ຜູ້ນຳອີຣານກ່າວ ການໂຈມຕີພິທີສວນສະໜາມກອງທັບ ກ່ຽວຂ້ອງກັບລັດຖະບານຫຸ່ນ ສ.ອາເມຣິກາ ໃນພູມມິພາກ

AFP PHOTO / ISNA / MORTEZA JABERIAN
AFP PHOTO / ISNA / MORTEZA JABERIAN

ສຳນັກຂ່າວຕ່າງປະເທດລາຍງານ 23 ກັນຍາ 2018 ວ່າ: ສືບເນື່ອງມາຈາກເຫດການທີ່ກຸ່ມຄົນຮ້າຍຢ່າງໜ້ອຍ 4 ຄົນ ພ້ອມອາວຸດບຸກໂຈມຕີ ຍິງປືນເຂົາໃສ່ພິທີສວນສະໜາມຂອງກອງກຳລັງປ້ອງກັນການປະຕິວັດອີຣານ ທີ່ເມືອງອາວາສ ໃນແຂວງຄູເຊສຖານ ທາງທິດຕາເວັນຕົກສຽງໃຕ້ຂອງປະເທດ ໃກ້ກັບຊາຍແດນອິຣັກ ເມື່ອວັນເສົາທີ່ຜ່ານມາ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 29 ຄົນ ແລະ ມີຜູ້ໄດ້ຮັບບາດເຈັບອີກຫຼາຍກວ່າ 70​ ຄົນ.

AFP PHOTO / ISNA / BEHRAD GHASEMI

ທ່ານ ຢາຕອນເລາະ ອາລີ ຄາເມເນອີ ຜູ້ນຳສູງສຸດຂອງອີຣານ ກ່າວເຖິງເຫດການດັ່ງກ່າວທີ່ຖືເປັນໜຶ່ງໃນການສູນເສຍກຳລັງພົນຂອງກອງທັບຫຼາຍທີ່ສຸດໃນຄັ້ງດຽວ ວ່າເປັນອາຊະຍາກຳທີ່ເປັນການສົມຄົບຄິດ ແລະ ຮ່ວມກັນລົງມືກໍ່ເຫດໂດຍ “ລັດຖະບານຫຸ່ນຂອງສະຫະລັດ ອາເມຣິກາ” ໃນພູມມິພາກຕາເວັນອອກກາງ ເຊິ່ງບໍ່ເຄີຍລົດລະຄວາມພະຍາຍາມໃນການທຳລາຍສະຖຽນລະພາບຂອງອີຣານ, ທ່ານ ຢາຕອນເລາະ ອາລີ ຄາເມເນອີ ກ່າວອີກວ່າ ທ່ານໄດ້ສັ່ງໃຫ້ໜ່ວຍງານດ້ານຄວາມໝັ້ນຄົງທຸກແຫ່ງ ຮ່ວມກັນຕິດຕາມຈັບກຸ່ມຜູ້ກ່ຽວຂ້ອງກັບເຫດການນີ້ມາຮັບໂທດຕາມກົດໝາຍໂດຍໄວທີ່ສຸດ.

ໃນດ້ານຂອງທ່ານ ຮັສຊັນ ໂຣຮານີ ປະທານປະເທດອີຣານ ກ່າວເຖິງເຫດການທີ່ເກີດຂຶ້ນວ່າເປັນການກໍ່ການຮ້າຍ ແລະ ອີຣານພ້ອມທີ່ຈະປາບປາມຜູ້ຢູ່ເບື້ອງຫຼັງເຫດການນີ້, ຂະນະທີ່ທ່ານ ໂມຮຳໝັດ ຈາວາດ ຊາຣີບ ລັດຖະມົນຕີກະຊວງການຕ່າງປະເທດອີຣານ ກ່າວວ່າກຸ່ມຄົນຮ້າຍໄດ້ຮັບການຈ້າງວານ, ເຝິກຊ້ອມ, ຕິດອາວຸດ ແລະ ສະໜັບສະໜູນດ້ານການເງິນ ໂດຍລັດຖະບານຕ່າງປະເທດ. ສຳນັກຂ່າວແຫ່ງຊາດອີຣານລາຍງານວ່າ ພາຍຫຼັງເກີດເຫດພຽງບໍ່ພໍເທົ່າໃດຊົ່ວໂມງ ກະຊວງການຕ່າງປະເທດອີຣານ ໄດ້ເຊີນເອກອັກຄະລັດຖະທູດໂຮນລັງ, ດານມາກ ແລະ ອຸປະທູດອັງກິດເຂົ້າພົບ ເພື່ອປຶກສາຫາລືຕໍ່ການທີ່ທັງສາມປະເທດເປັນສະຖານທີ່ພັກພິງໃຫ້ກັບສະມາຊິກກຸ່ມກໍ່ການຮ້າຍບາງຄົນທີ່ກ່ຽວຂ້ອງກັບເຫດການນີ້ ແລະ ຮຽກຮ້ອງໃຫ້ສົ່ງຕົວກຸ່ມຄົນເຫຼົ່ານັ້ນມາດຳເນີນຄະດີໃນອີຣານອີກດ້ວຍ.

ໃນອີກດ້ານໜຶ່ງ, ກະຊວງການຕ່າງປະເທດສະຫະລັດ ອາເມຣິກາອອກຖະແຫຼງການປະນາມເຫດການດັ່ງກ່າວ ເຊັ່ນດຽວກັບຝຣັ່ງ ແລະ ພັນທະມິດຂອງອີຣານທີ່ລວມທັງລັດເຊຍ, ຊີຣີ ແລະ ກຸ່ມຮິສບອນເລາະ, ສ່ວນອິດສະຣາແອນ ແລະ ອາຣັບບີ ຊາອູດິດ ຍັງບໍ່ສະແດງທ່າທີຕໍ່ເຫດການດັ່ງກ່າວ, ໂດຍຕໍ່ມາກຸ່ມ IS ອອກຖະແຫຼງການອ້າງເປັນຜູ້ຢູ່ເບື້ອງຫຼັງເຫດການນີ້ ແຕ່ຍັງບໍ່ມີຫຼັກຖານເຊື່ອມໂຍງຢ່າງຊັດເຈນ, ໃນດ້ານຂອງກອງກຳລັງປ້ອງກັນການປະຕິວັດອີຣານ ຢືນຢັນວ່າເຈົ້າໜ້າທີ່ສາມາດຂ້າຄົນຮ້າຍໄດ້ທັງໝົດ.