ສ.ອາເມຣິກາປະຕິເສດມະຕິສະມັດຊາ UN ບໍ່ຢຸດຂວ້ຳບາດກູບາ ຖ້າບໍ່ປ່ຽນແປງຕາມຄວາມຕ້ອງການ

ລາຍງານ 24 ມິຖຸນາ 2021, ສະມັດຊາໃຫຍ່ອົງການສະຫະປະຊາຊາດ (UNGA) ມີມະຕິໃນກອງປະຊຸມ ເມື່ອວັນພຸດ 23 ມິຖຸນາ 2021 ທີ່ຜ່ານມາ ຕໍ່ມະຕີວ່າດ້ວຍການຮຽກຮ້ອງເປັນູຄັ້ງທີ 29 ຕິດຕໍ່ກັນ ໃຫ້ລັດຖະບານ ສ.ອາເມຣິກາ ຍຸຕິການປິດລ້ອມດ້ານເສດຖະກິດຕໍ່ກູບາ ເຊິ່ງສະມາຊິກມີມະຕິສຽງສ່ວນໃຫຍ່ 184 ສຽງ, ງົດອອກສຽງ 3 ສຽງ ແລະ ຄັດຄ້ານ 2 ສຽງຄື ສ.ອາເມຣິກາ ແລະ ອິດສະຣາແອນ ສ່ວນທີ່ເຫຼືອບໍ່ເຂົ້າຮ່ວມກອງປະຊຸມ.

ເຊິ່ງຕະຫຼອດໄລຍະທີ່ຜ່ານມາ ສ.ອາເມຣິກາອອກສຽງຄັດຄ້ານຕໍ່ກັບບັນຫາດັ່ງກ່າວນີ້ຕະຫຼອດມາ ຍົກເວັ້ນປີ 2016 ທີ່ຜູ້ແທນຂອງ ສ.ອາເມຣິກາໃນ UN ງົດອອກສຽງ ເນື່ອງຈາກຜູ້ນຳ ສ.ອາເມຣິກາ ໃນໄລຍະນັ້ນ ກໍ່ຄືທ່ານ ບາຣັກ ໂອບາມາ ຕ້ອງການຟື້ນຟູສາຍພົວພັນກັບກູບາ.

ເຖິງແມ່ນວ່າຈະມີຄວາມໝາຍໃນທາງການທູດ ແຕ່ການລົງມະຕິຂອງສະມັດຊາໃຫຍ່ອົງການສະຫະປະຊາຊາດບໍ່ມີຜົນຜູກພັນທາງກົດໝາຍລະຫວ່າງປະເທດ ເນື່ອງຈາກລັດຖະສະພາຂອງ ສ.ອາເມຣິກາເທົ່ານັ້ນ ທີ່ຈະສາມາດຍຸຕິມາດຕະການປິດລ້ອມທາງເສດຖະກິດຕໍ່ກູບາໄດ້ ເນື່ອງຈາກເປັນຜູ້ບັນຍັດກົດໝາຍດັ່ງກ່າວ ເຊິ່ງບັງຄັບໃຊ້ມາຍາວນານກວ່າເຄິ່ງສະຕະວັດ.

ຂະນະທີ່ທ່ານ ຣອດນີ ຮັນເຕີ ຜູ້ປະສານງານດ້ານການເມືອງຂອງ ສ.ອາເມຣິກາ ປະຈຳ UN ກ່າວຕໍ່ກອງປະຊຸມວ່າ ລັດຖະບານ ສ.ອາເມຣິກາ ຍັງມີຄວາມຈຳເປັນຕ້ອງດຳເນີນມາດຕະການປິດລ້ອມເກືອບທຸກດ້ານຕໍ່ກູບາ ເຊິ່ງເປັນສ່ວນໜຶ່ງຂອງຄວາມພະຍາຍາມຊຸກດັນໃຫ້ລັດຖະບານກູບາ ປະຕິຮູບຕົນເອງສູ່ການເປັນປະຊາທິປະໄຕ, ເຄົາລົບສິດມະນຸດ ແລະ ໃຫ້ເສລີພາບແກ່ປະຊາຊົນກູບາຫຼາຍກວ່ານີ້.

ໃນດ້ານຂອງທ່ານ ບຼູໂນ ໂຣດຼິເກສ ລັດຖະມົນຕີກະຊວງການຕ່າງປະເທດກູບາ ກ່າວວ່າມາດຕະການປິດລ້ອມຂອງ ສ.ອາເມຣິກາ ແມ່ນບໍ່ຕ່າງຫຍັງກັບເຊື້ອໄວຣັສ ທີ່ກໍ່ໃຫ້ເກີດຄວາມເສຍຫາຍໃຫຍ່ຫຼວງຕໍ່ລະບົບເສດຖະກິດຂອງກູບາຕະຫຼອດມາ ໂດຍສະເພາະໃນປັດຈຸບັນຍິ່ງມີຄວາມເຄັ່ງຕຶງ ເນື່ອງຈາກສະຖານະການການແຜ່ລະບາດຂອງພະຍາດໂຄວິດ-19 ອີກດ້ວຍ.

- Advertisement -