ພັກຄອມມູນິດຈີນ ປາບປາມການສໍ້ລາດບັງຫຼວງໃນທຸກລະດັບ ໂດຍບໍ່ໂອນອ່ອນຜ່ອນປົນກັບໃຜທັງນັ້ນ

ຕະຫຼອດໄລຍະເວລາ 72 ປີ ທີ່ພັກຄອມມູນິດຈີນ ກ່າວຂຶ້ນມາປົກຄອງ ສປ.ຈີນ ຖືເປັນພັກການເມືອງພຽງບໍ່ພໍເທົ່າໃດພັກໃນໂລກ ທີ່ມີປະຫວັດສາດທີ່ຍາວນານ ແລະ ໄລຍະເວລາການປົກຄອງປະເທດຕໍ່ເນື່ອງແບບນີ້ ໂດຍມີທ່ານ ສີ ຈິ້ນຜິງ ເປັນແກນນຳຫຼັກຂອງການນຳພັກໃນປັດຈຸບັນ ທີ່ມີຈຳນວນສະມາຊິກພັກ 95 ລ້ານຄົນ (ນັບເຖິງເດືອນມິຖຸນາ 2021).

ນັບຕັ້ງແຕ່ທ່ານ ສີ ຈິ້ນຜິງ ໄດ້ຮັບເລືອກເປັນເລຂາທິການໃຫຍ່ພັກຄອມມູນິດຈີນ ໃນເດືອນພະຈິກ 2012, ທ່ານ ສີ ຈິ້ນຜິງ ໄດ້ສະແດງບົດບາດຂອງຢ່າງພົ້ນເດັ່ນ ດ້ວຍຄວາມຸ່ງໝັ້ນເຮັດແທ້ທຳຈິງ ແລະ ມີວິໄສທັດທີ່ກວ້າງໄກ.

ທ່ານ ສີ ຈິ້ນຜິງ ມີຄວາມມຸ່ງໝັ້ນຈັດຕັ້ງນຳພາໃຫ້ພັກຄອມມູນິດຈີນ ເປັນພັກທີ່ມີຄວາມເຂັ້ມແຂງໂປ່ງໃສ, ປີ 2021 ຖືເປັນປີທີ 9 ຂອງໂຄງການປາບປາມການສໍ້ລາດບັງຫຼວງພາຍໃຕ້ການນຳຂອງທ່ານ ສີ ຈິ້ນຜິງ ທີ່ໄດ້ດຳເນີນການຢ່າງເປັນວົງກວ້າງທີ່ສຸດໃນປະຫວັດສາດຈີນ ແລະ ບໍ່ມີການໂອນອ່ອນຜ່ອນປົນໃຫ້ກັບໃຜທັງນັ້ນ.

ໃນປີ 2020, ຄະນະກຳມະການກວດສອບວິໄນສູນກາງພັກຄອມມູນິດຈີນ ແລະ ຄະນະກຳມະການກວດສອບແຫ່ງຊາດລະບຸວ່າ: ມີເຈົ້າໜ້າທີ່ລັດທັງໝົດ 197,761 ຄົນ ຖືກລົງໂທດຖານລະເມີດກົດການປະຢັດມັດທະຍັດ.

ເຊິ່ງພັກຄອມມູນິດຈີນ ໄດ້ເຜີຍແຜ່ກົດການປະຢັດມັດທະຍັດ 8 ຂໍ້ເມື່ອທ້າຍປີ 2012 ເພື່ອແກ້ໄຂການປະຕິບັດຕົນໂດຍບໍ່ເໝາະບໍ່ຄວນຂອງເຈົ້າໜ້າທີ່ພັກ-ລັດດັ່ງນີ້:

