ຜູ້ນຳລັດຖະບານທະຫານມຽນມາຂອບໃຈລັດເຊຍ ທີ່ໃຫ້ການສະໜັບສະໜູນທາງການທະຫານ

ລາຍງານ 24 ມິຖຸນາ 2021, ທ່ານ ພົນເອກ ເຊີເກ ຊອຍກູ ລັດຖະມົນຕີກະຊວງປ້ອງກັນປະເທດລັດເຊຍ ໄດ້ໃຫ້ການຕ້ອນຮັບທ່ານ ພົນເອກ ມິນ ອ່ອງ ຫຼ່າຍ ຜູ້ບັນຊາການທະຫານສູງສຸດ ແລະ ຜູ້ນຳລັດຖະບານທະຫານມຽນມາ ທີ່ນະຄອນຫຼວງມົດສະກູ ເມື່ອວັນອັງຄານ 22 ມິຖຸນາ 2021 ທີ່ຜ່ານມາ.

ເຊິ່ງທ່ານ ພົນເອກ ມິນ ອ່ອງ ຫຼ່າຍ ກ່າວໃນຕອນໜຶ່ງຂອງການປຶກສາຫາລືສອງຝ່າຍ ສະແດງຄວາມຂອບໃຈເປັນຢ່າງສູງຕໍ່ການສະໜັບສະໜູນທາງທະຫານຈາກລັດເຊຍ ທີ່ມີສ່ວນສຳຄັນໃນການຍົກລະດັບມຽນມາໃຫ້ເປັນໜຶ່ງໃນປະເທດທີ່ມີກອງທັບທີ່ເຂັ້ມແຂງທີ່ສຸດໃນພູມມິພາກ ແລະ ສະແດງຄວາມເຊື່ອໝັ້ນວ່າສາຍພົວພັນສອງຝ່າຍຈະນັບມື້ນັບແໜ້ນແຟ້ນຍິ່ງຂຶ້ນກວ່າເກົ່າ.

ຂະນະທີ່ທ່ານ ພົນເອກ ເຊີເກ ຊອຍກູ ກ່າວເຖິງສາຍພົວພັນລະຫວ່າງລັດເຊຍ ກັບ ມຽນມາ ວ່າໄລຍະເວລາເປັນສິ່ງພິສູດໄດ້ເປັນຢ່າງດີ ໃນການທີ່ມຽນມາເປັນຮຸ້ນສ່ວນທາງຍຸດທະສາດທີ່ສຳຄັນ ແລະ ເຊື້ອໃຈໄດ້ສຳລັບລັດເຊຍ ແລະ ການຮ່ວມມືທາງການທະຫານຂອງສອງຝ່າຍຖືເປັນອົງປະກອບສຳຄັນຂອງສາຍພົວພັນລະຫວ່າງລັດເຊຍ ແລະ ມຽນມາ.

ສຳລັບການເດີນທາງຢ້ຽມຢາມລັດເຊຍຂອງຜູ້ນຳລັດຖະບານທະຫານມຽນມາໃນຄັ້ງນີ້ ເປັນການເຂົ້າຮ່ວມກອງປະຊຸມດ້ານຄວາມໝັ້ນຄົງ ທີ່ເມືອງເຊນປີເຕີສະເບີກ ແລະ ຈະມີການເຂົ້າພົບການນຳລະດັບສູງດ້ານຄວາມໝັ້ນຄົງຂອງລັດເຊຍ ລວມເຖິງທ່ານ ນິໂຄໄລ ປາຕຣູເຊັບ ປະທານສະພາຄວາມໝັ້ນຄົງແຫ່ງຊາດລັດເຊຍ.

- Advertisement -