ສ.ອາເມຣິກາ, ຈີນ, ຍີ່ປຸ່ນ, ອິນເດຍ…ລະບາຍນ້ຳມັນສຳຮອງທາງຍຸດທະສາດ ຕີລາຄານ້ຳມັນໂລກທີ່ສູງຂຶ້ນ

ລາຍງານ 25 ພະຈິກ 2021, ນຳນຽບປະທານປະເທດ ສ.ອາເມຣິກາ ອອກຖະແຫຼງການເມື່ອວັນອັງຄານ 23 ພະຈິກ 2021 ທີ່ຜານມາວ່າ: ສ.ອາເມຣິກາ ຈະລະບາຍນ້ຳມັນສຳຮອງຂອງຕົນບາງສ່ວນອອກສູ່ຕະຫຼາດ ເພື່ອຊ່ວຍຫຼຸດຜ່ອນລາຄານ້ຳມັນທີ່ປັບຕົວສູງຂຶ້ນເລື້ອຍໆຢູ່ໃນຂະນະນີ້.

ເຊິ່ງການເຄື່ອນໄຫວດັ່ງກ່າວນີ້ ຈະປະຕິບັດໄປຄູ່ຂະໜານກັບປະເທດຜູ້ບໍລິໂພກນ້ຳມັນລາຍໃຫຍ່ອື່ນໆຂອງໂລກ ລວມທັງຈີນ, ອິນເດຍ, ຍີ່ປຸ່ນ, ເກົາຫຼີໃຕ້ ແລະ ອັງກິດ. ເຈົ້າໜ້າທີ່ລະດັບສູງຂອງ ສ.ອາເມຣິກາກ່າວວ່າ ຈະເປັນຄັ້ງທຳອິດໃນປະຫວັດສາດທີ່ມີການຮ່ວມມືກັນລະບາຍນ້ຳມັນອອກສູ່ຕະຫຼາດ ພາຍຫຼັງທີ່ກຸ່ມປະເທດຜູ້ຜະລິດນ້ຳມັນປະຕິເສດຂໍ້ຮຽກຮ້ອງຂອງ ສ.ອາເມຣິກາ ທີ່ຕ້ອງການໃຫ້ເພີ່ມການຜະລິດນ້ຳມັນຫຼາຍກວ່າ 400,000 ຖັງ (ບາເຣວ)/ວັນ.

ຖະແຫຼງການຍັງລະບຸວ່າ ສ.ອາເມຣິກາສາມາດລະບາຍນ້ຳມັນໄດ້ 50 ລ້ານຖັງ (ບາເຣວ) ໃນໄລຍະຫຼາຍເດືອນຕໍ່ໜ້ານີ້ ແລະ ທ່ານ ໂຈ ໄບເດັນ ປະທານປະເທດ ສ.ອາເມຣິກາ ພ້ອມດຳເນີນມາດຕະການເພີ່ມເຕີມຫາກຈຳເປັນ.

ໃນດ້ານຂອງລັດຖະບານຍີ່ປຸ່ນ ກໍ່ໄດ້ຕັດສິນໃຈຈະລະບາຍນ້ຳມັນສຳຮອງຂອງປະເທດເປັນຄັ້ງທຳອິດ ຕາມຫຼັງ ສ.ອາເມຣິກາ ເພື່ອຊ່ວຍຫຼຸດລາຄານ້ຳມັນດິບທີ່ປັບຕົວສູງຂຶ້ນຢ່າງຕໍ່ເນື່ອງ.

ເຊິ່ງນ້ຳມັນສຳຮອງຂອງຍີ່ປຸ່ນນັ້ນ ແມ່ນພຽງພໍສຳລັບໃຊ້ໃນປະເທດປະມານ 140 ວັນ ທີ່ຜ່ານມາມີການພິຈາລະນະທີ່ຈະລະບາຍນ້ຳມັນສຳຮອງບາງສ່ວນ, ໂດຍລັດຖະບານຍີ່ປຸ່ນວາງແຜນຈະລະບາຍນ້ຳມັນໃນປະລິມານທີ່ສາມາດໃຊ້ໄດ້ຢ່າງພຽງພໍຫຼາຍວັນ (ບໍ່ແຕ່ໄດ້ລະບຸຈຳນວນວັນ) ແລະ ສຶກສາວ່າຈະຕ້ອງລະບາຍນ້ຳມັນເພີ່ມເຕີມຫຼືບໍ່.

ຂະນະທີ່ອິນເດຍໄດ້ປະກາດເມື່ອວັນອັງຄານທີ 23 ພະຈິກ 2021 ທີ່ຜ່ານມາເຊັ່ນກັນ ວ່າຈະລະບາຍນ້ຳມັນ 5 ລ້ານຖັງຈາກນ້ຳມັນສຳຮອງຂອງປະເທດ.

ກະຊວງເຊື້ອໄຟຂອງອິນເດຍລະບຸຜ່ານຖະແຫຼງການວ່າ ອິນເດຍເຊື່ອວ່າລາຄາຄວນສົມເຫດສົມຜົນ ແລະ ຄວນກຳນົດໂດຍຕະຫຼາດ, ນອກຈາກນີ້ຍັງລະບຸວ່າ ອິນເດຍຍັງໄດ້ສະແດງຄວາມເປັນຫ່ວງຫຼາຍຄັ້ງຕໍ່ການທີ່ປະເທດຜູ້ຜະລິດນ້ຳມັນປ້ອນນ້ຳມັນອອກສູ່ຕະຫຼາດໂດຍປັບປ່ຽນຢ່າງບໍ່ຖືກຕ້ອງ ຜະລິດຕ່ຳກວ່າລະດັບຄວາມຕ້ອງການຕົວຈິງ ເຊິ່ງນຳໄປສູ່ການປັບຕົວຂຶ້ນສູງຂອງລາຄານ້ຳມັນ ສົ່ງຜົນໃຫ້ສິ່ງອື່ນໆທີ່ກ່ຽວຂ້ອງຕິດລົບໄປນຳ.

ຂະນະທີ່, ສຳນັກງານບໍລິຫານຄັງສຳຮອງທາງຍຸດທະສາດ ແລະ ອາຫານແຫ່ງ ສປ.ຈີນ ເປີດເຜີຍວ່າ: ຈີນຈະລະບາຍນ້ຳມັນດິບອອກຈາກຄັງສຳຮອງທາງຍຸດທະສາດ ເປັນຄັ້ງທຳອິດຕາມຄວາມຈຳເປັນ ເພື່ອຊ່ວຍໃຫ້ໂຮງກັ່ນຂອງຈີນສາມາດຄວບຄຸມຕົ້ນທຶນ ແລະ ເຮັດໃຫ້ຕະຫຼາດມີສະຖຽນລະພາບຫຼາຍຂຶ້ນ ລວມທັງເພື່ອເປັນການຮັບປະກັນຄວາມໝັ້ນຄົງດ້ານພະລັງງານຢ່າງມີປະສິດທິພາບຂອງຈີນ. 

- Advertisement -