ວັກແຊັງປ້ອງກັນໂຄວິດ-19 ກວ່າ 1 ລ້ານຫຼອດຈາກ ສ.ອາເມຣິກາ ຊ່ວຍໃຫ້ ສປປ.ລາວ ຫຍັບເຂົ້າໃກ້ເປົ້າໝາຍ

ໃນວັນທີ 19 ກໍລະກົດ 2021 ນີ້ ໄດ້ມີພິທີມອບ-ຮັບວັກແຊັງປ້ອງກັນພະຍາດໂຄວິດ-19 Johnson and Johnson ຈຳນວນ 1,008,000 ຫຼອດ ຈາກ ສ.ອາເມຣິກາ ມອບໃຫ້ ສປປ.ລາວ ທີ່ສະໜາມບິນສາກົນວັດໄຕ, ຕາງໜ້າກ່າວມອບໂດຍ ທ່ານ ປີເຕີ ເຮມອນ ເອກອັກຄະລັດຖະທູດ ສ.ອາເມຣິກາ ປະຈຳ ສປປ.ລາວ ແລະ ຕາງໜ້າລັດຖະບານລາວ ກ່າວຮັບໂດຍ ທ່ານ ນາງ ປານີ ຢາທໍ່ຕູ້ ຮອງປະທານປະເທດ, ໂດຍມີຜູ້ຕາງໜ້າຈາກອົງການຈັດຕັ້ງສາກົນ ແລະ ຂະແໜງການທີ່ກ່ຽວຂ້ອງເຂົ້າຮ່ວມ ເຊິ່ງວັກແຊັງຈຳນວນດັ່ງກ່າວນັ້ນ ແມ່ນໄດ້ເດີນທາງມາເຖິງ ສປປ.ລາວ ຕັ້ງແຕ່ວັນທີ 16 ກໍລະກົດ 2021 ທີ່ຜ່ານມາ.

ທ່ານ ນາງ ປານີ ຢາທໍ່ຕູ້ ໄດ້ຕີລາຄາສູງຕໍ່ການສືບຕໍ່ຊ່ວຍເຫຼືອຂອງ ສ.ອາເມຣິກາ ແກ່ ສປປ.ລາວ ເຊິ່ງໃນຄັ້ງນີ້ແມ່ນການຊ່ວຍເຫຼືອວັກແຊັງປ້ອງກັນພະຍາດໂຄວິດ-19 ອັນໄດ້ສະແດງໃຫ້ເຫັນເຖິງສາຍພົວພັນທີ່ດີ ລະຫວ່າງສອງປະເທດ ພາຍໃຕ້ຄູ່ຮ່ວມມືແບບກວມລວມລະຫວ່າງ ສ.ອາເມຣິກາ ແລະ ສປປ.ລາວ.

ພ້ອມນັ້ນ, ຍັງໄດ້ສະແດງຄວາມເຊື່ອໝັ້ນວ່າ: ການໄດ້ຮັບວັກແຊັງ Johnson and Johnson ໃນຄັ້ງນີ້ ຈະຊ່ວຍເລັ່ງລັດການບັນລຸເປົ້າໝາຍການສັກວັກແຊັງ ໃຫ້ໄດ້ຢ່າງນ້ອຍ 50% ຂອງປະຊາກອນລາວພາຍໃນທ້າຍປີ 2021 ນີ້.

ໃນດ້ານຂອງທ່ານ ທ່ານ ປີເຕີ ເຮມອນ ກ່າວວ່າ ການຊ່ວຍເຫຼືອໃນມື້ນີ້ ຈະຮັບປະກັນວ່າ ປະຊາຊົນລາວຫຼາຍກວ່າ 1 ລ້ານຄົນ ຫຼື ປະມານ 14% ຂອງປະຊາກອນລາວ ຈະໄດ້ຮັບການສັກວັກແຊັງປ້ອງກັນພະຍາດໂຄວິດ-19 ຢ່າງຄົບຖ້ວນ ແລະ ຈະຊ່ວຍໃຫ້ ສປປ.ລາວ ຫຍັບເຂົ້າໃກ້ເປົ້າໝາຍຕາມທີ່ກຳນົດໄວ້ໃນທ້າຍປີ 2021 ນີ້.

ວັກແຊັງຈຳນວນນີ້ ເປັນການບໍລິຈາກໂດຍກົງຈາກ ສ.ອາເມຣິກາ ໃຫ້ແກ່ ສປປ.ລາວ ເຊິ່ງວັກແຊັງ Johnson and Johnson ແມ່ນຕ່າງຈາກວັກແຊັງຊະນິດອື່ນ ເພາະຈະສັກພຽງເຂັມດຽວເທົ່ານັ້ນ ນັ້ນໝາຍຄວາມວ່າ ສາມາດກວມເອົາປະຊາຊົນລາວຫຼາຍກວ່າ 1 ລ້ານ ໃນຈຳນວນປະຊາກອນທັງໝົດ 7 ລ້ານກວ່າຄົນ.

