ລັດເຊຍວິຈານ ສ.ອາເມຣິກາ ຕໍ່ກັບຄວາມພະຍາຍາມທີ່ຈະບໍ່ຍອມຮັບສະຖານະຜູ້ນຳຂອງທ່ານ ປູຕິນ

ລາຍງານ 20 ພະຈິກ 2021, ທ່ານ ເດິມິຕຣີ ເປສຄັອບ ໂຄສົກທຳນຽບປະທານປະເທດລັດເຊຍ ກ່າວເມື່ອວັນສຸກ (19 ພະຈິກ 2021) ທີ່ຜ່ານມາ ກ່ຽວກັບຮ່າງມະຕິຂອງສະພາລ່າງ ສ.ອາເມຣິກາ ວ່າດ້ວຍການບໍ່ຍອມຮັບຄວາມພະຍາຍາມຂອງທ່ານ ວະລາດິເມຍ ປູຕິນ ໃນຖານະຜູ້ນຳລັດເຊຍ ພາຍຫຼັງປີ 2024 ວ່າ: ເປັນການເຄື່ອນໄຫວທາງການເມືອງທີ່ບໍ່ມີເຫດມີຜົນ ບໍ່ເປັນມິດ ແລະ ບໍ່ສ້າງສັນ ມີແຕ່ຈະຍິ່ງເຮັດໃຫ້ທົ່ວໂລກເຫັນໄດ້ປະຈັກແຈ້ງຕື່ມວ່າ ສ.ອາເມຣິກາເປັນປະເທດທີ່ແຊກແຊງວຽກງານພາຍໃນຂອງປະເທດອື່ນໂດຍບໍ່ປິດບັງ.

ຂະນະທີ່ທ່ານ ຄອນສະແຕນຕິນ ໂຄຊາເຊັບ ຮອງປະທານສະພາສູງລັດເຊຍ ວິຈານຮ່າງມະຕິດັ່ງກ່າວ ເປັນການກະທຳເພື່ອສັ່ນຄອນຄວາມພະຍາຍາມໃນການຟື້ນຟູສາຍພົວພັນສອງຝ່າຍ ແລະ ສ.ອາເມຣິກາ ສະແດງອອກຊັດເຈນຕັ້ງແຕ່ຕົ້ນ ວ່າຕ້ອງການແຊກແຊງຂະບວນການເລືອກຕັ້ງປະທານປະເທດລັດເຊຍ.

ໃນດ້ານຂອງທຳນຽບຂາວ ແລະ ກະຊວງການຕ່າງປະເທດ ສ.ອາເມຣິກາ ຍັງບໍ່ມີຄວາມເຫັນຢ່າງເປັນທາງການຕໍ່ກໍລະນີດັ່ງກ່າວນີ້.

ເຖິງຢ່າງໃດກໍ່ຕາມ, ມາຈົນເຖິງປັດຈຸບັນນີ້ ທ່ານ ປູຕິນ ຍັງບໍ່ສະແດງຈຸດຢືນຕໍ່ກັບອະນາຄົດທາງການເມືອງຂອງຕົນ ເມື່ອຄົບວາລະການດຳລົງຕຳແໜ່ງສະໄໝປັດຈຸບັນ ໃນປີ 2024, ເຖິງຢ່າງໃດກໍ່ຕາມ ລັດຖະທຳມະນູນສະບັບໃໝ່ຂອງລັດເຊຍ ທີ່ມີການແກ້ໄຂບາງມາດຕາ ທີ່ບັນຍັດໄວ້ແຕ່ປີ 1993 ເປັນຕົ້ນມາ ແລະ ເນື້ອໃນທີ່ຜ່ານການແກ້ໄຂຜ່ານການລົງປະຊາມະຕິຮັບຮອງແລ້ວ ເມື່ອວັນທີ 1 ກໍລະກົດ 2020 ທີ່ຜົນປາກົດວ່າ 78% ເຫັນດີ ມີການລະບຸກ່ຽວກັບການບໍ່ຈຳກັດໄລຍະເວລາ ສຳລັບບຸກຄົນໃດໜຶ່ງໃນການດຳລົງຕຳແໜ່ງທາງການເມືອງ ລວມທັງຕຳແໜ່ງປະທານປະເທດ.

ແຕ່ຜູ້ນຳລັດເຊຍເຄີຍກ່າວວ່າ ຕ້ອງການໃຫ້ລັດຖະທຳມະນູນສະບັບໃໝ່ຜ່ານການລົງປະຊາມະຕິຈາກປະຊາຊົນ ເພື່ອຄວາມເປັນເອກະພາບ, ນັ້ນອາດເປັນສັນຍານວ່າ ອາດຈະລົງສະໝັກເລືອກຕັ້ງອີກ ແລະ ມີທ່າອ່ຽງສູງຫຼາຍທີ່ທ່ານ ປູຕິນ ຈະໄດ້ຮັບໄຊຊະນະຕໍ່ເນື່ອງອີກ 2 ສະໄໝ ຫຼື 12 ປີ ໂດຍຈະເທົ່າກັບການດຳລົງຕຳແໜ່ງຜູ້ນຳລັດເຊຍຍາວນານເຖິງປີ 2036 ເຊິ່ງໃນເວລານັ້ນທ່ານ ປູຕິນ ຈະມີອາຍຸເຖິງ 83 ປີ ສ້າງປະຫວັດສາດເປັນຜູ້ນຳລັດເຊຍທີ່ຍາວນານທີ່ສຸດ ນັບຕັ້ງແຕ່ທ່ານ ໂຈເຊັບ ສະຕາລິນ ທີ່ດຳລົງຕຳແໜ່ງເລຂາທິການພັກຄອມມູນິດແຫ່ງສະຫະພາບໂຊວຽດຕໍ່ເນື່ອງຍາວນານ 30 ປີ.

- Advertisement -