ຜູ້ນຳ ສ.ອາເມຣິກາ ສັ່ງໃຫ້ໂຈມຕີທາງອາກາດໃນຊີຣີ ແລະ ອິຣັກ ອ່າງເປັນຊ່ອງຊຸມກຸ່ມກໍ່ການຮ້າຍ

ລາຍງານ 28 ມິຖຸນາ 2021, ກະຊວງປ້ອງກັນປະເທດ ສ.ອາເມຣິກາ ອອກຖະແຫຼງການວ່າ ກອງທັບໄດ້ປະຕິບັດການໂຈມຕີທາງອາກາດຮອບໃໝ່ ຕໍ່ເປົ້າໝາຍ 2 ແຫ່ງໃນຊີຣີ ແລະ ອິຣັກ ເມື່ອວັນອາທິດທີ 27 ມິຖຸນາ 2021, ເນື່ອງຈາກກວດພົບວ່າ ກອງກຳລັງຕິດອາວຸດໃຊ້ສະຖານທີ່ເຫຼົ່ານັ້ນເປັນບ່ອນຈັດຕັ້ງກອງກຳລັງ ແລະ ອາວຸດ ແລ້ວໃຊ້ໂດຣນໂຈມຕີທະຫານ ແລະ ຊັບສິນທາງທະຫານຂອງ ສ.ອາເມຣິກາ ໃນອິຣັກ.

ເຊິ່ງລັດຖະບານ ສ.ອາເມຣິກາ ຢືນຢັນວ່າ ປະຕິບັດການທີ່ເກີດຂຶ້ນ ເປັນການຕອບໂຕ້ ແລະ ມີຈຸດປະສົງເພື່ອປ້ອງກັນຕົນເອງ ໂດຍບໍ່ໄດ້ຢືນຢັນຢ່າງເປັນທາງການ ກ່ຽວກັບຂອບເຂດຂອງຄວາມເສຍຫາຍ ແລະ ການສູນເສຍ ເນື່ອງຈາກຍັງຢູ່ໃນຂັ້ນຕອນຂອງການປະເມີນສະຖານະການ, ໂດຍປະຕິບັດການທາງທະຫານດັ່ງກ່າວ ເປັນໄປຕາມຄຳສັ່ງຂອງທ່ານ ໂຈ ໄບເດັນ ປະທານປະເທດ ສ.ອາເມຣິກາ ແລະ ເປັນການອອກຄຳສັ່ງໃນລັກສະນະນີ້ເປັນຄັ້ງທີ 2 ພາຍໃນໄລຍະເວລາປະມານ 5 ເດືອນ ເຊິ່ງຄັ້ງທຳອິດແມ່ນເມື່ອເດືອນກຸມພາ ທີ່ຜ່ານມາ ໃຫ້ກອງທັບ ສ.ອາເມຣິກາ ໂຈມຕີທາງອາກາດແບບສະເພາະເຈາະຈົງໃນຊີຣີ ເພື່ອຕອບໂຕ້ການຍິງຈະຫຼວດໂຈມຕີຖານທັບ ສ.ອາເມຣິກາ ໃນອິຣັກ.

ຂະນະທີ່ແຫຼ່ງຂ່າວດ້ານຄວາມໝັ້ນຄົງຂອງ ສ.ອາເມຣິກາ ໃຫ້ຂໍ້ມູນເພີ່ມເຕີມວ່າ ປະຕິບັດການທາງທະຫານຄັ້ງຫຼ້າສຸດນີ້ໃຊ້ຍົນຮົບ 2 ລຳ ແບບ F-15 ແລະ F-16 ແລະ ນັກບິນສາມາດເດີນທາງກັບມາຍັງຖານທັບໄດ້ຢ່າງປອດໄພ ແຕ່ບໍ່ມີການເປີດເຜີຍວ່າຍົນຮົບທັງສອງລຳປະຈຳການຢູ່ບ່ອນໃດ.

ໃນດ້ານຂອງກອງທັບອິຣັກອອກຖະແຫຼງການປະນາມ ໃນວັນຈັນ 28 ມິຖຸນາ 2021 ນີ້ ວ່າປະຕິບັດການໂຈມຕີທາງອາກາດຂອງກອງທັບ ສ.ອາເມຣິກາ ຕາມເຂດຊາຍແດນເບື້ອງຕາເວັນອອກຂອງປະເທດ ທີ່ຕິດກັບຊີຣີ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 4 ຄົນ ເປັນສະມາຊິກກອງກຳລັງຊາວຊີອະ ຖືເປັນການລະເມີດອະທິປະໄຕ.

- Advertisement -