  1. ຜູ້ນຳພັກ-ລັດ ຕ້ອງເຂົ້າເຖິງປະຊາຊົນທຸກຊັ້ນຄົນ ໂດຍສະເພາະຊົນຊັ້ນຜູ້ອອກແຮງງານ ເພື່ອຮຽນຮູ້ຊີວິດການເປັນຢູ່ ແລະ ສະຖານະການຕ່າງໆທີ່ແທ້ຈິງຂອງປະຊາຊົນ ໂດຍເວລາໄປລົງຢ້ຽມຢາມພົບປະຊາຊົນ ຄວນປະຕິບັດຕົນຢ່າງລຽບງ່າຍ, ການຕ້ອນຮັບແບບລຽບງ່າຍ ມີຜູ້ຕິດຕາມໃຫ້ໜ້ອຍທີ່ສຸດເທົ່າທີ່ຈຳເປັນ.
  2. ໃນວຽກງານກອງປະຊຸມໃດໆກໍ່ຕາມ ຄວນໃຊ້ເວລາບໍ່ດົນຈົນເກີນໄປ ຜູ້ເຂົ້າຮ່ວມປະຊຸມຄວນມີສ່ວນຮ່ວມໃນກອງປະຊຸມ ບໍ່ງຽບ ແລະ ບໍ່ເວົ້າເກີນຄວາມຈຳເປັນ ຄວນປະຊຸມດ້ວຍຢ່າງມີເນື້ອໃນໃຈຄວາມກະທັດຮັດ ເພື່ອໃຫ້ກອງປະຊຸມແຕ່ລະຄັ້ງມີປະສິດທິພາບສູງສຸດເທົ່າທີ່ຈະເຮັດໄດ້.
  3. ໃນການຂຽນບົດລາຍງານ, ການຮ່າງເອກະສານໃດໆກໍ່ຕາມ ຄວນຮ່າງອອກມາເທົ່າທີ່ຈຳເປັນໃນສ່ວນເນື້ອໃນໃຈຄວາມທີ່ແທ້ຈິງຢ່າງກະທັດຮັດ ມີຄວາມຖືກຕ້ອງຄວາມຕາມເປັນຈິງ, ມີຫຼັກຖານອ້າງອີງ ເພື່ອໃຫ້ເອກະສານອອກມາມີຄຸນນະພາບທີ່ສຸດ.
  4. ຕ້ອງໄດ້ຮັບການອະນຸຍາດກ່ອນເທົ່ານັ້ນ ຈຶຶ່ງຈະສາມາດເດີນທາງໄປສຶກສາຮຽນຮູ້ຢູ່ຕ່າງປະເທດໄດ້ ເຊິ່ງຄວນມີຜູ້ຕິດຕາມໜ້ອຍທີ່ສຸດ, ຄວນພາໄປແຕ່ຈຳເປັນ ແລະ ກ່ຽວຂ້ອງກັບພາລະກິດທີ່ຕ້ອງໄປເຮັດເທົ່ານັ້ນ.
  5. ໃນການເດີນທາງໄປມາຫາສູ່ ຄວນຮ້ອງຂໍການອຳນວຍຄວາມສະດວກຈາກເຈົ້າໜ້າທີ່ຈະລາຈອນໃຫ້ໜ້ອຍທີ່ສຸດ ຫຼື ບໍ່ຄວນຮ້ອງຂໍເລີຍ ເພື່ອຫຼີກລ້ຽງການຂັດຂວາງການຈະລາຈອນຂອງປະຊາຊົນທີ່ກຳລັງໃຊ້ລົດໃຊ້ຖະໜົນ ໃນເວລານັ້ນໆ.
  6. ໃນການລາຍງານຂ່າວຂອງສື່ກ່ຽວກັບກອງປະຊຸມໃດໆຂອງລັດຖະບານ ຫຼື ອື່ນໆທີ່ກ່ຽວຂ້ອງ ຈະຕ້ອງພິຈາລະນາເຖິງຄຸນຄ່າ-ຄຸນນະພາບຂອງຂ່າວທີ່ຖືກນຳສະເໜີ້ອອກໄປ ຈະຕ້ອງນຳສະເໜີສະເພາະຂ່າວທີ່ມີຄຸນນະພາບເທົ່ານັ້ນ.
  7. ຫ້າມຜູ້ນຳພັກ, ເຈົ້າໜ້າທີ່ລະດັບສູງ, ເຈົ້າໜ້າທີ່ຂອງລັດ ຕີພິມຜົນງານໃດໆດ້ວຍຕົນເອງ ລວມເຖິງການສົ່ງສານສະແດງຄວາມຍິນດີ ແລະ ອື່ນໆ ຍົກເວັ້ນແຕ່ຈະໄດ້ຮັບຄວາມເຫັນດີຈາກສູນກາງ.
  8. ຜູ້ນຳພັກ-ລັດ ຄວນປະຕິບັດຕົນຢ່າງເຄັ່ງຄັດ ເພື່ອເປັນແບບຢ່າງແກ້ປະຊາຊົນໃນເລື່ອງຂອງການປະຢັດມັດທະຍັດເຊັ່ນ: ລົດຮັບໃຊ້, ບ່ອນພັກເຊົາ ແລະ ຊີວິດການເປັນຢູ່.

