47 ປີ ສາຍພົວພັນການທູດ ສປປ.ລາວ-ເກົາຫຼີເໜືອ ມິດສະຫາຍອ້າຍນ້ອງສັງຄົມນິຍົມ

ກະຊວງການຕ່າງປະເທດເກົາຫຼີເໜືອ ໄດ້ອອກບົດຂ່າວ “ປະຫວັດການຮ່ວມມືມິດຕະພາບ ແລະ ການພັດທະນາ ພ້ອມກັບການຮ່ວມແຮງຮ່ວມໃຈກັນເພື່ອກ້າວໄປສູ່ສັງຄົມນິຍົມ” ວ່າ: ວັນທີ 24 ມິຖຸຸນາ 2021 ແມ່ນວັນທີ່ມີຄວາມໝາຍຄວາມສຳຄັນ ເນື່ອງຈາກເປັນຂີດໝາຍປະຫວັດສາດ ຄົບຮອບ 47 ປີ ແຫ່ງການສ້າງຕັ້ງສາຍພົວພັນທາງການທູດລະຫວ່າງເກົາຫຼີເໜືອ ແລະ ສປປ.ລາວ.

ສາຍພົວພັນມິດຕະພາບລະຫວ່າງເກົາຫຼີເໜືອ ແລະ ສປປ.ລາວ ມີຄວາມສະໜິດແໜ້ນລົງເລິກແບບສ່ວນຕົວລະຫວ່າງຜູ້ນຳຮຸ້ນກ່ອນໜ້ານີ້ ອັນເປັນພື້ນຖານຫຼໍ່ຫຼອມ ທີ່ໄດ້ຜັນຂະຫຍາຍການຮ່ວມມືຢ່າງຕໍ່ເນື່ອງ ແລະ ກ້າວໄປສູ່ການຮ່ວມກັນຕໍ່ສູ້ຕ້ານຈັກກະພັດ ເພື່ອຄວາມເປັນເອກະລາດ ແລະ ກ້າວໄປສູ່ສັງຄົມນິຍົມ.

ໂດຍໃນປີ 1965 ແລະ 1970 ໄດ້ມີກອງປະຊຸມສຸດຍອດລະຫວ່າງສອງຜູ້ນຳທີ່ຍິ່ງໃຫຍ່ຂອງເກົາຫຼີເໜືອ ແລະ ສປປ.ລາວ ນັ້ນກໍ່ຄືທ່ານ ຄິມ ອິວ ຊຸງ ແລະ ທ່ານ ໄກສອນ ພົມວິຫານ ດ້ວຍສາຍພົວພັນຄືດັ່ງກ່າວ ໄດ້ຖືກຍົກສູງໄປສູ່ການສ້າງຕັ້ງສາຍພົວພັນທາງການທູດລະຫວ່າງສອງປະເທດໃນວັນທີ 24 ມິຖຸນາ 1974.

ໃນປີ 1977 ແລະ 1992 ຍັງໄດ້ມີກອງປະຊຸມຍຸດສອດທີ່ນະຄອນຫຼວງປຽງຢາງ ລະຫວ່າງທ່ານ ຄິມ ອິວ ຊຸງ ແລະ ທ່ານ ໄກສອນ ພົມວິຫານ ອັນໄດ້ເປັນແຮງຊຸກດັນໃຫ້ທັງສອງປະເທດຍຶດໝັ້ນສາຍພົວພັນມິດຕະພາບ ແລະ ການຮ່ວມມືທີ່ຜ່ານການທົດສອບ ແລະ ສິ່ງທ້າທາຍມາຢ່າງຍາວນານເຖິງ 47 ປີ.

ນອກນີ້, ໃນວັນທີ 23 ກັນຍາ 2011, ຜູ້ນຳສູງສຸດຂອງທັງສອງປະເທດໄດ້ພົບປະກັນທີ່ນະຄອນຫຼວງປຽງຢາງ ລະຫວ່າງທ່ານ ຄິມ ຈອງ ອິວ ແລະ ທ່ານ ຈູມມະລີ ໄຊຍະສອນ ເຊິ່ງຖືເປັນໂອກາດຄັ້ງສຳຄັນໃນການເສີມສ້າງ ແລະ ພັດທະນາສາຍພົວພັນແຫ່ງມິດຕະພາບ ແລະ ການຮ່ວມມືລະຫວ່າງສອງປະເທດໃຫ້ກ້າວສູ່ລະດັບທີ່ສູງຂຶ້ນ.

ລັດຖະບານ ແລະ ປະຊາຊົນເກົາຫຼີເໜືອ ຍັງບໍ່ປ່ຽນແປງຄວາມມຸ່ງໝັ້ນຕັ້ງໃຈ ທີ່ຈະຂະຫຍາຍສາຍພົວພັນມິດຕະພາບ ແລະ ການຮ່ວມມືກັບ ສປປ.ລາວ ດ້ວຍແນວຄິດ ໃນການຮ່ວມກັນບັນລຸເປົ້າໝາຍຕາມອຸດົມການສັງຄົມນິຍົມ ເຖິງແມ່ນວ່າສະຖານະການຈະປ່ຽນແປງໄປ.

ເມື່ອສະຫາຍ ທອງລຸນ ສີສຸລິດ ໄດ້ຮັບເລືອກເປັນເລຂາທິການໃຫຍ່ຄະນະບໍລິຫານງານສູງກາງພັກ ປະຊາຊົນ ປະຕິວັດລາວ ໃນເດືອນມັງກອນ 2021 ແລະ ເປັນປະທານປະເທດແຫ່ງ ສປປ.ລາວ ໃນເດືອນມີນາ ປີດຽວກັນ, ສະຫາຍ ຄິມ ຈອງ-ອຶນ ເລຂາທິການໃຫຍ່ພັກແຮງງານເກົາຫຼີ ແລະ ປະທານກຳມາທິການແຫ່ງເກົາຫຼີເໜືອ ໄດ້ສົ່ງສານສະແດງຄວາມຍິນດີ ແລະ ສະແດງຄວາມເຊື່ອໝັ້ນຢ່າງແຮງກ້າ ຕໍ່ສາຍພົວພັນມິດຕະພາບ ແລະ ການຮ່ວມມືແບບດັ້ງເດີມລະຫວ່າງສອງປະເທດຈະດຳເນີນຕໍ່ໄປຢ່າງບໍ່ຢຸດຢັ້ງ.

ໃນອະນາຄົດ, ປະຊາຊົນເກົາຫຼີເໜືອ ຈະຄຽງບ່າຄຽງໄຫຼ່ໃນຖານະມິດສະຫາຍອ້າຍນ້ອງ ໄດ້ຄຽງຄູ່ກັບປະຊາຊົນລາວ ເພື່ອກ້າວໄປສູ່ສັງຄົມນິຍົມຮ່ວມກັນ.

ໃນໂອກາດນີ້, ປະຊາຊົນເກົາຫຼີເໜືອ ຂໍໃຫ້ປະຊາຊົນລາວປະສົບຜົນສຳເລັດທີ່ຍິ່ງໃຫຍ່ກວ່າເກົ່າ ໃນການປະຕິບັດຕາມມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນ ປະຕິວັດລາວ ແລະ ການປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9 ພາຍໃຕ້ການນຳຂອງຂອງພັກປະຊາຊົນ ປະຕິວັດລາວ ທີ່ນຳໂດຍສະຫາຍ ທອງລຸນ ສີສຸລິດ.

- Advertisement -