ປ.ສີ ກ່າວ: ຈີນບໍ່ມີນະໂຍບາຍ “ຂົ່ມຂູ່ບີບບັງຄັບອາຊຽນ”, ພ້ອມຮ່ວມມືມ້າງເພການແຊກແຊງຈາກພາຍນອກ

ລາຍງານ 22​ ພະຈິກ 2021, ທ່ານ ສີ ຈິ້ນຜິງ ປະທານປະເທດຈີນ ກ່າວຕໍ່ກອງປະຊຸມສຸດຍອດອາຊຽນ-ຈີນ ສະໄໝພິເສດ ເພື່ອສະເຫຼີມສະຫຼອງການພົວພັນຮ່ວມມືອາຊຽນ-ຈີນ ຄົບຮອບ 30 ປີ ໃນຮູບແບບທາງໄກວ່າ: ລັດຖະບານຈີນບໍ່ມີນະໂຍບາຍ “ຂົ່ມຂູ່ບີບບັງຄັບ” ປະເທດໃດກໍ່ຕາມໃນອາຊີຕາເວັນອອກສຽງໃຕ້ ໂດຍການໃຊ້ອິດທິພົນທັງໃນດ້ານເສດຖະກິດ ແລະ ການມີອານາເຂດທີ່ກວ້າງໃຫຍ່ກວ່າ ແຕ່ໃນທາງກົງກັນຂ້າມ ຈີນພ້ອມຮ່ວມມືກັບອາຊຽນ “ເພື່ອມ້າງເພການແຊກແຊງຈາກພາຍນອກ”.

ຂະນະດຽວກັນ, ທ່ານ ສີ ຈິ້ນຜິງກໍ່ໄດ້ຮຽກຮ້ອງໃຫ້ມີການປະສານງານ ແລະ ສົ່ງເສີມການຮ່ວມມືກັນໃນທຸກດ້ານລະຫວ່າງຈີນ ກັບ ອາຊຽນ ເພື່ອຮັກສາໄວ້ເຊິ່ງຄວາມເປັນທຳ ແລະ ຜົນປະໂຫຍດຂອງປະຊາຊົນທັງສອງຝ່າຍ ອັນຈະນຳໄປສູ່ການຍົກລະດັບສາຍພົວພັນໃຫ້ແໜ້ນແຟ້ນຍິ່ງຂຶ້ນ.

ເຖິງຢ່າງໃດກໍ່ຕາມ, ກ່ອນເຖິງມື້ປະຊຸມຄັ້ງນີ້ບໍ່ດົນ, ທ່ານ ຊຸນ ກົ້ວສຽງ ຜູ້ແທນພິເສດດ້ານວຽກງານອາຊຽນ ຂອງກະຊວງການຕ່າງປະເທດຈີນ ໄດ້ເດີນທາງຢ້ຽມຢາມສິງກະໂປ ແລະ ບຣູໄນ ເພື່ອພະຍາຍາມໂອນອ່າງໃຫ້ອາຊຽນ ເຊີນທ່ານ ມິນ ອ່ອງ ຫຼ່າຍ ຜູ້ນຳມຽນມາທີ່ມາຈາກການກໍ່ລັດຖະປະຫານເຂົ້າຮວ່ມກອງປະຊຸມຄັ້ງນີ້.

ເຊິ່ງການຮຽກຮ້ອງຂອງທ່ານ ຊຸນ ກົ້ວສຽງ ບໍ່ໄດ້ຮັບການຕອບສະໜອງຈາກສິງກະໂປ ແລະ ບຣູໄນ ເຊິ່ງທັງສອງປະເທດຢືນຢັນຈຸດຢືນເດີມ ຄືການບໍ່ໃຫ້ຜູ້ນຳລັດຖະບານທະຫານມຽນມາເຂົ້າຮ່ວມ ເຊັ່ນດຽວກັບກອງປະຊຸມສຸດຍອດອາຊຽນ ທີ່ປະເທດບຣູໄນເປັນເຈົ້າພາບ ເມື່ອເດືອນຕຸລາ 2021 ທີ່ຜ່ານມາ.

ຂະນະທີ່ອິນໂດເນເຊຍ ແລະ ມາເລເຊຍກໍ່ຮ່ວມຄັດຄ້ານເຊັ່ນກັນ, ສ່ວນສະມາຊິກອາຊຽນທີ່ເຫຼືອອີກ 5 ປະເທດຄື: ສປປ.ລາວ, ຫວຽດນາມ, ຟິລິບປິນ, ກຳປູເຈຍ ແລະ ໄທ ຍັງບໍ່ມີຄວາມເຫັນຢ່າງເປັນທາງການ.

ທ່ານ ຊຸນ ກົ້ວສຽງ ກ່າວວ່າ ຍອມຮັບ ແລະ ເຂົ້າໃຈຈຸດຢືນຂອງອາຊຽນ, ຈີນພ້ອມປຶກສາຫາລືຮ່ວມກັບຜູ້ແທນທີ່ບໍ່ໄດ້ມາຈາກພາກການເມືອງຂອງມຽນມາ ຕາມທີ່ອາຊຽນເປັນຜູ້ດຳເນີນການ.

- Advertisement -