ລັດຖະມົນຕີກະຊວງການຕ່າງປະເທດລັດເຊຍ ຈະເດີນທາງຢ້ຽມຢາມ ສປປ.ລາວ

ລາຍງານ 2 ກໍລະກົດ 2021, ທ່ານ ນາງ ມາເຣຍ ຊາຄາໂຣວາ ໂຄສົກກະຊວງການຕ່າງປະເທດລັດເຊຍ ຖະແຫຼງເມື່ອວັນພະຫັດ 1 ກໍລະກົດ 2021 ທີ່ຜ່ານມາວ່າ: ທ່ານ ເຊີເກ ລາວາຣົບ ລັດຖະມົນຕີກະຊວງການຕ່າງປະເທດລັດເຊຍ ຈະເດີນທາງຢ້ຽມຢາມ ສປປ.ລາວ ໃນວັນທີ 7 ກໍລະກົດ 2021 ທີ່ຈະມາເຖິງນີ້.

ໂດຍການຢ້ຽມຢາມຄັ້ງນີ້, ທ່ານ ເຊີເກ ລາວາຣົບ ຈະເຂົ້າພົບທ່ານ ທອງລຸນ ສີສຸລິດ ປະທານປະເທດ, ທ່ານ ພັນຄຳ ວິພາວັນ ນາຍົກລັດຖະມົນຕີ ແລະ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ.

ເຊິ່ງທັງສອງຝ່າຍຈະປຶກສາຫາລືການຮ່ວມມືສອງຝ່າຍໃນຂົງເຂດເສດຖະກິດ-ການຄ້າ, ເຕັກນິກ-ວິທະຍາສາດ, ວັດທະນະທຳ ແລະ ແລກປ່ຽນທັດສະນະຕໍ່ກັບບາງບັນຫາໃນພາກພື້ນ ແລະ ສາກົນທີ່ມີຄວາມສົນໃຈຮ່ວມກັນ.

- Advertisement -