອກສຽງ 36 ປະເທດ, ສ່ວນທີ່ເຫຼືອບໍ່ເຂົ້າຮ່ວມກອງປະຊຸມ ເຊິ່ງແຫຼ່ງຂ່າວຫຼາຍລາຍລະບຸວ່າ ການທີ່ມະຕິຂອງ UNGA ບໍ່ມີຜົນຜູກພັນທາງກົດໝາຍລະຫວ່າງປະເທດ ເຮັດໃຫ້ກຸ່ມປະເທດທີ່ບໍ່ເຂົ້າຮ່ວມປະຊຸມຕີລາຄາວ່າ ບໍ່ມີຜົນປະໂຫຍດຫຍັງ ແລະ ສະຖານະການໃນມຽນມາເປັນເລື່ອງພາຍໃນຢ່າງແທ້ຈິງ.

ເຖິງຢ່າງໃດກໍ່ຕາມ, ມີການວິເຄາະວ່າ ຫາກພິຈາລະນາລາຍຊື່ປະເທດທີ່ງົດອອກສຽງ ສາມາດສະແດງໃຫ້ເຫັນໄດ້ຫຼາຍຢ່າງ ໂດຍສະເພາະມັນສະທ້ອນໃຫ້ເຫັນຢ່າງຊັດເຈນວ່າ ອາຊຽນຍັງມີຈຸດຢືນແຕກຕ່າງກັນຕໍ່ກັບບັນຫາດັ່ງກ່າວ, ໂດຍໄທ, ລາວ, ກຳປູເຈຍ ແລະ ບຣູໄນ ເຊິ່ງຢູ່ໃນຖານະປະທານອາຊຽນປະຈຳປີນີ້ ງົດອອກສຽງ ລວມທັງຈີນ, ລັດເຊຍ ແລະ ອິນເດຍ ສ່ວນສະມາຊິກອາຊຽນອີກ 6 ປະເທດທີ່ເຫຼືອສະໜັບສະໜູນມະຕິດັ່ງກ່າວ.

- Advertisement -