ສານໂລກ ສັ່ງໃຫ້ ສ.ອາເມຣິກາ ຜ່ອນຄາຍມາດຕະການຂວໍ້າບາດອີຣານ

ສຳນັກຂ່າວຕ່າງປະເທດລາຍງານ 3 ຕຸລາ 2018 ວ່າ: ທ່ານ ອັບດຸນກາວີ ອາເໝັດ ຢູຊູບ ປະທານອົງຄະນະຜູ້ພິພາກສາສານຍຸຕິທຳລະຫວ່າງປະເທດ (ICJ) ປະກາດຄຳພິພາກສາໃນຄະດີທີ່ອີຣານ ເປັນໂຈດຍື່ນຟ້ອງສະຫະລັດ ອາເມຣິກາກ່ຽວກັບມາດຕະການອັນແຂງກະດ້າງທາງເສດຖະກິດທີ່ບໍ່ເປັນທຳ ຈາກການທີ່ທ່ານ ໂດໂນ ທຣຳ ປະທານປະເທດ ສະຫະລັດ ອາເມຣິກາ ຟື້ນຟູມາດຕະການຂວໍ້າບາດທາງເສດຖະກິດເຕັມຮູບແບບຕໍ່ອີຣານ ພາຍຫຼັງທີ່ສະຫະລັດ ອາເມຣິກາປະກາດຖອນຕົວອອກຈາກຂໍ້ຕົກລົງນິວເຄຼຍສະບັບປີ 2015 ເມື່ອວັນທີ 9 ພຶດສະນາ ທີຜ່ານມາ.

ຄະນະຕຸລາການຂອງສານໂລກ ທັງ 15 ທ່ານມີມະຕິເປັນເອກະພາບ ໃຫ້ລັດຖະບານສະຫະລັດ ອາເມຣິກາ ຍົກເລີກມາດຕະການກີດກັນຕໍ່ການນຳເຂົ້າ ແລະ ສົ່ງອອກສິນຄ້າ ຫຼື ຜະລິດຕະພັນທີ່ມີຄວາມຈຳເປັນດ້ານມະນຸດສະທຳເຊັ່ນ:​ອາຫານ ແລະ ຢາ ຕະຫຼອດຮອດເຄື່ອງມີການແພດ ເນື່ອງຈາກມາດຕະການຂວໍ້າບາດໃນສ່ວນດັ່ງກ່າວສົ່ງຜົນກະທົບຢ່າງຮ້າຍແຮງຕໍ່ການດຳລົງຊີວິດຂອງປະຊາຊົນອີຣານ ນອກຈາກນີ້, ຄຳພິພາກສາຂອງສານໂລກຍັງລະບຸເຖິງມາດຕະການຂວໍ້າບາດດ້ານພາຫະນະທາງອາກາດ ແລະ ຊິ້ນສ່ວນພາຫະນະທາງອາກາດ ວ່າເປັນອັນຕະລາຍຕໍ່ຄວາມປອດໄພດ້ານການບິນຂອງອີຣານ ແລະ ສົ່ງຜົນກະທົບຕໍ່ຄຸນນະພາບຊີວິດຂອງຜູ້ໃຊ້ບໍລິການ.

ເຊິ່ງລັດຖະບານອີຣານ ໄດ້ຍື່ນຄຳຮ້ອງຕໍ່ສານໂລກເມື່ອເດືອນກັນຍາ ທີ່ຜ່ານມາ ວ່າມາດຕະການຂວໍ້າບາດຂອງສະຫະລັດ ອາເມຣິກາ ຕໍ່ອີຣານຖືເປັນການລະເມີດສົນທິສັນຍາມິດໄມຕີ ແລະ ການຄ້າສອງຝ່າຍສະບັບປີ 1951, ໃນຂະນະທີ່ລັດຖະບານສະຫະລັດ ອາເມຣິກາໂຕ້ແຍ້ງວ່າ ເນື້ອໃນສົນທິສັນຍາສະບັບດັ່ງກ່າວລະບຸໄວ້ຢ່າງຊັດເຈນວ່າ ຂໍ້ຂັດແຍ່ງຈາກສົນທິສັນຍາໃຫ້ແກ້ໄຂຜ່ານການເຈລະຈາລະຫວ່າງຜູ້ລົງນາມ ນັ້ນຄືສະຫະລັດ ອາເມຣິກາ ແລະ ອີຣານເທົ່ານັ້ນ ສານໂລກບໍ່ມີຂອບເຂດອຳນາດຕັດສິນບັນຫານີ້ ແຕ່ຄຳຕັດສິນຂອງສານໂລກລະບຸວ່າ ການກະທຳຂອງສະຫະລັດ ອາເມຣິກາລະເມີດບາງມາດຕາທີ່ລະບຸວ່າເປັນສົນທິສັນຍາມິດຕະພາບ ລະຫວ່າງສະຫະລັດ ອາເມຣິກາ ກັບ ອີຣານ.

ເຖິງຢ່າງໃດກໍ່ຕາມ, ມາດຕະການຂວໍ້າບາດຂອງສະຫະລັດ ອາເມຣິກາຕໍ່ອີຣານຍັງເຫຼືອອີກ 1 ຮອບ ເຊິ່ງຈະມີຜົນໃນເດືອນພະຈິກ ທີ່ຈະມາເຖິງນີ້ ເປັນການຈຳກັດການສົ່ງອອກນ້ຳມັນດິບຂອງອີຣານ ເຊິ່ງມາດຕະການສ່ວນນີ້ຈະມີນ້ຳໜັກຮຸນແຮງທີ່ສຸດ ນອກຈາກນີ້ ທັງສອງປະເທດຍັງຕ້ອງຂຶ້ນໃຫ້ການດ້ວຍວາຈາຕໍ່ສານໂລກໃນອີກ 1 ຄະດີໃນອາທິດໜ້າ ໂດຍເປັນການໃຫ້ການຕໍ່ສານຮອບສອງ ໃນຄະດີທີ່ອີຣານເປັນໂຈດຮ້ອງຟ້ອງສະຫະລັດ ອາເມຣິກາ ເມື່ອປີ 2016 ຕໍ່ກໍລະນີທີ່ລັດຖະບານສະຫະລັດ ອາເມຣິກາອາຍັດຊັບສິນຂອງອີຣານ 2,000 ລ້ານໂດລາສະຫະລັດ ເພື່ອເປັນຄ່າຊົດເຊີຍໃຫ້ກັບຜູ້ທີ່ສູນເສຍຈາກການກໍ່ການຮ້າຍ.