ສ.ອາເມຣິກາ ສົ່ງ B-52 ມາບິນເໜືອທະເລຈີນໃຕ້-ທະເລຈີນຕະເວັນອອກ

U.S. Air Force photo by Airman 1st Class Gerald R. Willis
U.S. Air Force photo by Airman 1st Class Gerald R. Willis

ສຳນັກຂ່າວຕ່າງປະເທດລາຍງານເມື່ອວັນທີ 26 ກັນຍາ 2018 ທີ່ຜ່ານມາວ່າ: ທ່ານ ພົນໂທ ເຄວິດ ອິສເບິນ ໂຄສົກກະຊວງປ້ອງກັນປະເທດດສະຫະລັດ ອາເມຣິກາ ກ່າວເມື່ອວັນພຸດ ທີ່ຜ່ານມາວ່າ: ຍົນຖິ້ມລະເບີດທາງຍຸດທະສາດ B-52 ຂອງກອງທັບສະຫະລັດ ອາເມຣິກາ ໄດ້ປະຕິບັດການເຝິກຊ້ອມ ແລະ ລາດຕະເວນໃນເຂດນ່ານຟ້າສາກົນຂອງທະເລຈີນໃຕ້ ແລະ ທະເລຈີນຕາເວັນອອກ ເມື່ອຕົ້ນອາທິດນີ້ ໂດຍໃນສ່ວນຂອງປະຕິບັດການເໜືອທະເລຈີນຕາເວັນອອກນັ້ນ ໄດ້ຮັບການສະໜັບສະໜູນຈາກຍົນຮົບຂອງກອງກຳລັງປ້ອງກັນຕົນເອງຍີ່ປຸ່ນດ້ວຍ.

ເຊິ່ງໂຄສົກກະຊວງປ້ອງກັນປະເທດສະຫະລັດ ອາເມຣິກາ ຢືນຢັນວ່າປະຕິບັດການດັ່ງກ່າວເປັນໄປຕາມຫຼັກການເສລີພາບດ້ານການລາດຕະເວນ ແລະ ເປັນພາລະກິດເຝິກຊ້ອມທີ່ໄດ້ກຽມການໄວ້ລ່ວງໜ້າດົນແລ້ວ, ເຖິງຢ່າງໃດກໍ່ຕາມ ສະຖານະການເກີດຂຶ້ນໃນຊ່ວງທີ່ຄວາມຂັດແຍ່ງທາງການຄ້າທີ່ຊຳເຮື້ອລະຫວ່າງຈີນ ແລະ ສະຫະລັດ ອາເມຣິກາ ໄດ້ຂະຫຍາຍໄປເຖິງການຮ່ວມມືທາງການທະຫານ ໂດຍພຽງບໍ່ພໍເທົ່າໃດວັນກ່ອນໜ້ານັ້ນ ທີ່ລັດຖະບານຈີນບໍ່ອະນຸມັດຕາມຄຳຮ້ອງຂອງກະຊວງປ້ອງກັນປະເທດສະຫະລັດ ອາເມຣິກາ ໃນການໃຫ້ເຮືອໂຈມຕີຍົກພົນຂຶ້ນຝັ່ງ USS Wasp ຂອງກອງທັບສະຫະລັດ ອາເມຣິກາ ເຂົ້າຈອດທຽບທ່າທີ່ເຂດບໍລິຫານພິເສດຮົງກົງ ໃນເດືອນຕຸລານີ້ ແລະ ຍົກເລີກກຳນົດການເດີນທາງຢ້ຽມຢາມນະຄອນຫຼວງວໍຊິງຕັນຂອງທ່ານ ພົນເອກ ເຊິນ ຈິນ ຫຼົງ ຜູ້ບັນຊາການກອງທັບເຮືອ ກອງທັບປົດປ່ອຍປະຊາຊົນຈີນ ຈາກກໍລະນີທີ່ສະຫະລັດ ອາເມຣິກາຂຶ້ນບັນຊີດຳໜ່ວຍງານຂອງກະຊວງປ້ອງກັນປະເທດຈີນ, ນອກຈາກນີ້ ກະຊວງການຕ່າງປະເທດສະຫະລັດ ອາເມຣິກາ ຍັງໄດ້ປະກາດກຽມຂາຍອາວຸດຍຸດໂທປະກອນເພີ່ມໃຫ້ແກ່ໄຕ້ຫວັນ ມູນຄ່າລວມ 330 ລ້ານໂດລາສະຫະລັດ.