ພັກປະຊາຊົນ ປະຕິວັດລາວ ຈັດປະຊຸມປຶກສາຫາລືແນວທາງແກ້ໄຂ 3 ວາລະສຳຄັນຮີບດ່ວນແຫ່ງຊາດ

ອີງຕາມການລາຍງານຂອງວິທະຍຸກະຈາຍສຽງແຫ່ງຊາດໃຫ້ຮູ້ວ່າ: ພັກປະຊາຊົນ ປະຕິວັດລາວ ໄດ້ຈັດກອງປະຊຸມຄົບຄະນະສະໄໝວິສາມັນ ຂອງຄະນະບໍລິຫານງານສູນກາງພັກ ສະໄໝທີ XI ຂຶ້ນໃນລະຫວ່າງວັນທີ 21- 25 ມິຖຸນາ 2021 ທີ່ສໍານັກງານສູນກາງພັກ, ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ໂດຍມີບັນດາກຳມະການກົມການເມືອງສູນກາງພັກ, ເລຂາທິການສູນກາງພັກ, ກຳມະການສູນກາງພັກສົມບູນ ແລະ ສຳຮອງເຂົ້າຮ່ວມ.

ກອງປະຊຸມຄົບດັ່ງກ່າວໄດ້ມີການຄົ້ນຄວ້າ, ປຶກສາຫາລື ແລະ ໃຫ້ທິດຊີ້ນຳ ຕໍ່ບັນຫາທີ່ເປັນຍຸດທະສາດຕົ້ນຕໍຂອງຊາດ ແລະ ມີຄວາມຈຳເປັນຕ້ອງໄດ້ຮັບການແກ້ໄຂດັ່ງນີ້:

  1. ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ;
  2. ວາລະແຫ່ງຊາດ ວ່າດ້ວຍການສະກັດກັ້ນ ແລະ ແກ້ໄຂບັນຫາຢາເສບຕິດ;
  3. ການສ້າງການຫັນປ່ຽນຢ່າງແຂງແຮງ ແລະ ເລິກເຊິ່ີ່ງ ທຸກຂອດໃນວຽກງານພະນັກງານ.

ໜຶ່ງ: ວາລະແຫ່ງຊາດ ວ່າດ້ວຍການແກ້ໄຂເສດຖະກິດ-ການເງິນ: ກອງປະຊຸມໄດ້ເຫັນດີເປັນເອກະພາບ ຕໍ່ບັນດາຫຼັກການທີ່ລັດຖະບານນຳສະເໜີ ເປັນຕົ້ນ: ສ້າງຄວາມເຂັ້ມແຂງດ້ານການເກັບລາຍຮັບງົບປະມານ; ສົ່ງເສີມການປະຢັດ, ຕ້ານການຟູມເຟືອຍ, ຍົກສູງປະສິດທິຜົນການລົງທຶນ-ລາຍຈ່າຍງົບປະມານ ແລະ ການແກ້ໄຂໜີ້ສິນ; ສ້າງສະຖຽນລະພາບດ້ານເງິນຕາ; ສົ່ງເສີມການຜະລິດ-ບໍລິການ ເພື່ອທົດແທນການນຳເຂົ້າ ແລະ ເປັນສິນຄ້າສົ່ງອອກ (ຫັນປ່ຽນໄປສູ່ສັງຄົມການຜະລິດ) ເພື່ອສ້າງຖານລາຍຮັບເສດຖະກິດທີ່ເຂັ້ມແຂງ; ຍົກສູງປະສິດທິຜົນການຄຸ້ມຄອງລັດດ້ວຍກົດໝາຍ.