ທ່ານ ສີ ຈິ້ນຜິງ ໄດ້ກ່າວໃນກອງປະຊຸມຄົບຄະນະ ຄັ້ງທີ 4 ຂອງຄະນະກຳມະການກວດສອບວິໄນສູນກາງພັກຄອມມູນິດຈີນ (CCDI) ສະໄໝທີ 19 ທີ່ຈັດຂຶ້ນໃນນະຄອນຫຼວງປັກກິ່ງ ເມື່ອວັນທີ 13 ມັງກອນ 2020 ທີ່ຜ່ານມາວ່າ:

“ຄວນເພີ່ມຄວາມພະຍາຍາມໃນການກຳຈັດບັນຫາການສໍ້ລາດບັງຫຼວດ “ມະລິກຍິກຍ່ອຍ” ທີ່ກ່ຽວຂ້ອງກັບຊີວິດການເປັນຢູ່ຂອງປະຊາຊົນ ຕະຫຼອດຮອດ “ສິ່ງຄຸ້ມກັນ” ທີ່ໃຫ້ການປົກປ້ອງການກະທຳຂອງກຸ່ມອາຊະຍາກຳ ແລະ “ອຸປະສັກກີດກັນ” ການບັງຄັບໃຊ້ນະໂຍບາຍທີ່ເປັນປະໂຫຍດແກ່ປະຊາຊົນ”.

ທ່ານ ສີ ຈິ້ນຜິງ ໄດ້ອອກຄຳສັ່ງໃຫ້ເດີນໜ້າຄວາມພະຍາຍາມໃນການປາບປາມເຈົ້າໜ້າທີ່ ທີ່ສໍ້ລາດບັງຫຼວງ ຕັ້ງແຕ່ລະດັບລ່າງ “ແມງວັນ” ໄປຈົນເຖິງ “ເສືອ” ທີ່ມີຕຳແໜ່ງໃຫຍ່ໂຕ ພ້ອມຮຽກຮ້ອງໃຫ້ສະມາຊິກພັກຈົ່ງຮັບຮູ້ເຂົ້າໃຈລັກສະນະການຕໍ່ສູ້ກັບການສໍ້ລາດບັງຫຼວງ ທີ່ໜັກໜ່ວງ ຊັບຊ້ອນຫຍຸ້ງຍາກ ແລະ ໃຊ້ເວລາຍາວນານຢ່າງມີສະຕິ.

