ລັດເຊຍທົດລອງຂີປະນາວຸດຕໍ່ຕ້ານດາວທຽມ ສ້າງຄວາມບໍ່ພໍໃຈຢ່າງຍິ່ງໃຫ້ກັບ ສ.ອາເມຣິກາ

ລາຍງານ 16 ພະຈິກ 2021, ກອງທັບອະວະກາດ ສ.ອາເມຣິກາ ອອກຖະແຫຼງການເມື່ອວັນທີ 15 ພະຈິກ 2021​ ທີ່ຜ່ານມາວ່າ ລັດເຊຍໄດ້ທຳການທົດລອງຂີປະນາວຸດຕໍ່ຕ້ານດາວທຽມ ໂຈມຕີເປົ້າໝາຍທີ່ເປັນດາວທຽມດວງໜຶ່ງ ຂອງລັດເຊຍເອງທີ່ບໍ່ໄດ້ໃຊ້ແລ້ວ.

ດ້ານອົງການບໍລິຫານການບິນ ແລະ ອະວະກາດແຫ່ງຊາດ ສ.ອາເມຣິກາ (NASA) ກໍ່ໄດ້ຕຳນິອົງການອະວະກາດລັດເຊຍ (Roscosmos) ຕໍ່ກັບການທົດລອງດັ່ງກ່າວ ທີ່ສົ່ງຜົນໃຫ້ເກີດ “ຂີ້ເຫຍື້ອອະວະກາດ” ຢ່າງໜ້ອຍ 1,500 ອັນ ທີ່ຍັງສາມາດເບິ່ງເຫັນໄດ້ຜ່ານເຣດາ ແລະ ກ້ອງໂທລະທັດ ແລະ ຍັງມີຊິ້ນສ່ວນຂະໜາດນ້ອຍອີກນັບບໍ່ຖ້ວນທີ່ຍັງບໍ່ສາມາດຕິດຕາມໄດ້.

ຂະນະທີ່ນັກບິນອະວະກາດ 7 ຄົນ ທີ່ຢູ່ເທິງສະຖານີອະວະກາດນານາຊາດ (ISS) ປະກອບມີຄົນສັນຊາດອາເມຣິກາ 4 ຄົນ, ລັດເຊຍ 2 ຄົນ ແລະ ເຢຍລະມັນ 1 ຄົນ ຕ້ອງໄດ້ຫຼົບໄພ ແລະ ກຽມການອົບພະຍົມຕາມຂັ້ນຕອນຂອງສະຖານະການສຸກເສີນ ໂດຍສະຖານະການດັ່ງກ່າວເກີດຂຶ້ນພາຍໃນໄລຍະເວລາພຽງ 48 ຊົ່ວໂມງ ຈົນເຖິງວັນຈັນ (15 ພະຈິກ 2021) ທີ່ຜ່ານມາ.

ດ້ານ Roscosmos ອອກຖະແຫຼງການວ່າ: ລະບົບເຕືອນໄພອັດຕະໂນມັດສຳລັບສະຖານະການອັນຕະລາຍ ຍັງຕ້ອງໄດ້ຕິດຕາມສະຖານະການນີ້ຢ່າງໃກ້ຊິດ ເພື່ອປ້ອງກັນ ແລະ ຕອບສະໜອງຕໍ່ຜົນຮ້າຍ ທີ່ອາດສົ່ງຜົນກະທົບຕໍ່ຄວາມປອດໄພຂອງ ISS ແລະ ນັກບິນອະວະກາດທີ່ກຳລັງປະຕິບັດໜ້າທີ່ຢູ່.

ດ້ານວົງໂຄຈອນຂອງຊິ້ນສ່ວນໄດ້ເຄື່ອນຕົວອອກຫ່າງຈາກລັດສະໝີການໂຄຈອນຂອງ ISS ແລ້ວ, ເຖິງແມ່ນວ່າສະຖານະການທີ່ເກີດຂຶ້ນສົ່ງຜົນໃຫ້ນັກບິນອະວະກາດຕ້ອງດຳເນີນການຕາມຂັ້ນຕອນຂອງເຫດການສຸກເສີນ ແຕ່ຕອນນີ້ຖືວ່າ ISS ຢູ່ໃນສະຖານະປອດໄພ.

ເຖິງຢ່າງໃດກໍ່ຕາມ, ທ່ານ ແອນໂທນີ ບລິງເຄນ ລັດຖະມົນຕີກະຊວງການຕ່າງປະເທດ ສ.ອາເມຣິກາກ່າວວ່າ ສະຖານະການຍັງບໍ່ຖືວ່າປອດໄພເຕັມຮ້ອຍ ແລະ ລັດຖະບານ ສ.ອາເມຣິກາ ບໍ່ໄດ້ຮັບການແຈ້ງລ່ວງໜ້າ ວ່າລັດເຊຍຈະທຳການທົດລອງໃນລັກສະນະນີ້ ເຊິ່ງເປັນຄັ້ງທີ 4 ໃນປະຫວັດສາດເທົ່ານັ້ນ ທີ່ມີການຍິງອາວຸດຈາກພື້ນຂຶ້ນໄປທຳລາຍວັດຖຸທີ່ລອຍຢູ່ໃນອະວະກາດ.

ເຊິ່ງ, ຈີນເຄີຍທົດລອງອາວຸດລັກສະນະດຽວກັນນີ້ ໃນປີ 2007 ສົ່ງຜົນໃຫ້ເກີດເສດຊາກກະຈາຍເປັນວົງກວ້າງຈົນນັບບໍ່ຖ້ວນເຊັ່ນກັນ ແລະ ໜຶ່ງໃນຊິ້ນສ່ວນຂະໜາດໃຫຍ່ໄດ້ໂຄຈອນເຂົ້າມາໃກ້ກັບ ISS ເມື່ອອາທິດທີ່ຜ່ານມາ ແຕ່ນັກບິນອະວະກາດໄດ້ຊ່ວຍກັນບັງຄັບເຄື່ອນຍ້າຍສະຖານີ ໃຫ້ພົ້ນອອກຈາກເສັ້ນທາງອັນຕະລາຍໄດ້ທັນເວລາ.

ນອກຈາກນີ້, ສ.ອາເມຣິກາ ແລະ ອິນເດຍກໍ່ເຄີຍທົດລອງອາວຸດຕໍ່ຕ້ານດາວທຽມລັກສະນະນີ້ເຊັ່ນກັນ ເມື່ອປີ 2008 ແລະ 2019 ແຕ່ທັງສອງປະເທດດຳເນີນການໃນລະດັບຄວາມສູງທີ່ຕ່ຳກວ່າ ISS ຫຼາຍ.

- Advertisement -