ລັດຖະບານແຈ້ງ “ບໍ່ເຫັນດີ” ໃຫ້ຂາຍຮຸ້ນທະນາຄານການຄ້າ ໃຫ້ກັບບໍລິສັດ ພູສີ ກຣຸບ

ຫ້ອງວ່າການສຳນັກງານນາຍົກລັດຖະມົນຕີ, ໄດ້ແຈ້ງການເລກທີ 1518/ຫສນຍ, ລົງວັນທີ 17 ພະຈິກ 2021 ເລື່ອງຜົນການຄົ້ນຄວ້າການສະເໜີຂໍຊື້ຮຸ້ນທະນາຄານການຄ້າຕ່າງປະເທດລາວ ມະຫາຊົນ 51% ທີ່ກະຊວງກາເນງິນຖືຄອງຢູ່ ຂອງບໍລິສັດ ພູສີ ກຣຸບ ຈຳກັດ.

ຫ້ອງວ່າການສຳນັກງານນາຍົກລັດຖະມົນຕີ ຂໍຖືເປັນກຽດແຈ້ງການຕົກລົງຂອງຂັ້ນເທິງ ມາຍັງທ່ານຊາບ ແລະ ຈັດຕັ້ງປະຕິບັດດັ່ງນີ້:

1. ໂດຍອີງຕາມການຄົ້ນຄວ້າຂອງກະຊວງການເງິນ ແລະ ທະນາຄານແຫ່ງ ສປປ.ລາວ ເຫັນວ່າ ທະນາຄານການຄ້າຕ່າງປະເທດລາວ ມະຫາຊົນ ເປັນທະນາຄານໄດ້ຈົດທະບຽນໃນຕະຫຼາດຫຼັກຊັບທີ່ມີການເຄື່ອນໄຫວຢ່າງໂປ່ງໃສ ແລະ ມີສະພາບຄ່ອງທາງດ້ານການເງິນໃນລະດັບດີ, ສະນັ້ນ ຈຶ່ງບໍ່ເຫັນດີຂາຍຮຸ້ນຂອງລັດຖະບານໃນທະນາຄານດັ່ງກ່າວ ໃຫ້ພາກສ່ວນອື່ນ. ມອບໃຫ້ກະຊວງການເງິນ ເປັນໃຈກາງສົມທົບກັບທະນາຄານແຫ່ງ ສປປ.ລາວ ສືບຕໍ່ພັດທະນາການດຳເນີນທຸລະກິດຂອງທະນາຄານດັ່ງກ່າວ ໃຫ້ມີຄວາມເຂັ້ມແຂງຂຶ້ນຢ່າງບໍ່ຢຸດຢັ້ງ.

2. ມອບໃຫ້ກະຊວງການເງິນ ໃນນາມຜູ້ຖືຄອງຮຸ້ນຂອງລັດຖະບານໃນທະນາຄານດັ່ງກ່າວ ແຈ້ງຕອບໃຫ້ບໍລິສັດ ພູສີ ກຣຸບ ຈຳກັດ ຮັບຊາບຕາມທີ່ກ່າວມາຂ້າງເທິງນີ້.

- Advertisement -