ເຊິ່ງຕະຫຼອດໄລຍະເວລາ 9 ປີທີ່ຜ່ານມາ ມີເຈົ້າໜ້າທີ່ພັກ-ລັດລະດັບສູງ ນັບຕັ້ງແຕ່ລະດັບກະຊວງ ແລະ ສູງກວ່າຂຶ້ນໄປ ໄດ້ຖືກລົງໂທດ ຫຼື ສືບສວນສອບສ່ວນກວ່າ 400 ຄົນ ເຊິ່ງລວມເຖິງອະດີດກົມການເມືອງສູນກາງພັກຄອມມູນິດຈີນ ແລະ ອະດີດຮອງປະທານຄະນະກຳມາທິການທະຫານສູນກາງ 2 ຄົນ.

ນອກຈາກນັ້ນ, ມີຜູ້ຫຼົບໜີຄະດີຫຼາຍກວ່າ 8,300 ຄົນ ຖືກນຳຕົວກັບມາຮັບໂທດຕາມຄວາມຜິດຈາກກວ່າ 120 ປະເທດ ແລະ ເຂດແດນ ໃນລະຫວ່າງປີ 2014-2020.

ນອກຈາກນີ້, ເມື່ອວັນທີ 8 ກັນຍາ 2021 ທີ່ຜ່ານມາ, ຄະນະກຳມະການກວດສອບວິໄນສູນກາງພັກຄອມມູນິດຈີນ ແລະ ຄະນະກຳມະການກວດສອບແຫ່ງຊາດ ລວມທັງຝ່າຍຕ່າງໆພາຍໃນພັກ ແລະ ໜ່ວຍງານຕຸລາການລະດັບສູງ ໄດ້ເລີ່ມນຳໃຊ້ລະບົບຂຶ້ນບັນຊີດຳຜູ້ຕິດສິນບົນ ເພື່ອເປັນການຍົກລະດັບການຕໍ່ສູ້ກັບການສໍ້ລາດບັງຫຼວງຂຶ້ນອີກສູ້ລະດັບ ໂດຍລະບຸວ່າ ຈະມີການວິໄຈເພື່ອກຳນົດບົດລົງໂທດທີ່ກ່ຽວຂ້ອງກັບການເຂົ້າເຖິງຕະຫຼາດ ແລະ ຂໍ້ຈຳກັດຄຸນສົມບັດຂອງຜູ້ຕິດສິນບົນ.

ເຊິ່ງຜູ້ໃຫ້ ແລະ ຜູ້ຮັບສິນບົນຈະຕ້ອງຖືກລົງໂທດຕາມຜົນການສືບສວນສອບສວນ ໂດຍເນັ້ນໜັກໄປທີ່ຜູ້ທຳການຕິດສິນບົນເປັນອາຈິນ, ຕິດສິນບົນກ້ອນໃຫຍ່ ຫຼື ຕິດສິນບົນກັບຄົນຈຳນວນຫຼາຍ, ສະມາຊິກພັກ ແລະ ເຈົ້າໜ້າທີ່ລັດທີ່ໃຫ້ສິນບົນ, ການຕິດສິນບົນໃນສາຂາອາຊີບ ແລະ ການຕິດສິນບົນໃນທາງທຸລະກິດຂະໜາດໃຫຍ່.

ຜົນປະໂຫຍດທີ່ຂັດຕໍ່ລະບຽບກົດໝາຍ ທີ່ໄດ້ຮັບຈາກການຕິດສິນບົນຈະຕ້ອງຖືກຍຶດ, ກູ້ຄືນ ຫຼື ຊົດໃຊ້ຕາມກົດໝາຍ, ສ່ວນຜົນປະໂຫຍດທີ່ບໍ່ເໝາະສົມອື່ນໆເຊັ່ນ: ຕຳແໜ່ງທາງວິຊາຊີບ, ຕຳແໜ່ງທາງການເມືອງ, ນະໂຍບາຍທາງທຸລະກິດ ແລະ ຕຳແໜ່ງທາງວິຊາການ ຈະຖືກປົດ, ຍົກເລີກ ຫຼື ຖອດຖອນ.

- Advertisement -