ກອງທັບຍີ່ປຸ່ນ-ຫວຽດນາມ ລົງນາມຮ່ວມມືດ້ານອະວະກາດ ແລະ ໄຊເບີ ເພື່ອຄານອຳນາດຈີນ

ລາຍງານ 24 ພະຈິກ 2021, ທ່ານ ໂນບຸໂອະ ຄິຊິ ລັດຖະມົນຕີກະຊວງປ້ອງກັນປະເທດຍີ່ປຸ່ນ ກ່າວຕໍ່ສື່ມວນຊົນ ພາຍຫຼັງສຳເລັດການປະຊຸມປຶກສາຫາລືກັບທ່ານ ພົນເອກ ຟານ ວານ ກຽງ ລັດຖະມົນຕີກະຊວງປ້ອງກັນປະເທດຫວຽດນາມ ທີ່ນະຄອນຫຼວງໂຕກຽວ ປະເທດຍີ່ປຸ່ນ ເມື່ອວັນອັງຄານ 23 ພະຈິກ 2021 ທີ່ຜ່ານມາວ່າ: ຂໍ້ຕົກລົງດ້ານອະວະກາດ ແລະ ຄວາມໝັ້ນຄົງທາງໄຊເບີ ມີເປົ້າໝາຍເພື່ອແກ້ໄຂ “ບັນຫາເລັ່ງດ່ວນ” ໃນພູມມິພາກອິນໂດ-ປາຊີຟິກ ທີ່ກຳລັງມີການທ້າທາຍກົດລະບຽບລະຫວ່າງປະເທດຢູ່ ແຕ່ທ່ານ ໂນບຸໂອະ ຄິຊິ ບໍ່ໄດ້ລະບຸຊື່ປະເທດໃດ ແຕ່ກໍ່ສາມາດສື່ໃຫ້ຮູ້ໄດ້ວ່າໝາຍເຖິງ “ຈີນ”.

ທ່ານ ໂນບຸໂອະ ຄິຊິ  ຍັງໄດ້ສະແດງຄວາມເປັນຫ່ວງຕໍ່ກັບກິດຈະກຳຊ້ອມຮົບເມື່ອໄວໆນີ້ ລະຫວ່າງກອງທັບຈີນ ກັບ ລັດເຊຍ ບໍລິໃກ້ເວນນ່ານນ້ຳ ແລະ ນ່ານຟ້າຂອງຍີ່ປຸ່ນ.

ຂໍ້ຕົກລົງການຮ່ວມມືທາງທະຫານດັ່ງກ່າວນີ້ ເກີດຂຶ້ນພຽງແຕ່ 2 ເດືອນ ພາຍຫຼັງທີ່ທັງສອງປະເທດຍີ່ປຸ່ນ-ຫວຽດນາມ ບັນລຸຂໍ້ຕົກລົງ ອະນຸຍາດໃຫ້ຍີ່ປຸ່ນນຳສົ່ງອຸປະກອນ ແລະ ເຕັກໂນໂລຊີກອງທັບໃຫ້ຫວຽດນາມ ແຕ່ລາຍລະອຽດກ່ຽວກັບການສົ່ງມອບອຸປະກອບບາງຊະນິດ ໂດຍສະເພາະເຮືອກອງທັບ ຍັງຢູ່ໃນລະຫວ່າງການປຶກສາຫາລື.

ຫວຽດນາມເປັນປະເທດທີ 11 ທີ່ຍີ່ປຸ່ນລົງນາມຖ່ອຍທອດ, ສົ່ງມອບອຸປະກອບ ແລະ ເຕັກໂນໂລຊີທາງທະຫານໃຫ້, ຂະນະທີ່ຍີ່ປຸ່ນເອງກໍ່ໄດ້ມີຄວາມພະຍາຍາມຫາແນວທາງ ເພື່ອສະໜັບສະໜູນອຸດສາຫະກຳປ້ອງກັນປະເທດຂອງຍີ່ປຸ່ນເອງ.

ນອກຈາກນັ້ນ, ຍີ່ປຸ່ນຍັງຕ້ອງການຂະຫຍາຍການຮ່ວມມືທາງທະຫານກັບປະເທດອື່ນໆ ນອກເໜືອຈາກ ສ.ອາເມຣິກາ ທີ່ເປັນພັນທະມິດເກົ່າແກ່ ໂດຍກ່ອນໜ້ານີ້ໄດ້ລົງນາມຂໍ້ຕົກລົງຄ້າຍໆກັນກັບ ອັງກິດ, ອົດສະຕຣາລີ, ຟິລິບປິນ ແລະ ອິນໂດເນເຊຍ.

- Advertisement -