ກູບາ ປະສົບຄວາມສຳເລັດພັດທະນາວັກແຊັງຕ້ານໂຄວິດ-19 ຂຶ້ນເອງຊື່ Abdala ມີປະສິດທິພາບ 92%

ລາຍງານ 26 ມິຖຸນາ 2021, ສະຖາບັນຟິນເລ (Finlay Institute) ເຊິ່ງເປັນໜຶ່ງໃນອົງການວິໄຈດ້ານວິທະຍາສາດຊັ້ນນຳຂອງກູບາ ຮ່ວມກັບສູນວິສະວະກຳພັນທຸກຳ ແລະ ເຕັກໂນໂລຊີແຫ່ງຊາດກູບາ (Center for Genetic Engineering and Biotechnology) ໄດ້ຖະແຫຼງເມື່ອວັນທີ 21 ມິຖຸນາ 2021 ທີ່ຜ່ານມາ ເປີດຕົວວັກແຊັງຕ້ານພະຍາດໂຄວິດ-19 ທີ່ພັດທະນາຂຶ້ນເອງ ໂດຍເປັນແບບທີ່ຮຽກວ່າ “Subunit” ຄືການໃຊ້ໂປຼຕີນບາງສ່ວນຂອງເຊື້ອຈຸລະໂລກໂຄໂຣນາເພື່ອກະຕຸ້ນພູມຄຸ້ມກັນ ວັກແຊັງດັ່ງກ່າວມີຊື່ທາງເຕັກນິກວ່າ CIGB-66 ແລະ ຊື່ທາງການຄ້າວ່າ “ອັບດາລາ” (Abdala).

ເຊິ່ງຜົນການທົດສອບປະສິດທິພາບໃນໄລຍະທີ່ສາມ ປາກົດໃນເບື້ອງຕົ້ນວ່າ ວັກແຊັງອັບດາລາ ທີ່ຕ້ອງສັກ 3 ເຂັມ ມີປະສິດທິພາບ 92.28% ຖືວ່າເກີນມາດຕະຖານທີ່ອົງການອະນາໄມໂລກ (WHO) ຕັ້ງໄວ, ເຊິ່ງກູບາໄດ້ເລີ່ມສັກວັກແຊັງປ້ອງກັນພະຍາດໂຄວິດ-19 ໃຫ້ແກ່ປະຊາຊົນ ເມື່ອເດືອນພຶດສະພາ ທີ່ຜ່ານມາ ໂດຍໃຊ້ວັກແຊັງທີ່ພັດທະນາຂຶ້ນເອງທັງໝົດ.

ການເຄື່ອນໄຫວດັ່ງກ່າວເກີດຂຶ້ນພຽງບໍ່ພໍເທົ່າໃດວັນ ພາຍຫຼັງທີ່ສະຖາບັນຟິນເລລາຍງານຜົນການທົດສອບປະສິດທິພາບຂອງວັກແຊັງຕ້ານໂຄວິດ-19 ອີກຢ່າງໜຶ່ງຄື FINLAY-FR-2 ຫຼື Soberaba 2 ເປັນວັກແຊັງທີ່ພັດທະນາໂດຍໃຊ້ເຕັກໂນໂລຊີ Conjugate ຜະລິດຈາກສ່ວນໜຶ່ງຂອງເຊື້ອຈຸລະໂລກໂຄໂຣນາ ມີປະສິດທິພາບ 62% ຫາກສັກຄົບ 2 ເຂັມ ຈາກທັງໝົດ 2 ເຂັມ.

ຂະນະນີ້, ມີຫຼາຍປະເທດໂດຍສະເພາະຫວຽດນາມ, ອາກຊັງຕິນ ແລະ ອີຣານ ໃຫ້ຄວາມສົນໃຈຕິດຕໍ່ຂໍຊື້ວັກແຊັງຈາກກູບາແລ້ວ, ນອກຈາກນີ້ ກູບາຍັງໄດ້ໃຫ້ການຊ່ວຍເຫຼືອວັກແຊັງອັບດາລາ ຈຳນວນ 30,000 ຫຼອດ ໃຫ້ແກ່ເວເນຊູເອລາ ເມື່ອວັນທີ 24 ມິຖຸນາ 2021 ທີ່ຜ່ານມາ.

ເຊິ່ງທາງການກູບາຄາດວ່າ ວັກແຊັງທັງ 2 ແບບທີ່ກ່າວມານັ້ນ ຈະໄດ້ຮັບການອະນຸມັດໃຫ້ໃຊ້ເປັນກໍລະນີສຸກເສີນ ແລະ ຈະໄດ້ຮັບການຮັບຮອງຈາກອົງການອະນາໄມໂລກ ໂດຍຂະບວນການຮັບຮອງຈະເລີ່ມຂຶ້ນໃນອີກບໍ່ພໍເທົ່າໃດວັນຂ້າງໜ້ານີ້ ເຊິ່ງໃຊ້ເວລາບໍ່ດົນ ກໍ່ຈະເຮັດໃຫ້ທົ່ວໂລກມີວັກແຊັງອີກ 2 ຊະນິດເຂົ້າມາເສີມສ້າງພູມຄຸ້ມກັນ ເພື່ອຮັບມືກັບການແຜ່ລະບາດຂອງພະຍາດໂຄວິດ-19.

ໃນດ້ານຂອງທ່ານ ມີເກັນ ດິແອັດສ-ກາແນນ ປະທານປະເທດກູບາ ໄດ້ຍ້ອງຍໍຊົມເຊີຍຄວາມກ້າວໜ້າໃນການພັດທະນາວັກແຊັງທັງສອງແບບ ເຊິ່ງເປັນວັກແຊັງ 2 ຈາກທັງໝົດ 5 ແບບ ທີ່ກຳລັງພັດທະນາຢູ່ໃນກູບາ, ກູບາເປັນປະເທດທີ່ປົກຄອງດ້ວຍລະບອບສັງຄົມນິຍົມ ແຕ່ເປັນໜຶ່ງໃນປະເທດທີ່ມີລະບົບສາທາລະນະສຸກໄດ້ມາດຕະຖານສູງເປັນອັນດັບຕົ້ນໆຂອງໂລກ ເຖິງແມ່ນວ່າຈະຖືກ ສ.ອາເມຣິກາ ຂວ້ຳບາດປິດລ້ອມທາງເສດຖະກິດຢ່າງໜັກໜ່ວງມາກວ່າເຄິ່ງສະຕະວັດ.

- Advertisement -