ຈີນເຕືອນ ສ.ອາເມຣິກາຢ່າລ້ຳເສັ້ນ, ຂະນະທີ່ ສ.ອາເມຣິກາ ກໍ່ກ່າວວ່າພ້ອມປົກປ້ອງຜົນປະໂຫຍດຂອງຕົນ

ລາຍງານ 16 ພະຈິກ 2021, ທຳນຽບຂາວອອກຖະແຫຼງການ ຜົນກອງປະຊຸມປຶກສາຫາລືຜ່ານລະບົບທາງໄກອິເລັກໂຕຼນິກ ລະຫວ່າງທ່ານ ໂຈ ໄບເດັນ ປະທານປະເທດ ສ.ອາເມຣິກາ ກັບ ທ່ານ ສີ ຈິ້ນຜິງ ປະທານປະເທດຈີນວ່າ: ຜູ້ນຳ ສ.ອາເມຣິກາມີຄວາມເປັນຫ່ວງເລື່ອງນະໂຍບາຍຂອງລັດຖະບານຈີນ ຕໍ່ກັບເຂດປົກຄອງຕົນເອງຊິນຈຽງອຸຍກູ, ເຂດປົກຄອງຕົນເອງຕິເບດ ແລະ ເຂດບໍລິຫານພິເສດຮົງກົງ ໂດຍສະເພາະແມ່ນບັນຫາສິດທິມະນຸດ.

ຂະນະດຽວກັນ, ທ່ານ ໂຈ ໄບເດັນ ຢືນຢັນວ່າ: ລັດຖະບານ ສ.ອາເມຣິກາ ຍັງຍຶດໝັ້ນຕໍ່ນະໂຍບາຍຈີນດຽວ ແຕ່ ສ.ອາເມຣິກາບໍ່ເຫັນດີນຳ ກັບຄວາມພະຍາຍາມຝ່າຍດຽວຂອງຈີນ ເພື່ອປ່ຽນແປງສະຖານະຂອງໄຕ້ຫວັນ ເຊິ່ງບັນຫານີ້ທ່ານ ສີ ຈິ້ນຜິງ ໄດ້ຕອບກັບວ່າ: ໄຕ້ຫວັນເປັນສ່ວນໜຶ່ງຂອງຈີນ ແລະ ລັດຖະບານຈີນພ້ອມໃຊ້ມາດຕະການຕອບໂຕ້ໃນທັນທີ ຫາກມີການລ່ວງລ້ຳຈາກກອງກຳລັງສະໜັບສະໜູນການແບ່ງແຍກດິນແດນຂອງໄຕ້ຫວັນ.

ເຖິງຢ່າງໃດກໍ່ຕາມ, ຜູ້ນຳຈີນເຫັນດີຮ່ວມກັບຜູ້ນຳ ສ.ອາເມຣິກາ ໃນການຍົກລະດັບການຮ່ວມມືດ້ານການຕໍ່ສູ້ກັບວິກິດໂລກຮ້ອນ, ພ້ອມທັງເນັ້ນໜັກວ່າ ທັງສອງປະເທດຕ້ອງເພີ່ມການຕິດຕໍ່ສື່ສານ ເພື່ອຜ່ານຜ່າສິ່ງທ້າທາຍທີ່ມີຮ່ວມກັນ ແລະ ເພື່ອຫຼີກລ້ຽງຄວາມເຂົ້າໃຈຜິດຈາກການເຄື່ອນໄຫວຂອງແຕ່ລະຝ່າຍ ແລະ ຈີນພ້ອມໃຫ້ການຮ່ວມມືກັບ ສ.ອາເມຣິກາ ໃນດ້ານທີ່ຈະເຮັດໃຫ້ເກີດຜົນປະໂຫຍດຕໍ່ປະຊາຄົມໂລກ.

ໃນດ້ານຂອງທ່ານ ໂຈ ໄບເດັນ ກ່າວໃນບັນຫານີ້ວ່າ ແມ່ນຢູ່ທີ່ ສ.ອາເມຣິກາ ແລະ ຈີນຕ້ອງແຂ່ງຂັນກັນໃນເກືອບທຸກດ້ານ ແຕ່ການແຂ່ງຂັນນັ້ນຕ້ອງກົງໄປກົງມາ ບໍ່ນຳໄປສູ່ຄວາມຂັດແຍ່ງ ແລະ ລັດຖະບານ ສ.ອາເມຣິກາກໍ່ພ້ອມດຳເນີນການຕ່າງໆ ເພື່ອປົກປ້ອງ ແລະ ຮັກສາຜົນປະໂຫຍດໃຫ້ກັບຜູ້ປະກອບການຂອງ ສ.ອາເມຣິກາໃນຈີນ.

- Advertisement -