ດ່ວນ…! ເລີ່ມປະຕິບັດການນຳນ້ອງໆ 13 ຄົນອອກຈາກຖ້ຳຫຼວງ ຄາດວ່າ 21:00 ໂມງ ຜູ້ທຳອິດພົ້ນປາກຖ້ຳ

ສຳນັກຂ່າວຕ່າງປະເທດລາຍງານ 8 ກໍລະກົດ 2018 ວ່າ: ທ່ານ ນະຣົງສັກ ໂອສົດທະນາກອນ ໃນຖານະຜູ້ບັນຊາການສູນອຳນວຍການຮ່ວມຄົ້ນຫາຜູ້ສູນຫາຍໃນຖ້ຳຫຼວງ, ປ່າສະຫງວນຂຸນນ້ຳນາງນອນ, ຈັງຫວັດຊຽງຣາຍ ປະເທດໄທ ກ່າວວ່າ: ມື້ນີ້ເປັນມື້ທີ 16 ທີ່ເຈົ້າໜ້າທີ່ປະຕິບັດການຊ່ວຍເຫຼືອນ້ອງໆທັງ 13 ຄົນ ເຊິ່ງອຸປະສັກຂອງພວກເຮົາມີສອງຢ່າງຄື: ນ້ຳ ແລະ ເວລາ ດັ່ງນັ້ນ, ພວກເຮົາຕ້ອງເຮັດທຸກວິທີທາງ ເຖິງແມ່ນວ່າຈະຊະນະທຳມະຊາດບໍ່ໄດ້.

ທ່ານ ນະຣົງສັກ ຖະແຫຼງວ່າ ປະຕິບັດການນຳນ້ອງໆ 13 ຄົນອອກຈາກຖ້ຳຫຼວງ ໄດ້ເລີ່ມຂຶ້ນແລ້ວເມື່ອເວລາ 10:00 ໂມງ ຂອງວັນອາທິດນີ້ ໂດຍມີຜູ້ເຂົ້າຮ່ວມປະຕິບັດການ 18 ຄົນ ແບ່ງເປັນຜູ້ຊ່ຽວຊານຈາກຕ່າງປະເທດ 13 ຄົນ ແລະ ເຈົ້າໜ້າທີ່ໜ່ວຍຮົບພິເສດ 5 ຄົນ, ໂດຍທ່ານ ນະຣົງສັກຄາດວ່າຈະມີໂອກາດເຫັນນ້ອງໆອອກຈາກຖ້ຳເປັນຄົນທຳອິດໃນເວລາປະມານ 21:00​ ໂມງ ແລະ ຈະຄ່ອຍໆຕາມຫຼັງອອກມາເລື້ອຍໆ ໂດຍເດັກ 1 ຄົນ ຈະມີນັກດຳນ້ຳປະກົບຕົວມາ 2 ຄົນ.

ທ່ານ ນະຣົງສັກ ກ່າວອີກວ່າ: ສະຖານະການນ້ຳເຖິງແມ່ນວ່າຈະເປັນອຸປະສັກ ແຕ່ໂຖງ 1, 2 ແລະ 3 ສາມາດຍ່າງໄດ້ຕະຫຼອດຮອດຝັ່ງແລ້ວ ເຊິ່ງບໍ່ເຄີຍມີຕະຫຼອດໄລຍະ 10 ກວ່າວັນມານີ້ ແລະ ຕອນນີ້ຈະມີພາຍຸລູກໃໝ່ພັດເຂົ້າມາ ຫາກພວກເຮົາລໍ້ຖ້າ ແລະ ມີຝົນຕົກລົງມາເພີ່ມຕະຫຼອດໄລຍະ 3-4 ວັນຂ້າງໜ້າ ປະລິນມານ້ຳກໍ່ຈະເພີ່ມຂຶ້ນອີກ, ແຕ່ເມື່ອພວກເຮົາພ້ອມມາຫຼາຍວັນແລ້ວ 1.​ ຄືຄວາມພ້ອມຂອງນ້ອງໆທັງ 13 ຄົນ ດ້ານຮ່າງກາຍ ແລະ ຈິດໃຈ ເຂົາເຈົ້າມີສະພາບຮ່າງກາຍ ແລະ ຈິດໃຈດີຫຼາຍ, ມີຄວາມເດັດດ່ຽວ ແລະ ຮັບຊາບພາລະກິດທີ່ຈະປະຕິບັດ ແລະ ເຂົາເຈົ້າພ້ອມທີ່ຈະອອກມາຮ່ວມກັບພວກເຮົາ ເຖິງແມ່ນວ່າຈະຕ້ອງປະເຊີນກັບສິ່ງໃດກໍ່ຕາມ ແລະ ໄດ້ຢືນຢັນໃຫ້ຄອບຄົວຮັບຊາບກ່ອນແລ້ວຈຶ່ງປະຕິບັດການ ແລະ ຄອບຄົວກໍ່ເຫັນດີກັບພວກເຮົາ. 2. ທີມແພດ, ທີມປະຕິບັດການ ພວກເຮົາໄດ້ຊ້ອມປະຕິບັດການຕົວຈິງ ຄວາມສັບສົນແມ່ນແຕ່ວິນາທີດຽວຈະເກີດຂຶ້ນບໍ່ໄດ້ ຢືນຢັນວ່າການປະຕິບັດການໃນຄັ້ງນີ້ພ້ອມທຸກໆດ້ານ. ຂໍໃຫ້ທຸກຄົນລໍຖ້າຟັງຂ່າວດີ ແລະ ສົ່ງກຳລັງໃຈຊ່ວຍໃນການປະຕິບັດພາລະກິດໃຫ້ສຳເລັດໂດຍໄວ.

HTML tutorial