ສະວິດຜູ້ໃຫ້ຊ່ວຍເຫຼືອລາຍໃຫຍ່ອັນດັບ 8 ແກ່ ສປປ.ລາວ ລົງນາມຊ່ວຍເຫຼືອ 65 ລ້ານໂດລາ ໃນ 4 ປີຕໍ່ໜ້າ

ອີງຕາມການລາຍງານຂອງກະຊວງການຕ່າງປະເທດ, ທ່ານ ອິກນາຊີໂອ ກາດສິດສ ຮອງປະທານປະເທດ, ລັດຖະມົນຕີກະຊວງການຕ່າງປະເທດສະວິດ ໄດ້ເດີນທາງຢ້ຽມຢາມ ສປປ.ລາວ ໃນລະຫວ່າງວັນທີ 3-4 ສິງຫາ 2021 ທີ່ຜ່ານມາ ໃຫ້ກຽດຕ້ອນຮັບໂດຍທ່ານ ທອງລຸນ ສີສຸລິດ ປະທານປະເທດ.

ນອກນີ້, ທ່ານ ອິກນາຊີໂອ ກາດສິດສ ຍັງໄດ້ພົບປະກັບທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ໂດຍສອງຝ່າຍໄດ້ຮ່ວມລົງນາມໃນສັນຍາ ວ່າດ້ວຍການຮ່ວມມືດ້ານເຕັກນິກ, ວັດທະນະທຳ, ເສດຖະກິດ ແລະ ການເງິນ ແລະ ການຊ່ວຍເຫຼືອດ້ານມະນຸດສະທຳລະຫວ່າງລັດຖະບານ ສປປ.ລາວ ແລະ ລັດຖະບານສະວິດ ໃນໄລຍະປີ 2022-2025 ລວມມູນຄ່າປະມານ 65 ລ້ານໂດລາສະຫະລັດ.

ພາບ: ທ່ານ ອິກນາຊີໂອ ກາດສິດສ ຮອງປະທານປະເທດ, ລັດຖະມົນຕີກະຊວງການຕ່າງປະເທດສະວິດ ແລະ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ

ສະວິດ ຖືເປັນປະເທດໃຫ້ຜູ້ການຊ່ວຍເຫຼືອລາຍໃຫຍ່ອັນດັບ 8 ແກ່ ສປປ.ລາວ ແລະ ໄດ້ເປີດຫ້ອງການການຮ່ວມມືຂຶ້ນຢູ່ນະຄອນຫຼວງວຽງຈັນ ໃນປີ 2006.

ນີ້ຖືເປັນການເດີນທາງຢ້ຽມຢາມ ສປປ.ລາວ ຄັ້ງທຳອິດ ຂອງລັດຖະມົນຕີກະຊວງການຕ່າງປະເທດສະວິດ ນັບຕັ້ງແຕ່ສ້າງຕັ້ງສາຍພົວພັນການທູດຮ່ວມກັນໃນປີ 1963.

ໃນດ້ານຂອງທ່ານ ທອງລຸນ ສີສຸລິດ ໄດ້ສະແດງຄວາມຂອບໃຈ ຕໍ່ການຊ່ວຍເຫຼືອອັນລ້ຳຄ່າຂອງລັດຖະບານ ແລະ ປະຊາຊົນສະວິດໃຫ້ແກ່ ສປປ.ລາວ ໃນໄລຍະຜ່ານມາ ທັງໃນຂອບສອງຝ່າຍ ແລະ ຫຼາຍຝ່າຍ ເປັນຕົ້ນ ຂົງເຂດກະສິກຳ ແລະ ຄ້ຳປະກັນສະບຽງອາຫານ, ການປົກຄອງ ແລະ ການມີສ່ວນຮ່ວມຂອງປະຊາຊົນ, ອາຊີວະສຶກສາ, ການຈ້າງງານ ແລະ ການພັດທະນາສີມືແຮງງານ.

ສ່ວນທ່ານ ອິກນາຊີໂອ ກາດສິດສ ສະແດງຄວາມເຊື່ອໝັ້ນວ່າ ຂໍ້ຕົກລົງດັ່ງກ່າວນີ້ຈະສາມາດປະກອບສ່ວນສ້າງຄວາມສົມດຸນໃຫ້ແກ່ເສດຖະກິດ ແລະ ສ້າງຄວາມກ້າວໜ້າໃຫ້ແກ່ສັງຄົມລາວ.

- Advertisement -