ສະຫະພາບເອີຣົບ ຖອດຖອນສິດທິພິເສດທາງການຄ້າຂອງກຳປູເຈຍ

AFP PHOTO / TANG CHHIN Sothy
AFP PHOTO / TANG CHHIN Sothy

ສຳນັກຂ່າວຕ່າງປະເທດລາຍງານເມື່ອວັນທີ 6 ຕຸລາ 2018 ທີ່ຜ່ານມາວ່າ: ທ່ານ ນາງ ເຊຊິເລຍ ມັນສະຕຼອມ ກຳມະທິການດ້ານນະໂຍບາຍການຄ້າຂອງສະຫະພາບເອີຣົບ (EU) ຖະແຫຼງພາຍຫຼັງສຳເລັດການປະຊຸມລັດຖະມົນຕີການຄ້າຂອງ 28 ປະເທດສະມາຊິກສະຫະພາບເອີຣົບ ທີ່ນະຄອນຫຼວງວຽນນາ ປະເທດໂອຕຣິດ ເມື່ອວັນສຸກທີ່ຜ່ານມາ ວ່າກອງປະຊຸມມີມະຕິເຫັນດີໃຫ້ກຽມຖອດຖອນສິດທິພິປະໂຫຍດທາງການຄ້າຂອງກຳປູເຈຍໃນການເຂົ້າເຖິງລະບົບຕະຫຼາດດຽວຂອງສະຫະພາບ ອັນເນື່ອງມາຈາກສະຖານະການການເມືອງຂອງກຳປູເຈຍທີ່ຢູ່ພາຍໃຕ້ລະບົບພັກການເມືອງດຽວ ຫຼັງຈາກການເລືອກຕັ້ງທົ່ວໄປເມື່ອວັນທີ 29 ກໍລະກົດ ທີ່ຜ່ານມາ ເຊິ່ງພັກປະຊາຊົນກຳປູເຈຍ ຂອງສົມເດັດ ຮຸນ ເຊນ ກວາດໄຊຊະນະທັງໝົດ 125 ສຽງໃນສະພາ.

ເຊິ່ງສິດທິພິເສດດ້ານການຄ້າດັ່ງກ່າວເປັນການໃຫ້ໂຄຕ້າສົ່ງອອກສິນຄ້າເປັນກໍລະນີພິເສດໃຫ້ແກ່ ກຸ່ມປະເທດພັດທະນາໜ້ອຍທີ່ສຸດ (Least Developed Countries : LLDGs) ເພື່ອຊ່ວຍກະຕຸ້ນເສດຖະກິດຂອງກຸ່ມປະເທດເຫຼົ່ານີ້ ແຕ່ໂຄຕ້ານັ້ນໃຫ້ຍົກເວັ້ນສິນຄ້າຈຳພວກອາວຸດຍຸດໂທປະກອນ (Everthing but Arms : EBA).

ຂະນະດຽວກັນ, ທ່ານ ນາງ ເຊຊິເລຍ ມັນສະຕຼອມ ກ່າວອີກວ່າ ສະຫະພາບເອີຣົບຢູ່ໃນລະຫວ່າງການພິຈາລະນາຮຽກຄືນສິດທິດັ່ງກ່າວຈາກມຽນມາເປັນປະເທດຕໍ່ໄປ ໂດຍການໃຫ້ເຫດຜົນກ່ຽວກັບສະຖານະການດ້ານຄວາມໝັ້ນຄົງ ແລະ ສິດທິມະນຸດຕໍ່ຊາວໂຣຮິງຢາ ໃນລັດຍະໄຂ່ ທີ່ຢູ່ທາງພາກຕາເວັນຕົກຂອງມຽນມາ. ເຖິງຢ່າງໃດກໍ່ຕາມ ມີລາຍງານວ່າກອງປະຊຸມຍັງບໍ່ສາມາດເຫັນດີຮ່ວມກັນວ່າຄວນຢຸດຕິການສະໜັບສະໜູນໂຄງການພັດທະນາດ້ານນ້ຳມັນ ແລະ ອຸດສາຫະກຳຕ່ຳແຜ່ນຂອງມຽນມານຳຫຼືບໍ່.

ສຳລັບການເຄື່ອນໄຫວຂອງສະຫະພາບເອີຣົບຕໍ່ກຳປູເຈຍ ເກີດຂຶ້ນໃນເວລາດຽວກັນກັບທີ່ສົມເດັດ ຮຸນ ເຊນ ປະກາດປັບຂຶ້ນຄ່າແຮງຂັ້ນຕ່ຳຂອງແຮງງານໃນອຸດສາຫະກຳຕ່ຳແຜ່ນຂອງປະເທດອີກ 12 ໂດລາສະຫະລັດ ເປັນ 170 ໂດລາສະຫະລັດ ໂດຍຜູ້ນຳກຳປູເຈຍກ່າວວ່າ ເປັນການຮັກສາຄຳໝັ້ນສັນຍາທີ່ໄດ້ໃຫ້ໄວ້ກັບປະຊາຊົນຊາວຜູ້ອອກແຮງງານໃນຕອນຫາສຽງເລືອກຕັ້ງ.