ສະພາ ສ.ອາເມຣິກາ ຮັບຮອງເອົາອຳນວຍການ CIA ເປັນລັດຖະມົນຕີກະຊວງການຕ່າງປະເທດຄົນໃໝ່

ສຳນັກຂ່າວຕ່າງປະເທດລາຍງານ 27 ເມສາ 2018 ວ່າ: ສະພາສູງສະຫະລັດ ອາເມຣິກາມີມະຕິສຽງສ່ວນໃຫຍ່ ໃນກອງປະຊຸມເມື່ອວັນທີ 26 ເມສາ ທີ່ຜ່ານມາ 57 ຕໍ່ 42 ສຽງຮັບຮອງເອົາທ່ານ ໄມ ພອມແພວ ອະດີດຜູ້ອຳນວຍການສຳນັກຂ່າວກອງກາງ (CIA) ໃຫ້ດຳລົງຕຳແໜ່ງລັດຖະມົນຕີກະຊວງການຕ່າງປະເທດຄົນທີ 70 ເຊິ່ງພາຍຫຼັງໄດ້ຮັບການຮັບຮອງພຽງບໍ່ພໍເທົ່າໃດຊົ່ວໂມງ ທ່ານ ໄມ ພອມແພວ ອາຍຸ 54 ປີ ກໍ່ເຂົ້າສາບານຕົນຮັບຕຳແໜ່ງທີ່ທຳນຽບຂາວ.

ຂະນະທີ່ກະຊວງການຕ່າງປະເທດສະຫະລັດ ອາເມຣິກາ ອອກຖະແຫຼງການທັນທີວ່າ: ພາລະກິດທຳອິດຂອງທ່ານ ໄມ ພອມແພວ ຄືການເດີນທາງຢ້ຽມຢາມນະຄອນຫຼວງບຼັສເຊວ ໃນວັນສຸກທີ 27 ເມສານີ້ ເພື່ອເຂົ້າຮ່ວມກອງປະຊຸມລັດຖະມົນຕີກະຊວງການຕ່າງປະເທດອົງການສົນທິສັນຍາອາກລັງຕິກເໜືອ (NATO) ຕໍ່ຈາກນັ້ນຈະມີພາລະກິດເດີນທາງໄປຢ້ຽມຢາມອິດສະຣາແອນ, ຊອກດານີ ແລະ ອາຣັບບີ ຊາອູດິດ; ສ່ວນໃນດ້ານຂອງທຳນຽບຂາວໄດ້ເຜີຍແຜ່ຖະແຫຼງການຂອງທ່ານ ໂດໂນ ທຣຳ ວ່າ ທ່ານ ໄມ ພອມແພວ ຄືບຸກຄົນທີ່ໄດ້ຮັບຄວາມໄວ້ວາງໃຈຈາກຜູ້ນຳສະຫະລັດ ໃຫ້ດຳລົງຕຳແໜ່ງນັກການທູດໝາຍເລກ 1 ຄົນໃໝ່ຂອງລັດຖະບານສະຫະລັດ ອາເມຣິກາ, ເຖິງແມ່ນວ່າຈະເປັນຄົນທີ 2 ພາຍໃນໄລຍະເວລາພຽງ 1 ປີກວ່າ ຕໍ່ຈາກທ່ານ ເຣັກ ທິວເລີສັນ ທີ່ຢູ່ໃນຕຳແໜ່ງມາຕັ້ງແຕ່ເດືອນກຸມພາ 2017 ແຕ່ຖືກປົດເມື່ອເດືອນມີນາ ທີ່ຜ່ານມາ.

ເຖິງຢ່າງໃດກໍ່ຕາມ, ຕະຫຼອດໄລຍະເວລາທີ່ດຳລົງຕຳແໜ່ງຜູ້ອຳນວຍການ CIA ຖືວ່າທ່ານ ໄມ ພອມແພວ ເປັນໜຶ່ງໃນບຸກຄົນທີ່ມີບົດບາດຢ່າງເລິກເຊິ່ງຕໍ່ນະໂຍບາຍການຕ່າງປະເທດຂອງທ່ານ ໂດໂນ ທຣຳ ໂດຍສະເພາະໃນບັນຫາຕາເວັນອອກກາງ ທີ່ລວມເຖິງສະຖານະການໃນຊີຣີ ແລະ ຄວາມຂັດແຍ່ງກັບອີຣານ ເລື່ອງຂໍ້ຕົກລົງນິວເຄຼຍ, ສົງຄາມໃນອາຟະການິດສະຖານ ແລະ ອິຣັກ ຈົນຮອດສາຍພົວພັນລະຫວ່າງຈີນ ແລະ ທ່ານ ໄມ ພອມແພວເອງກໍ່ຫາກໍ່ເດີນທາງຢ້ຽມຢາມນະຄອນຫຼວງປຽງຢາງ ເມື່ອຕົ້ນເດືອນນີ້ ເພື່ອພົບປະຫາລືກັບທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອອີກດ້ວຍ ຖືເປັນເຈົ້າໜ້າທີ່ລະດັບສູງຄົນທຳອິດຈາກລັດຖະບານສະຫະລັດ ອາເມຣິກາຊຸດປັດຈຸບັນ ທີ່ເດີນທາງຢ້ຽມຢາມເກົາຫຼີເໜືອ.

ເຊິ່ງຫຼາຍຝ່າຍມີຄວາມເປັນຫ່ວງບໍ່ໜ້ອຍວ່າ ການເພີ່ມເອົາທ່ານ ໄມ ພອມແພວ ເຂົ້າສູ່ຄະນະດ້ານການຕ່າງປະເທດ ຄືການສົ່ງສັນຍານຄວາມເປັນນັກລ່າຫຼາຍຂຶ້ນຂອງທ່ານ ໂດໂນ ທຣຳ ໃນການດຳເນີນນະໂຍບາຍດ້ານການຕ່າງປະເທດຫຼືບໍ່? ພາຍຫຼັງທີ່ກ່ອນໜ້ານີ້ບໍ່ດົນ ຜູ້ນຳສະຫະລັດ ອາເມຣິກາໄດ້ແຕ່ງຕັ້ງທ່ານ ຈອນ ໂບຕັນ ອະດີດເອກອັກຄະລັດຖະທູດສະຫະລັດ ປະຈຳສະຫະປະຊາຊາດ ເຊິ່ງມີສ່ວນສຳຄັນຕໍ່ການຕັດສິນໃຈຂອງທ່ານ ຈອດ ດັບເບີຢູ ບຸສ ໃນການຍົກທັບບຸກໂຈມຕີອີຣັກ ເມື່ອປີ 2003 ໃຫ້ຮັບຕຳແໜ່ງທີ່ປຶກສາດ້ານຄວາມໝັ້ນຄົງແຫ່ງຊາດຄົນໃໝ່.

HTML tutorial