ຈີນປະກາດເດັດຂາດ ຫ້າມທະນາຄານໃນປະເທດໃຫ້ບໍລິການທຸລະກຳພົວພັນເງິນຄຼິບໂຕ

ລາຍງານ 22 ມິຖຸນາ 2021, ທະນາຄານປະຊາຊົນ ຫຼື ທະນາຄານກາງແຫ່ງ ສປ.ຈີນ ມີຄຳສັ່ງເມື່ອຕົ້ນອາທິດນີ້ ຂໍຄວາມຮ່ວມມືຈາກສະຖາບັນການເງິນ ແລະ ບໍລິສັດໃຫ້ບໍລິການເປັນສື່ກາງໃນການຊຳລະເງິນທຸກຮູບແບບ ໃຊ້ມາດຕະການທີ່ເຂັ້ມງວດ ເພື່ອປ້ອງກັນບໍ່ໃຫ້ສະກຸນເງິນຄຼິບໂຕ ຫຼື ເງິນດິຈິຕອນ ເຂົ້າມາມີບົດບາດໃນຕະຫຼາດການເງິນຂອງປະເທດ.

ຕໍ່ມາທະນາຄານກະສິກຳແຫ່ງ ສປ.ຈີນ ໜຶ່ງໃນສະຖາບັນການເງິນທີ່ໃຫຍ່ທີ່ສຸດຂອງປະເທດ ແລະ ທະນາຄານໄປສະນີຈີນ ປະກາດບໍ່ຮັບທຸລະກຳການເງິນດ້ວຍສະກຸນເງິນດິຈິຕອນ ແລະ ຫາກກວດພົບບັນຊີໃດມີສ່ວນກ່ຽວຂ້ອງກັບເງິນດິຈິຕອນ ບໍ່ວ່າຈະເປັນສະກຸນເງິນໃດກໍ່ຕາມ ທະນາຄານຈະປິດບັນຊີເຫຼົ່ານັ້ນທັນທີ, ຂະນະທີ່ອາລີເພ ກຽມສ້າງລະບົບກວດສອບການເຮັດທຸລະກຳການເງິນທີ່ຜິດກົດໝາຍດ້ວຍສະກຸນເງິນຄຼິບໂຕ.

ການເຄື່ອນໄຫວດັ່ງກ່າວຂອງທະນາຄານແຫ່ງ ສປ.ຈີນ ເກີດຂຶ້ນພາຍຫຼັງທີ່ລັດຖະບານຈີນ ເຂົ້າມ້າງກຸ່ມຂຸດເງິນດິຈິຕ້ອນບິດຄອຍ ເຊິ່ງເປັນສະກຸນເງິນດິຈິຕອນເກົ່າແກ່ສຸດຂອງໂລກ ໃນມົນທົນເສສວນ ເມື່ອທ້າຍອາທິດທີ່ຜ່ານມາ ໂດຍກຸ່ມຂຸດບິດຄອຍທີ່ມົນທົນເສສວນນັ້ນມີຂະໜາດໃຫຍ່ທີ່ສຸດໃນປະເທດ ກວມເອົາອັດຕາສ່ວນຕະຫຼາດຫຼາຍກວ່າ 90% ຂອງການຂຸດບິດຄອຍທັງໝົດໃນຈີນ.

- Advertisement -