ສອງ: ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ: ກອງປະຊຸມໄດ້ເຫັນດີເປັນເອກະພາບ ຕໍ່ບັນດາມາດຕະການ ແລະ ບັນດາແຜນງານທີ່ລັດຖະບານນຳສະເໜີ ດັ່ງນີ້: ສ້າງ, ປັບປຸງກົດໝາຍ ແລະ ນິຕິກຳໃຕ້ກົດໝາຍທີ່ກ່ຽວຂ້ອງກັບບັນຫາຢາເສບຕິດ; ສ້າງຄວາມຮັບຮູ້ໃຫ້ສັງຄົມດ້ວຍການສຶກສາອົບຮົມ ແລະ ໂຄສະນາເຜີຍແຜ່ລະບຽບກົດໝາຍ ແລະ ຜົນຮ້າຍຄວາມເປັນອັນຕະລາຍຂອງຢາເສບຕິດ; ປັບປຸງກົງຈັກການຈັດຕັ້ງ ແລະ ຍົກລະດັບຄວາມສາມາດໃນການເຄື່ອນໄຫວເຮັດໜ້າທີ່ການເມືອງຂອງອົງການປົກປ້ອງກົດໝາຍ ແລະ ພາກສ່ວນທີ່ກ່ຽວຂ້ອງຕໍ່ການແກ້ໄຂບັນຫາຢາເສບຕິດ; ຍົກສູງປະສິດທິພາບດ້ານການຄຸ້ມຄອງ, ຊີ້ນໍາໃນການຈັດຕັ້ງປະຕິບັດຮອບດ້ານ ໃນວຽກງານແກ້ໄຂບັນຫາຢາເສບຕິດ; ປັບປຸງຂີດຄວາມສາມາດການເຄື່ອນໄຫວເຮັດໜ້າທີ່ຂອງລະບົບການເມືອງແຕ່ລະຂັ້ນ ເພື່ອຊີ້ນໍາ-ນໍາພາແກ້ໄຂບັນຫາຢາເສບຕິດທີ່ເກີດຂຶ້ນຢູ່ໃນຂອບເຂດຄວາມຮັບຜິດຊອບຂອງຕົນ ແລະ ວຽກງານຮ່ວມມືສາກົນ.

ສາມ: ການສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງທຸກຂອດໃນວຽກງານພະນັກງານ: ກອງປະຊຸມໄດ້ສຸມໃສ່ຕີລາຄາ ການຈັດຕັ້ງປະຕິບັດວຽກງານພະນັກງານ ໃນໄລຍະຜ່ານມາ ແລະ ເປັນເອກະພາບ ຕໍ່ບັນດາເນື້ອໃນທີ່ຄະນະຈັດຕັ້ງສູນກາງພັກນຳສະເໜີ ເພື່ອແນໃສ່ຍົກສູງຄຸນນະພາບ ຂອງຖັນແຖວພະນັກງານໃນເງື່ອນໄຂໃໝ່ ດັ່ງນີ້: ປັບປຸງ, ສ້າງ ກົດໝາຍ ແລະ ນິຕິກຳຕ່າງໆໃນວຽກງານພະນັກງານ; ການສ້າງ ແລະ ປະຕິບັດແຜນກຳນົດພະນັກງານຢ່າງເປັນລະບົບຕາມທິດຫັນເປັນໜຸ່ມ; ວຽກບຳລຸງ-ສ້າງພະນັກງານ;ການປະຕິບັດລະບອບຄຸ້ມຄອງ, ຕິດຕາມກວດກາຕໍ່ພະນັກງານຢ່າງເຂັມງວດ; ການປັບປຸງລະບອບເລືອກເຟັ້ນ ແລະ ສັບຊ້ອນ, ຈັດວາງພະນັກງານ; ວຽກຕີລາຄາ, ປະເມີນຜົນການປະຕິບັດໜ້າທີ່ຂອງພະນັກງນ-ລັດຖະກອນ; ການປັບປຸງລະບອບນະໂຍບາຍ, ສະຫວັດດີການສັງຄົມ ຕໍ່ພະນັກງານ; ວຽກປະຕິບັດມາດຕະການລົງວິໄນຕໍ່ພະນັກງານ.

ໃນກອງປະຊຸມທ່ານ ທອງລຸນ ສີສຸລິດ ໄດ້ເນັ້ນໜັກ ບັນຫາສຳຄັນຈຳນວນໜື່ງດັ່ງນີ້: ວາລະແຫ່ງຊາດ ເຖິງບໍ່ແມ່ນບັນຫາໃໝ່ ແຕ່ກໍ່ເປັນເທື່ອທຳອິດ ທີ່ກອງປະຊຸມໄດ້ຍົກຂື້ນ ເພື່ອແນໃສ່ນຳພາແກ້ໄຂບັນຫາເສດຖະກິດ-ການເງິນ ແລະ ບັນຫາຢາເສບຕິດ ໃຫ້ມີການຫັນປ່ຽນໃໝ່ຢ່າງແຂງແຮງ, ເລິກເຊີ່ງເຖິງຖອງ ແລະ ຖຶກຈັດຕັ້ງປະຕິບັດໃຫ້ປະກົດຜົນເປັນຈິງໄດ້ ບັນດາເນື້ອໃນທັງໝົດນັ້ນ ລ້ວນແຕ່ເປັນບັນຫາຈຳເປັນຮີບດ່ວນ, ເຊິ່ງຮຽກຮ້ອງໃຫ້ທົ່ວພັກ-ທົ່ວລັດ ແລະ ທົ່ວປວງຊົນລາວທັງຊາດ ຕ້ອງພ້ອມກັນສ້າງຄວາມຕັດສິນໃຈ ເປັນເອກະພາບໃນລະດັບສູງ.

- Advertisement -