ພຽງ 3 ເດືອນທີ່ປະຕິບັດວາລະແຫ່ງຊາດແກ້ໄຂບັນຫາຢາເສບຕິດ ຈັບໄດ້ກວ່າ 100 ລ້ານເມັດ

ການແຜ່ຂະຫຍາຍຂອງການຊົມໃຊ້ ແລະ ຄ້າຢາເສບຕິດຢູ່ພາຍໃນປະເທດ ມັນໄດ້ເຮັດໃຫ້ເກີດມີການກໍ່ອາຊະຍະກຳ ແລະ ບາງຄັ້ງກໍ່ເຖິງຂຶ້ນຮຸນແຮງ, ລະບົບຕ້ອງປະເຊີນໜ້າກັບການເພີ່ມຂຶ້ນຂອງການສໍ້ລາດບັງຫຼວງ, ການຟອກເງິນ ແລະ ບັນຫາການກໍ່ອາຊະຍາກຳອື່ນໆອີກ ສິ່ງເຫຼົ່ານີ້ມັນໄດ້ຂົ່ມຂູ່ຄວາມໝັ້ນຄົງ, ຄວາມສະຫງົບສຸກ ແລະ ຄວາມເປັນລະບຽບຮຽບຮ້ອຍຂອງສັງຄົມຢູ່ໃນ ສປປ.ລາວ ແລະ ມັນຍັງແຕະຕ້ອງ ກົດໝ່ວງທ່ວງດຶງການພັດທະນາເສດຖະກິດ-ສັງຄົມຂອງຊາດອີກດ້ວຍ.

ອີງຕາມການລາຍງານຂອງທ່ານ ພັນຄຳ ວິພາວັນ ນາຍົກລັດຖະມົນຕີ ຕໍ່ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດ IX ເມື່ອວັນທີ 1 ພະຈິກ 2021 ທີ່ຜ່ານມາລະບຸວ່າ: ລັດຖະບານ ຊຸດທີ IX ພາຍຫຼັງໄດ້ຮັບໜ້າທີ່ຢ່າງເປັນທາງການໃນເດືອນເມສາ 2021 ກໍ່ໄດ້ພະຍາຍາມຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນງົບປະມານແຫ່ງລັດ 2021 ທີ່ລັດຖະບານ ຊຸດທີ VIII ໄດ້ສົ່ງຕໍ່ໃຫ້ ບົນຈິດໃຈສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ ໂດຍໄດ້ຖືເອົາການກະກຽມ ແລະ ຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການ ແລະ ວາລະແຫ່ງຊາດວ່າດ້ວຍບັນຫາຢາເສບຕິດ ເປັນວຽກງານບຸລິມະສິດຮີບດ່ວນ ດຳເນີນໄປບົນພື້ນຖານ ຍຶດໝັ້ນ 3 ຫຼັກການຕົ້ນຕໍ: ເດັດຂາດ, ໂປ່ງໃສ ແລະ ມືອາຊີບ ຫຼື ຫຼັກວິຊາການ.

ທ່ານນາຍົກລາຍງານວ່າ: ໄດ້ເອົາໃຈໃສ່ປະຕິບັດແນວທາງ ປກຊ, ປກສ ທົ່ວປວງຊົນຮອບດ້ານຂອງພັກຢ່າງຕັ້ງໜ້າ ແລະ ຕໍ່ເນື່ອງໄດ້ສຸມໃສ່ຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ອອກເປັນນິຕິກຳ, ແຜນງານ ແລະ ແບ່ງຄວາມຮັບຜິດຊອບລະອຽດ ເຊິ່ງໄດ້ເລີ່ມຈັດຕັ້ງປະຕິບັດຢ່າງຈິງຈັ້ງ ແຕ່ເດືອນສິງຫາ 2021 ເປັນຕົ້ນມາ ໄດ້ມີຄວາມຄືບໜ້າໃນຫຼາຍດ້ານເປັນຕົ້ນ: ທຳລາຍແຫຼ່ງຜະລິດ, ເຄືອຂ່າຍຂົນສົ່ງ ແລະ ຈຳໜ່າຍໄດ້ເປັນຈຳນວນຫຼວງຫຼາຍ ເຊິ່ງສາມາດມ້າງຄະດີໄດ້ 1,106 ເລື່ອງ, ຈັບຜູ້ຕ້ອງຫາໄດ້ 1,562 ຄົນ, ຍຶດຢາບ້າໄດ້ 10,158 ກິໂລກຼາມ (101,586,361 ເມັດ) ແລະ ຍັງມີຢາເສບຕິດອື່ນໆເຊັ່ນ: ຢາໄອສ, ຝິ່ນ, ເຮໂລອິນ ອີກຈຳນວນຫຼາຍ.

ໂດຍໃນວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດໄດ້ລະບຸວ່າ: ຕ້ອງສ້າງ, ປັບປຸງກົດໝາຍ ແລະ ນິຕິກຳໃຕ້ກົດໝາຍທີ່ກ່ຽວຂ້ອງກັບບັນຫາຢາເສບຕິດ; ສ້າງຄວາມຮັບຮູ້ໃຫ້ສັງຄົມດ້ວຍການສຶກສາອົບຮົມ ແລະ ໂຄສະນາເຜີຍແຜ່ລະບຽບກົດໝາຍ ແລະ ຜົນຮ້າຍຄວາມເປັນອັນຕະລາຍຂອງຢາເສບຕິດ; ປັບປຸງກົງຈັກການຈັດຕັ້ງ ແລະ ຍົກລະດັບຄວາມສາມາດໃນການເຄື່ອນໄຫວເຮັດໜ້າທີ່ການເມືອງຂອງອົງການປົກປ້ອງກົດໝາຍ ແລະ ພາກສ່ວນທີ່ກ່ຽວຂ້ອງຕໍ່ການແກ້ໄຂບັນຫາຢາເສບຕິດ; ຍົກສູງປະສິດທິພາບດ້ານການຄຸ້ມຄອງ, ຊີ້ນໍາໃນການຈັດຕັ້ງປະຕິບັດຮອບດ້ານ ໃນວຽກງານແກ້ໄຂບັນຫາຢາເສບຕິດ; ປັບປຸງຂີດຄວາມສາມາດການເຄື່ອນໄຫວເຮັດໜ້າທີ່ຂອງລະບົບການເມືອງແຕ່ລະຂັ້ນ ເພື່ອຊີ້ນໍາ-ນໍາພາແກ້ໄຂບັນຫາຢາເສບຕິດທີ່ເກີດຂຶ້ນຢູ່ໃນຂອບເຂດຄວາມຮັບຜິດຊອບຂອງຕົນ ແລະ ວຽກງານຮ່ວມມືສາກົນ.

- Advertisement -