ອາຊຽນຈະບໍ່ເຊີນມຽນມາຮ່ວມປະຊຸມສຸດຍອດ, ດ້ານມຽນມາວິຈານວ່າເປັນການແຊງແຊກຈາກພາຍນອກ

ລາຍງານ 16 ຕຸລາ 2021, ກະຊວງການຕ່າງປະເທດຂອງບຣູໄນ ໃນຖານະປະທານອາຊຽນ ປະຈຳປີນີ້ ອອກຖະແຫຼງການ ກ່ຽວກັບຜົນການປະຊຸມວາລະສຸກເສີນຂອງລັດຖະມົນຕີກະຊວງການຕ່າງປະເທດອາຊຽນ ທີ່ຈັດຂຶຶ້ນເມື່ອວັນສຸກ 15 ຕຸລາ ທີ່ຜ່ານມາ ວ່າ: ຈະບໍ່ເຊີນທ່ານ ພົນເອກ ມິນ ອ່ອງ ຫຼ່າຍ ຜູ້ນຳລັດຖະບານທະຫານມຽນມາເຂົ້າຮ່ວມປະຊຸມສຸດຍອດອາຊຽນ ທີ່ຈະຈັດຂຶ້ນໃນລະຫວ່າງວັນທີ 26-28 ຕຸລາ 2021 ທີ່ຈະມາເຖິງນີ້, ເນື່ອງຈາກລັດຖະບານທະຫານມຽນມາ ບໍ່ມີຄວາມຄືບໜ້າໃນການນຳຄວາມສະຫງົບກັບຄືນສູ່ປະເທດ ລວມທັງການຍຸຕິການໃຊ້ຄວາມຮຸນແຮງຕາມທີ່ໄດ້ຕົກລົງໄວ້ກັບອາຊຽນເມື່ອເດືອນເມສາ ທີ່ຜ່ານມາ.

ຖະແຫຼງການຍັງລະບຸອີກວ່າ: ອາຊຽນບໍ່ສາມາບັນລຸຄວາມເປັນເອກະພາບກັນ ໃນການອະນຸຍາດໃຫ້ລັດຖະບານທະຫານມຽນມາ ແລະ ລັດຖະບານແຫ່ງຊາດມຽນມາ ຫຼື ລັດຖະບານເງົາທີ່ປະກອບດ້ວຍອະດີດສະມາຊິກສະພາມຽນມາທີ່ມາຈາກການເລືອກຕັ້ງ ທີ່ຖືກລັດຖະບານທະຫານປົດອອກ ເຂົ້າຮ່ວມປະຊຸມສຸດຍອດອາຊຽນທີ່ກຳລັງຈະເກີດຂຶ້ນ.

ເຖິງຢ່າງໃດກໍ່ຕາມ ເພື່ອເປັນການເປີດກວ້າງໃນມຽນມາໄດ້ຟື້ນຟູວຽກງານພາຍໃນຂອງຕົນ ລັດຖະມົນຕີກະຊວງການຕ່າງປະເທດຂອງສະມາຊິກອາຊຽນ ໄດ້ຕົກລົງເຫັນດີວ່າ ຈະເຊີນຕົວແທນທີ່ບໍ່ກ່ຽວຂ້ອງກັບການເມືອງຂອງມຽນມາເຂົ້າຮ່ວມປະຊຸມແທນ.

ແຕ່ກໍ່ຍັງບໍ່ຊັດເຈນວ່າ ຕົວແທນຈາກມຽນມາຈະແມ່ນໃຜ ແລະ ຈະໃຊ້ກົດເກນໃດກຳນົດບຸກຄົນເຫຼົ່ານັ້ນ ເພື່ອເປັນກາງທາງການເມືອງຢ່າງແທ້ຈິງ ແລະ ການຕັດສິນໃຈອາດຫຍຸ້ງຍາກຊັບຊ້ອນຫຼາຍຂຶ້ນ ຫາກລັດຖະບານທະຫານ ແລະ ລັດຖະບານແຫ່ງຊາດຕ່າງກໍ່ສະເໜີຊື່ຄົນຂອງຕົນເອງເຂົ້າຮ່ວມ.

ເຊິ່ງນີ້ຖືເປັນການເຄື່ອນໄຫວທີ່ເກີດຂຶ້ນໄດ້ຍາກສຳລັບອາຊຽນ ທີ່ຍຶດໝັ້ນຫຼັກການບໍ່ແຊກແຊງວຽກງານພາຍໃນຂອງກັນ ແລະ ກັນລະຫວ່າງປະເທດສະມາຊິກ.

ໃນດ້ານຂອງທ່ານ ພົນເອກ ພິເສດ ຈໍ ມິນ ຕຸນ ໂຄສົກລັດຖະບານທະຫານມຽນມາກ່າວວ່າ ການທີ່ຜູ້ນຳລັດຖະບານທະຫານມຽນມາບໍ່ໄດ້ຖືກຮັບເຊີນເຂົ້າຮ່ວມກອງປະຊຸມສຸດຍອດອາຊຽນ ທີ່ປະເທດບຣູໄນນັ້ນ ຖືເປັນຜົນມາຈາກແຮງກົດດັນຂອງ ສ.ອາເມຣິກາ ແລະ ສະຫະພາບເອີຣົບ ທີ່ມີຕໍ່ສະມາຊິກອາຊຽນອີກ 9 ປະເທດ.

ໂຄສົກລັດຖະບານທະຫານມຽນມາກ່າວຕໍ່ອີກວ່າ ສະຖານະການທີ່ເກີດຂຶ້ນສະແດງໃຫ້ເຫັນຢ່າງຊັດເຈນວ່າ ມີການແຊກແຊງຈາກຕ່າງປະເທດ ເນື່ອງຈາກໃນເວລາດຽວກັນ ຂໍ້ມູນຂ່າວກອງຂອງມຽນມາລະບຸວ່າ ເຈົ້າໜ້າທີ່ການທູດຂອງສະມາຊິກອາຊຽງບາງປະເທດ ໄດ້ມີການພົບປະກັບຜູ້ແທນຂອງ ສ.ອາເມຣິກາ ແລະ ສະຫະພາບເອີຣົບ ພາຍໃຕ້ແຮງກົດດັນ.

ສ່ວນໃນດ້ານຂອງສຳນັກງານເລຂາທິການອາຊຽນໃນນະຄອນຫຼວງຈາກາຕາ ປະເທດອິນໂດເນເຊຍ ແລະ ກະຊວງການຕ່າງປະເທດບຣູໄນ ໃນຖານະປະທານອາຊຽນປະຈຳປີນີ້ ຍັງບໍ່ມີທ່າທີຢ່າງເປັນທາງການຕໍ່ຄຳວິພາກວິຈານຂອງລັດຖະບານທະຫານມຽນມາ, ຂະນະທີ່ກະຊວງການຕ່າງປະເທດ ສ.ອາເມຣິກາ ກ່າວວ່າມະຕິຂອງອາຊຽນນັ້ນ ແມ່ນມີຄວາມເໝາະສົມແລ້ວ.

- Advertisement -