ນອກນັ້ນ, ວັກແຊັງຊະນິດນີ້ຍັງສາມາດເກັບຮັກສາໄວ້ໃນອຸນຫະພູມຕູ້ເຢັນປົກກະຕິ, ເຊິ່ງເໝາະສົມຕໍ່ການສັກວັກແຊັງກັນພະຍາດໃຫ້ແກ່ປະຊາກອນໃນເຂດຊົນນະບົດ ຫຼື ເຂດຫ່າງໄກສອກຫຼີກທີ່ເຂົ້າເຖິງຍາກ.

ເຊິ່ງກ່ອນໜ້ານີ້ ສປປ.ລາວ ກໍ່ໄດ້ຮັບວັກແຊັງປ້ອງກັນພະຍາດໂຄວິດ-19 AstraZeneca/Oxford ຈຳນວນ 132,000 ຫຼອດ ໃນຕົ້ນເດືອນມິນາ ປີ 2021 ແລະ ວັກແຊັງ Pfizer BioNTech ຈໍານວນ 100,620 ຫຼອດ ໃນຕົ້ນເດືອນມິຖຸນາ ປີ 2021, ເຊິ່ງວັກແຊັງທັງສອງຊະນິດນີ້ ໄດ້ຮັບການຈັດຊື້ຜ່ານໂຄງການໂຄແວັກ  (COVAX Facility).

ນອກຈາກການຊ່ວຍເຫຼືອຂອງໂຄງການໂຄແວັກ (COVAX Facility) ທີ່ກ່າວມາຂ້າງເທິງແລ້ວ, ລັດຖະບານຈີນ ຍັງໄດ້ໃຫ້ການຊ່ວຍເຫຼືອດ້ານວັກແຊັງປ້ອງກັນພະຍາດໂຄວິດ-19 ແກ່ ສປປ.ລາວ ເປັນໄລຍະໆ ມາຮອດປັດຈຸບັນ ລວມເປັນຈຳນວນ 1,900,000 ຫຼອດ ເຊິ່ງທັງໝົດແມ່ນຍີ່ຫໍ້ Sinopharm.

ສ່ວນອົດສະຕຣາລີ ກໍ່ໄດ້ປະກາດມອບການຊ່ວຍເຫຼືອໂດຍກົງດ້ານວັກແຊັງປ້ອງກັນໂຄວິດ-19 ແກ່ ສປປ.ລາວ ຈຳນວນ 1,000,000 ຫຼອດ ເມື່ອວັນທີ 12 ພຶດສະພາ 2021 ທີ່ຜ່ານມາ ເຊິ່ງຄາດວ່າປັດຈຸບັນນີ້ ກຳລັງຢູ່ໃນຂະບວນການຈັດຊື້.

ນອກນັ້ນ, ລັດຖະບານຍີ່ປຸ່ນ ຍັງໄດ້ປະກາດເມື່ອວັນທີ 13 ກໍລະກົດ 2021​ ທີ່ຜ່ານມາ ວ່າຈະສະໜອງວັກແຊັງປ້ອງກັນໂຄວິດ-19 ຍີ່ຫໍ້ AstraZeneca/Oxford ຈຳນວນ 600,000 ຫຼອດໃຫ້ແກ່ ສປປ.ລາວ ຜ່ານໂຄງການໂຄແວັກ (COVAX Facility) ໂດຍໄວທີ່ສຸດພາຍຫຼັງສຳເລັດການປະສານງານດ້ານການຂົນສົ່ງທີ່ຈຳເປັນ.

ໂດຍອີງຕາມການລາຍງານຂອງກະຊວງສາທາລະນະສຸກ ມາຮອດວັນທີ 19 ກໍລະກົດ 2021 ນີ້, ທົ່ວປະເທດມີຜູ້ໄດ້ຮັບວັກແຊັງເຂັມທີ 1 ແລ້ວ 1,051,513 ຄົນ ແລະ ສັກຄົບ 2 ເຂັມແລ້ວ 730,109 ຄົນ, ສ່ວນຍອດຜູ້ຕິດເຊື້ອສະສົມໃນທົ່ວປະເທດແມ່ນ 3,540 ຄົນ, ກຳລັງປິ່ນປົວຢູ່ 1,224 ຄົນ ແລະ ເສຍຊີວິດສະສົມລວມ 5 ຄົນ.

- Advertisement -