ສູນປ້ອງກັນອາກາດອາເມຣິກາເໜືອ ສົ່ງ F-22 ບິນຂຶ້ນຕິດຕາມຍົນ Tu-95 ຂອງລັດເຊຍ ທີ່ບິນເຂົ້າໃກ້ອະລາດສະກາ

ສຳນັກຂ່າວຕ່າງປະເທດລາຍງານ 14 ກັນຍາ 2018 ວ່າ: ສູນບັນຊາການປ້ອງກັນອາກາດອາເມຣິກາເໜືອ (NORAD) ເຊິ່ງເປັນສູນບັນຊາການຮ່ວມລະຫວ່າງສະຫະລັດ ອາເມຣິກາ ກັບ ການາດາ ອອກຖະແຫຼງການເມື່ອວັນພະຫັດ ທີ 13 ກັນຍາ ທີ່ຜ່ານມາວ່າ: ຍົນຮົບ F-22 ຫຼາຍລຳຈາກ NORAD ຖືກສົ່ງຂຶ້ນສະກັດຍົນຖິ້ມລະເບີດທາງຍຸດທະສາດໄລຍະໄກ Tu-95 2 ລຳ ຂອງກອງທັບລັດເຊຍ ເມື່ອວັນອັງຄານ ທີ 11​ ກັນຍາ ທີ່ຜ່ານມາ.

Tu-95 ເປັນຍົນຖິ້ມລະເບີດທາງຍຸດທະສາດສົງຄາມເຢັນ ທີ່ສາມາດບັນທຸກອາວຸດນິວເຄຼຍ ໂດຍມີຍົນຮົບ Su-35 ຂອງກອງທັບອາກາດລັດເຊຍ 2 ລຳບິນຄຽງຂ້າງເພື່ອຄຸ້ມກັນ ແຕ່ຍົນທັງໝົດຂອງລັດເຊຍບິນຢູ່ໃນເຂດນ່ານຟ້າສາກົນ ແລະ ບໍ່ໄດ້ລ່ວງລ້ຳເຂົ້າໄປໃນເຂດຂອງສະຫະລັດ ອາເມຣິກາ ຫຼື ເຂດຂອງການາດາ.

ຖະແຫຼງການດັ່ງກ່າວລະບຸອີກວ່າ F-22 ໄດ້ຕິດຕາມຝູງຍົນຂອງລັດເຊຍ ຈົນບິນອອກນອກເຂດພິສູດຝ່າຍປ້ອງກັນໄພທາງອາກາດ ເຊິ່ງເປັນເຂດທີ່ກອງທັບຕ້ອງກວດກາການຈະລາຈອນທາງອາກາດ ອອກນອກຝັ່ງຂອງລັດອະລາດສະກາ ສະຫະລັດ ອາເມຣິກາ ໄປປະມານ 320 ກິໂລແມັດ.

ເຫດການດັ່ງກ່າວເກີດຂຶ້ນໃນມື້ດຽວກັນກັບທີ່ກອງທັບລັດເຊຍ ໄດ້ເລີ່ມປະຕິບັດການເຝິກຊ້ອມຮົບຄັ້ງຍິ່ງໃຫຍ່ທີ່ສຸດທີ່ເຄີຍມີມາ ເຊິ່ງມີທະຫານເຂົ້າຮ່ວມປະມານ 300,000 ຄົນ ລວມທັງອາວຸດທຸກຮູບແບບ ທີ່ໄບບີຣີ ທາງພາກຕາເັວນອອກຂອງປະເທດ.

ທ່ານ ພົນເອກ ແທເຣນ ໂອຊັອເນສຊີ ຜູ້ບັນຊາການ NORAD ກ່າວວ່າ ເຫດການທີ່ເກີດຂຶ້ນທ່ານບໍ່ຖືວ່າເປັນສ່ວນໜຶ່ງຂອງການເຝິກຊ້ອມຮົບ Vostok-2018 ຂອງລັດເຊຍ ແຕ່ກໍ່ກ່ຽວຂ້ອງກັນ.

ເດືອນພຶດສະພາ ທີ່ຜ່ານມາ, ຍົນຮົບສະຫະລັດ ອາເມຣິກາ ໄດ້ບິນຂຶ້ນຕິດຕາມ ຍົນຖິ້ມລະເບີດ Tu-95 ຂອງລັດເຊຍ 2 ລຳ ໃນເຂດນ່ານຟ້າສາກົນ ນອກຝັ່ງທາງຕາເວັນຕົກຂອງລັດອະລາດສະກາ ແລະ ໃນເດືອນ ເມສາ 2017 NORAD ແລະ ກະຊວງປ້ອງກັນປະເທດສະຫະລັດ ອາເມຣິກາ ເປີດເຜີຍວ່າ ຍົນຖິ້ມລະເບີດ Tu-95 ຂອງລັດເຊຍຖືກພົບເຫັນໃນເຂດນ່ານຟ້າສາກົນ 3 ຄັ້ງ ໂດຍ 2 ຄັ້ງຢູ່ໃກ້ກັບເກາະອາລູຊຽນ ແລະ ອີກຄັ້ງໜຶ່ງໃກ້ກັບແຜ່ນດິນໃຫຍ່ລັດອະລາດສະກາ ແລະ ການາດາ.